Bupailishi Bwakubeca Bulaiisha Makani Akubeca Pali Lesa

Na Lesa ndusuno, ino nceebonshi bupailishi bwaambwa ayi buleemikaninako Lesa bulacita shintu shibiibi? Bupailishi ubo mbwakubeca; nshobaamba akucita shilapa bantu kushoma makani akubeca pali Lesa. Ino nshiinshi nshobaamba akucita shipa bantu kushoma makani akubeca pali Lesa? Ino Lesa alalinyumfwa buyani pasheesho nshobacita? Alimwi ino alaakucitawo nshi?

1. Ino makani ngobaiisha beshibupailishi bwakubeca alapa buyani bantu kushoma makani akubeca pali Lesa?

Ba mubupailishi bwakubeca “balakaka kushoma shancinencine pali Lesa, sombi balashoma sha bubeshi.” (Bene Loma 1:25) Kucakubonenaako, beshibupailishi baanji tabaiishi bantu liina lyakwe Lesa. Nacibi boobo, Baibo ilaamba ayi liina lyakwe Lesa lilyeelete kusebenseshekwa. (Bene Loma 10:13, 14) Na cintu cimwi cibiibi cacitika, bamatanjilili bamwi babupailishi balaamba ayi nkuyanda kwakwe Lesa. Sombi ubu mbubeshi. Lesa teshi ngolengesha shintu shibiibi kucitika. (Amubelenge Jemusi 1:13.) Cabicaako ncakwaamba ayi bantu baanji balaalilwa kusuna Lesa ceebo ca bubeshi bwaamba beshibupailishi.

2. Ino shintu shicita bupailishi bwakubeca shilalengesha buyani bantu kushoma makani akubeca pali Lesa?

Bupailishi bwakubeca tabulami kabotu bantu kweelana a Yehova mbwaabalama. Baibo ilaamba ayi “shibiibi [sha bupailishi bwakubeca] shililundenebo, shilashika akwiculu.” (Ciyubululo 18:5) Kwamyaaka iinji, beshibupailishi balaabanamo lubasu mumapolitiki, kutanjilila nkondo, kuyuminisha kucayana na kulengesha kwaamba ayi bantu baanji bacaikwe. Beshibupailishi bamwi balisuni kubila abuumbi, aboobo balasenga maali kubaabo bali mubupailishi bwabo. Kucita boobo kulatondesha patuba kwaamba ayi tabamushiiwo Lesa, alimwi tabeelete akunoomwimikaninaako.—Amubelenge 1 Joni 4:8.

3. Ino Lesa alalinyumfwa buyani pashintu shicita bupailishi bwakubeca?

Na shintu shicita beshibupailishi bwakubeca shilamukalasha, ino Yehova lakwe alalinyumfwa buyani? Yehova alisuni bantu, sombi alakalala ceebo ca bamatanjilili babupailishi abo baamba shakubeca pali nguwe akutalama kabotu bantu babakonkela. Washomesha ayi bupailishi bwakubeca bulaakunyonyoolwa alimwi ‘teshi bukabonekeewo alimwi.’ (Ciyubululo 18:21) Conoonobo, Lesa alaakunyonyoola bupailishi bwakubeca boonse.—Ciyubululo 18:8.

AMWIIYILEWO ASHIMWI

4. Teshi bupailishi boonse Lesa mbwaasumina

Bantu baanji balashoma ayi bupailishi bupusenepusene buli anga ni nshila shipusenepusene shiya kuli Lesa. Ano sa ici ncancine? Amubelenge Mateyo 7:13, 14, akubandika mwiipusho uyu:

• Ino Baibo ilaamba ayi nshila itola kubuumi ili buyani?

Amweebele VIDYO, lyalo akubandika mwiipusho utokonkelaawo.

VIDYO: Lubasu lwa Vidyo ya—Sa Lesa Alasumina Bupailishi Boonse? (3:22)

• Sa Baibo ilaamba ayi kuli bupailishi buunji Lesa mbwaasumina?

5. Bupailishi bwakubeca tabutondeshi lusuno lwakwe Lesa

Bupailishi bulayuminisha makani akubeca pali Lesa munshila shiinji. Nshila yomwi ibiibi abuumbi mbobucita boobo nkwiinda mukwaabanamo lubasu munkondo. Kwaamba ayi mubone cakubonenaako comwi, amweebele VIDYO. Lyalo amubandike miipusho itokonkelaawo.

VIDYO: Bupailishi Mbobwakaabanamo Lubasu Munkondo Yapacishi Coonse Yabili (2:22)

• Ino nshiinshi beshibupailishi nshobakacita Munkondo Yapacishi Coonse Yabili?

• Ino mutoyeeya buyani pakwaabanamo lubasu munkondo kwa bupailishi?

Amubelenge Joni 13:34, 35 a 17:16. Lyalo amubandike miipusho iyi:

• Ino Yehova alalinyumfwa buyani na bupailishi bwaabanamo lubasu munkondo?

• Bupailishi bwakubeca bwalengesha kwaamba ayi kunoocitika shintu shibiibi shiinji. Ino nshiinshi nshomwabona shitondesha ayi bupailishi bwaalilwa kutondesha lusuno lwakwe Lesa?

6. Lesa alisuni kwaangulula bantu kuswa mubupailishi bwakubeca

Amubelenge Ciyubululo 18:4,a akubandika mwiipusho uyu:

• Ino kushiba kwaamba ayi Lesa alisuni kucafwa bantu bakabecekwa kubupailishi bwakubeca kulamupa kulinyumfwa buyani?

7. Amutolelele kwiiya pali Lesa wancine

Sa shintu shibiibi shicita bupailishi bwakubeca shilyeelete kukuma mbomubona Lesa? Amuyeeye ayi mwaana musankwa wakaka kunyumfwila baishi, lyalo wapondoka akuswa paŋanda. Ano uko nkwaaya watalika kucita shibiibi. Nacibi boobo, baishi tabana kukondwa kwaamba ayi atoocita shibiibi. Ano sa inga caba kabotu kupa mulandu baishi ayi mbobakapa kwaamba ayi mwanaabo asaleewo kunoocita shibiibi?

• Sa inga caba kabotu kupa Yehova mulandu akucileka kwiiya pali nguwe ceebo ca shintu shicita bupailishi bwakubeca?

CITEENTE CINENE

Bupailishi bwakubeca bulacita shintu shibiibi akulengesha bantu kushoma makani akubeca pali Lesa. Lesa alaakunyonyoola bupailishi bwakubeca.

Kwiindulukaamo

• Ino mulalinyumfwa buyani pashintu shicita bupailishi bwakubeca anshobaiisha?

• Ino Yehova alalinyumfwa buyani pa bupailishi bwakubeca?

• Ino Lesa alaakubucita buyani bupailishi bwakubeca?

AMULANGWETEEWO ASHIMWI

Amubone shintu shobilo shicita bupailishi bwakubeca shikalasha Yehova.

“Sa Bupailishi Boonse Bulibo Comwi Comwi? Sa Boonse Bulatanjilila Bantu Kuli Lesa?” (Makani acanika pa jw.org)

Ino nceebonshi Yehova alisuni ayi tunoomupaila pomwi abamwi?

“Sa Kuba Mulibunga Lya Beshikupaila Kulayandika?” (Makani acanika pa jw.org)

Mupailishi wakalinyumfwa cibiibi ceebo ca nkwaakalinga kupaila. Nacibi boobo, ici tacikwe kumupa kwaalilwa kwiiya cancine pali Lesa.

“Cakalengesha Mupailishi Kuswa Nkwaakalinga Kupaila” (Sinsimuka!, February 2015)

Kwamyaaka iinji, bupailishi bulaiisha makani akubeca apa bantu kushoma ayi Lesa tababikiliko maano alimwi ngushilunkutwe. Amwiiye cancine pamakani otatwe akubeca.

“Makani Akubeca Apa Bantu Kubona Anga Lesa Taacite Lusuno” (Njashi Yamulindilishi, November 1, 2013)