Amutolelele Kuyuminisha Lucatano Mulibungano

Na katuli pomwi abamakwesu abenankashi tulalinyumfwabo bweenka mbuli Mwaami Defedi uyo wakaamba ayi: ‘Ncibotu alimwi cilakondelesha kwaamba ayi bantu bakwe Lesa kabakala pomwi mulucatano!’ (Kulumbaisha 133:1) Lucatano ulu taluna kusabo lweenka. Soonse tulyeelete kucitawo comwi kwaamba ayi lutolelele.

1. Ino nciinshi cisangalasha ncetubona pabantu bakwe Lesa?

Na mwacanika kumabungano kucishi cimwi, mpashi inga tamunyumfwishiiwo mushobo wakumusena uko, nacibi boobo, inga tamulinyumfwiiwo anga mwasoweka. Ino nceebonshi? Nceebo cakwaamba ayi kuli koonse nkweenga mwaya tuleya Baibo kusebensesha mabuku omwi. Alimwi tuleelesha kutondeshanya lusuno. Kuli koonse nkotukala, soonse ‘tuleeta paliina lyakwe Yehova, akumusebensela mulucatano.’—Sefaniya 3:9, NWT.

2. Ino inga mwacita buyani kwaamba ayi muyuminishe lucatano?

“Amusunane abuumbi kuswa panshi lya moyo.” (1 Pita 1:22, NWT) Ino kululika uku inga mwakukonkela buyani? Muciindi cakubikila bunene maano kushilubo sha bamwi, amuyeeye pamibo ibotu njebacite. Muciindi cakunyumfwanabo abaabo basuni shintu nshomusuni, amweeleshe kushibako bamakwesu abenankashi baswa mubukaalo bupusenepusene. Alimwi inga tweelesha cankusu kuleya kuba akasalulushi.—Amubelenge 1 Pita 2:17.a

3. Ino nciinshi ncomweelete kucita na mwapusana amukwesu na nankashi?

Nabi kwaamba ayi tulicatene, tuli bantu batamaninite. Cimwi ciindi tulacita sheenga shakalasha bamwi. Aboobo Maswi akwe Lesa alatulwiita ayi: “Amutolelele . . . kulekelelana,” alimwi alatolelela akwaamba ayi: “Bweenka mbuli Yehova mbwaakamulekelela camoyo woonse, amwebo mulyeelete kucita bweenka ubo.” (Amubelenge Bene Kolose 3:13, NWT.) Liinji tulabisha kuli Yehova, nacibi boobo alatulekelela. Aboobo alisuni ayi aswebo tunoolekelela bamakwesu. Na mwashiba kwaamba ayi kuli umwi ngomwakalasha, amucitewo comwi kwaamba ayi mubooshe luumuno.—Amubelenge Mateyo 5:23, 24.b

AMWIIYILEWO ASHIMWI

4. Amuleye kasalulushi

Tulisuni kutondesha lusuno kubamakwesu boonse. Nacibi boobo, cimwi ciindi inga catuyumina kunyumfwana abamakwesu abenankashi bapusene andiswe. Ino nciinshi ceenga catucafwa? Amubelenge Milimo 10:34, 35, akubandika miipusho iyi:

• Yehova alatambula bantu ba mishobo yoonse mbuli Bakamboni Bakwe. Ino cakubonenaako cakwe inga mwacikonkela buyani pamakani ambomulinyumfwa pabaabo mbomupuseneabo?

• Ino nshiinshi nshobacita bantu bakumusena nkomukala shitondesha kasalulushi alimwi nshomweelete kuleya?

Amubelenge 2 Bene Kolinto 6:11-13, akubandika mwiipusho uyu:

• Ino inga mwacita buyani kwaamba ayi mutondeshe lusuno ku bamakwesu abenankashi bapusene andimwe?

5. Amulekelele camoyo woonse akuyuminisha luumuno

Yehova alatulekelela camoyo woonse nabi kwaamba ayi lakwe taatubishishi kwaamba ayi tuyandike kumulekelela. Amubelenge Kulumbaisha 86:5, akubandika miipusho iyi:

• Ino vesi iyi ilatwiisha nshi pali Yehova mbwalekelela?

• Ino nceebonshi mulyeelete kulumba kwaamba ayi Yehova alalekelela?

• Ino mbukaalo nshi bweenga bwapa kwaamba ayi cibe ciyumu kunyumfwana abamwi?

Ino inga twacita buyani kwaamba ayi tukonkele cakubonenaako cakwe Yehova akutolelela kunyumfwana abamakwesu abenankashi? Amubelenge Tushimpi 19:11, akubandika mwiipusho uyu:

• Ino inga mwacita buyani kwaamba ayi mutolelele kunyumfwana amuntu umwi na wamukalasha?

Cimwi ciindi tulakalasha bamwi. Ino nciinshi ncotweelete kucita na ca mushobo uyo cacitika? Amweebele VIDYO, akubandika mwiipusho utokonkelaawo.

VIDYO: Kuba Muluumuno Kulaleta Shoolwe (6:01)

• Kweelana anshomweebela muvidyo, ino nankashi wakacita buyani kwaamba ayi ayuminishe luumuno?

6. Amubikile maano kumibo ibotu ya bamakwesu abenankashi

Kushiba kabotu bamakwesu abenankashi kulaakutucafwa kushiba mibo yabo ibotu anshebaalilwa kucita. Ino inga twacita buyani kwaamba ayi tunoobikila maano kumibo yabo ibotu? Amweebele VIDYO, akubandika mwiipusho utokonkelaawo.

VIDYO: Amube Muntu uli Kabotu Abuumbi! (5:10)

• Ino nciinshi ceenga camucafwa kubikila maano kumibo ibotu icite bamakwesu abenankashi?

Yehova alabikila maano kumibo yesu ibotu. Amubelenge 2 Makani 16:9a, akubandika mwiipusho uyu:

• Ino kushiba ayi Yehova alabikila maano kumibo yanu ibotu kulamupa kulinyumfwa buyani?

CITEENTE CINENE

Inga mwacafwilisha kwaamba ayi mulibungano mube luumuno kwiinda mukulekelela akutondesha lusuno kubamakwesu abenankashi boonse.

Kwiindulukaamo

• Ino inga mwacita buyani kwaamba ayi muleye kasalulushi?

• Ino nciinshi ncomweelete kucita na mwapusana amukwesu na nankashi?

• Ino nceebonshi mulyeelete kutolelela kukonkela cakubonenaako cakwe Yehova pamakani akulekelela bamwi?

AMULANGWETEEWO ASHIMWI

Amwiiye mbweenga cikoshanyo cimwi Yesu ncakaamba catucafwa kuleya kwaamba shibiibi pabamwi.

Kusha Cisamu (6:56)

Sa tulyeelete kusenga kulekelelwa na twalinyumfwa kwaamba ayi taakuwo cibiibi ncetwacita?

“Kulekelela—Njenshila Icafwa Kuboosha Luumuno” (Njashi Yamulindilishi, November 1, 2002)

Amubone bamwi mbobakeeya kutanotondesha kasalulushi kubamwi.

Mutanokoombolosha Muntu Kweelana Ambwaaboneka (5:06)

Amwiiye nsheenga mwaciita kwaamba ayi mutalike kunyumfwana aumwi ngomwapusanaakwe, makani ayo kaatana kupilinganya luumuno lwa mulibungano.

“Amumanishe Kutanyumfwana Munshila Yalusuno” (Njashi Yamulindilishi, May 2016)