“Ulaakuba Andime mu Paladaiso”

1. Ino nciinshi Yesu kaatana kufwa ncaakalwiita kapondo wakalinga kulubasu lwakwe? (Luka 23:39-43)

YESU abakapondo bobilo mbobakapopa kulubasu lwakwe bakapenga ndyebakalinga kufwa. (Luka 23:32, 33) Bakapondo bobilo aba bakalinga kwaamba shibiibi pali Yesu, aboobo ncakutatoonsha kwaamba ayi tabakalinga bashikwiiya bakwe. (Mate. 27:44; Maako 15:32) Nacibi boobo, womwi wakaalula miyeeyo yakwe. Wakaamba ayi: “Yesu, ukanjibaluke waakunjila mu Bwaami bwako.” Yesu wakakumbula ayi: “Ncakwiila sunu ntookulwiita ayi, ulaakuba andime mu Paladaiso.” (Amubelenge Luka 23:39-43, NWT.) Taakuwo citondesha ayi kapondo uyu wakasumina makani a ‘Bwaami bwa kwiculu,’ Yesu ngaakalinga kushimikila. Alimwi Yesu taakwe kwaamba ayi musankwa uyu alaakuba mu Bwaami bwakwiculu. (Mate. 4:17) Yesu wakalinga kwaamba sha Paladaiso ya kunembo pacishi capanshi. Ino nciinshi nceenga twaambila boobo?

2. Ino tulishi buyani ayi kapondo wakaana ulya wakalinga muJuda?

² Cilyeelete kapondo ulya wakaana wakalinga muJuda. Wakalwiita kapondo mubye ayi: ‘Sa webo tooloondi Lesa mukubona kwaamba ayi wapekwa mulandu womwi anguwe?’ (Luka 23:40) BaJuda bakalinga kulambila Lesa womwi, ano bantu bamishobo imwi bakalinga kushoma mu balesa baanji. (Kulo. 20:2, 3; 1 Koli. 8:5, 6) Naakwiinga bakapondo balya tabakalinga baJuda, mpashi naakwiinga wakeepusha ayi, “Sa webo tooloondi balesa?” Alimwi Yesu taakwe kutumwa kubantu ba mishobo imwi, wakatumwa “ku mbelele shisowekete sha mushobo wa bene Isilaeli.” (Mate. 15:24) Lesa wakalinga washibisha bene Isilaeli ayi bafu balaakubushikwa. Cilyeelete kapondo ulya wakaana wakalinga kwaashi makani aya, alimwi maswi ngakaamba alatondesha ayi wakalinga kucishi ayi Yehova alaakubusha Yesu kwaamba ayi akeendeleshe mu Bwaami bwakwe Lesa. Cilyeelete musankwa ulya wakalinga kulangila ayi alakwe Lesa alaakumubusha.

3. Ino cilyeelete kapondo wakayeeya nshi Yesu ndyaakaamba sha Paladaiso? Amusansulule. (Matalikilo 2:15)

³ Mukwiinga kapondo wakaana wakalinga muJuda, cilyeelete wakalinga kwaashi makani aamba pali Adamu a Efa alimwi a Paladaiso Yehova njaakalinga wababikaamo. Aboobo kapondo ulya cilyeelete wakalinga kushoma ayi Paladaiso Yesu njaakaamba ulaakuba muunda ubotu pacishi capanshi.​—Amubelenge Matalikilo 2:15.

4. Ino maswi Yesu ngaakalwiita kapondo alyeelete kutupa kuyeeya nshi?

⁴ Maswi Yesu ngaakalwiita kapondo alyeelete kutupa kuyeeya Paladaiso mbweshi ikabe. Alimwi kuli nsheenga tweeya pamakani a Paladaiso ku buleelo bwa luumuno bwakwe Solomoni. Baibo ilaamba ayi Yesu uliinditeewo pali Solomoni. Aboobo inga twalangila ayi Yesu pomwi abaabo mbweshi akanokweendeleshaabo balaakwaalula cishi capanshi kuba paladaiso ibotu. (Mate. 12:42) Aboobo ba “mbelele shimwi” balyeelete kushiba nshobeelete kucita kwaamba ayi bakelele kukala kwamuyayaya mu Paladaiso.​—Joni 10:16.

INO BUUMI BULAAKUBA BUYANI MU PALADAISO?

5. Ino mutoyeeya ayi buumi bulaakuba buyani mu Paladaiso?

⁵ Ino mutoyeeya ayi buumi bulaakuba buyani mu Paladaiso? Mpashi mulayeeya musena ubotu abuumbi, uli anga ngumuunda wa Edeni. (Mata. 2:7-9) Inga mweebaluka bushinshimi mbotucana mulibuku lyakwe Mika bwaamba pabantu bakwe Lesa ayi “womwi awomwi ulaakunookala muluumuno pakati ka minyansa yakwe ashisamu shakwe sha nkuyu.” (Mika 4:3, 4) Alimwi mpashi inga mweebaluka mavesi amu Baibo aamba ayi kulaakuba shakulya shiinji. (Kulu. 72:16; Isa. 65:21, 22) Aboobo inga mwayeeya kamushiite mumuunda ubotu abuumbi, panembo lyanu pali tebo iswite shakulya shibotu abuumbi. Inga mwayeeya muuwo ubotu utoleta keema kabotu ka shishango amaluba. Alimwi cilyeelete inga mwayeeya ayi mutoseka akusangalala pomwi amukwashi wanu abeshicibusa, kwiilikaawo abaabo beshibakabushikwe. Ishi shoonse teshi makani akulotabo. Nshintu nsheenga twashoma cakutatoonsha kwaamba ayi shilaakucitika. Nacibi boobo, mu Paladaiso kulaakuba kusebensa ncito shisangalasha.

6. Ino tulaakunoocita nshi mu Paladaiso? (Amubone cikope.)

⁶ Yehova wakatulenga kwaamba ayi tunoosangalala kusebensa. (Shiku. 2:24) Tulaakuba ashakucita shiinji bunene bunene muciindi ca Buleelo Bwakwe Klistu Bwa Myaaka 1,000. Abo beshi bakapuluke mapensho anene alimwi abantu baanji beshibakabushikwe, balaakuyandika shakufwala, shakulya, amusena kwakukala. Tulaakuyandika kusebensa ncito isangalasha kwaamba ayi tukacikoonshe kucita shintu ishi. Bweenka mbuli Adamu a Efa mbobakalinga balwiitikwa kulama cishi capanshi, aswebo tulaakusangalala anciito yakwaalula cishi capanshi kuba paladaiso. Alimwi amuyeeyebo mbweshi cikabe cisangalasha kwiisha bantu baanji beshibakabushikwe abo batacishiiwo! shiinji pali Yehova aluyaando lwakwe. Alimwi akucafwa bashomeka kwiiya shiinji, abo bakekalaako paciindi Yesu kaatana kusa pacishi capanshi!

7. Ino nciinshi nceenga twashoma cakutatoonsha, alimwi ino nceebonshi?

⁷ Inga twashoma cakutatoonsha kwaamba ayi mu Paladaiso tulaakukala muluumuno, tulaakuba ashoonse nshetuyandika, alimwi shintu shoonse shilaakunobambitwe kabotu. Ino nceebonshi? Nceebo cakwaamba ayi Yehova watutondesha cakubonenaako ca buumi mbweshi bukabe mu bweendeleshi bwa Mwanaakwe. Cakubonenaako ici nca buleelo bwakwe Solomoni.

BULEELO BWAKWE SOLOMONI BULATONDESHA CAKUBONENAAKO CA BUUMI MBWESHI BUKABE MU PALADAISO

8. Ino maswi ngotucana pa Kulumbaisha 37:10, 11, 29 akakumanishikwa buyani pesule Mwaami Defedi ndyaakaalemba? (Amubone “Miipusho Kuswa Kubeshikubelenga” mumagazini iyi.)

⁸ Mwaami Defedi wakatanjililwa amushimu kulemba pabuumi mbweshi bukabe kunembo paciindi ndyeshi mwaami musongo alimwi ushomeka akanokweendelesha. (Amubelenge Kulumbaisha 37:10, 11, 29.) Liinji ndyetutobandika abamwi pamakani a Paladaiso ili kunembo tulabelenga Kulumbaisha 37:11. Tulicite sheebo shibotu shakucita boobo mukwiinga aaya ngo maswi Yesu ngakaamba Mulikani lya Pakalundu, kutondesha kwaamba ayi alaakukumanishikwa kunembo. (Mate. 5:5) Nacibi boobo, maswi Defedi ngakaamba akatondesha buumi mbweshi bukabe paciindi ca buleelo bwa Mwaami Solomoni. Solomoni ndyaakalinga mwaami mu Isilaeli, bantu bakwe Lesa bakekala muluumuno lulibetele alimwi bakalinga kucite shiinji mucishi “mukuunka mukupa abuuci.” Lesa wakaamba ayi: ‘Na mukatolelele kukala kweelana amilawo yangu alimwi amilasho yangu. . . , ndaakumupa luumuno mucishi alimwi mulaakunokoona cakutaloonda muntu nabi womwi.’ (Lefi. 20:24; 26:3, 6) Shishomesho ishi shakakumanishikwa Solomoni ndyaakalinga mwaami. (1 Maka. 22:9; 29:26-28) Alimwi Yehova wakashomesha ayi bantu bacita shibiibi ‘teshi bakababoneewo.’ (Kulu. 37:10) Aboobo, maswi ngotucana pa Kulumbaisha 37:10, 11, 29 akakumanishikwaawo kale kale alimwi alaakukumanishikwa kunembo.

9. Ino mwaami mwanakashi waku Shiba wakaamba nshi pa buleelo bwa Mwaami Solomoni?

⁹ Mwaami mwanakashi waku Shiba wakanyumfwa mpuwo ya luumuno akuswitilila kwa bene Isilaeli mwaami Solomoni ndyaakalinga kweendelesha. Wakeenda mushinso ulaamfu kuswa kumishaabo kuya ku Jelusalemu kwaamba ayi alibonene mwiine sha mpuwo njaakanyumfwa. (1 Baam. 10:1) Pesule lyakufwakashila bwaami bwakwe Solomoni, mwaami mwanakashi waku Shiba wakaamba ayi: “Nshindakashimikilwa shaceyabo kulaale. . . . Balicite coolwe abuumbi bantu abasebenshi banu abo bekalabo muliimfwa lyanu lyoonse kabanyumfwa kwaamba kwanu kwabusongo!” (1 Baam. 10:6-8) Bukaalo mbobwakalinga mubuleelo bwakwe Solomoni cakalinga citondesho ca shintu Yehova nsheshi akacitile bantu mubuleelo bwakwe Yesu, Mwanaakwe.

10. Ino Yesu aliindite Solomoni munshila nshi?

¹⁰ Yesu aliindite Solomoni munshila shoonse. Solomoni wakalinga muntu utamaninite uyo wakacita shilubo shinene isho mukuya kwaciindi shakaleta mapensho kubantu bakwe Lesa. Ano Yesu lakwe ngu Muleli umaninite utaciti shilubo. (Luka 1:32; Ebu. 4:14, 15) Yesu wakatolelela kushomeka kuli Lesa nabi kwaamba ayi wakeenda mumeelesho ayumu kuswa kuli Satana. Klistu wakatondesha patuba kwaamba ayi teshi akabisheewo na kucita cintu cili coonse ceenga caleta mapensho kubalelwa bakwe bashomeka. Ncoolwe cinene abuumbi kuba anguwe mbuli Mwaami wesu.

11. Ino Yesu alaakusebensela pomwi abaani mu bweendeleshi bwakwe?

¹¹ Kwiinda mukusebensela pomwi aba 144,000 abo mbeshi akanokweendeleshaabo, Yesu alaakulama kabotu bantu akukumanisha luyaando Yehova ndwaakalengela cishi capanshi. (Ciyu. 14:1-3) Basankwa abanakashi aba bakeenda mumeelesho amapensho aanji ndyebakalinga pacishi capanshi, aboobo balaakunooshi kabotu nsheshi abo beshi bakekale pacishi capanshi bakanookwiindaamo. Ino balaakunoocite mukuli nshi?

INO BANANIKITWE BALAAKUNOOCITE MUKULI NSHI?

12. Ino ngumukuli nshi Yehova ngweshi akape ba 144,000?

¹² Yesu abaabo mbeshi akanokweendeleshaabo balaakuba anciito inene kwiinda yakalinga kucite Solomoni. Mbuli mwaami wa bene Isilaeli, Solomoni wakalinga kucite mukuli wakweendelesha bantu baanji mucishi comwibo. Ano abo beshi bakanokweendelesha mu Bwaami bwakwe Lesa balaakuba amukuli wakulama bantu baanji nsengwe yoonse. Yehova wabapa coolwe cinene abuumbi ba 144,000!

13. Ino ngumukuli nshi ulibetele abo beshibakanokweendelesha a Yesu ngweshi bakapekwe?

¹³ Bweenka mbuli Yesu, ba 144,000 balaakuba ba maami alimwi bapailishi. (Ciyu. 5:10) Bene Isilaeli ndyebakalinga kukonkela Mulawo wakwe Mose, bapailishi bakalinga kucafwa bantu kuba abuumi bubotu lwakumubili alimwi akuba abushicibusa bubotu a Yehova. Mulawo ‘wakalinga kwiimikaninako shoolwe shakalinga kusa,’ aboobo inga twaamba ayi abo beshi bakanokweendelesha pomwi a Yesu balaakucafwa bantu bakwe Lesa kutolelela kuba abuumi bubotu alimwi abushicibusa bubotu a Yehova. (Ebu. 10:1) Pacecino ciindi tatucishiwo ba maami abapailishi aba mbweshi bakanoobandika abalelwa ba Bwaami pacishi capanshi. Bubaambo buli boonse Yehova mbweshi akabike, inga twashoma cakutatoonsha kwaamba ayi mu Paladaiso kunembo, abo beshi bakekale pacishi capanshi balaakutambula butanjilishi mbobayandika.​—Ciyu. 21:3, 4.

INO BA “MBELELE SHIMWI” BALYEELETE KUCITA NSHI KWAAMBA AYI BAKEELELE KUKALA MU PALADAISO?

14. Ino ba “mbelele shimwi” a bamakwabo Klistu balicatene buyani?

¹⁴ Yesu wakaamba baabo beshibakanokweendelesha anguwe ayi “litanga liniini.” (Luka 12:32) Alimwi wakaamba asha likoto lyabili, ilyo lisansulula ba “mbelele shimwi.” Makoto obilo aya nditanga lyomwi licatene. (Joni 10:16, NWT) Makoto aya akatalika kale kusebensela pomwi alimwi alaakutolelela kusebensela pomwi cishi capanshi na cikabe paladaiso. Nacibi boobo, paciindi ico bamu “litanga liniini” balaakuba kwiculu, lyalo ba “mbelele shimwi” balaakunoolangila kusangalala abuumi kwamuyayaya pacishi capanshi. Sombi kuli shintu shimwi ba “mbelele shimwi” nshobeelete kucita kwaamba ayi bakelele kukala mu Paladaiso.

15. (a) Ino ba “mbelele shimwi” balasebensela buyani pomwi abamakwabo Klistu? (b) Ino cakubonenaako ca mukwesu uli mu shopu inga mwacikonkela buyani? (Amubone cikope.)

¹⁵ Kapondo ulya wakaana wakafwa kaatana kuba acoolwe cakutondesha kulumba kwakwe pasheesho Klistu nshaakamucitila. Mubupusano, soba “mbelele shimwi” tulicite shoolwe shiinji pacecino ciindi sha mbweenga twatondesha mbotulinyumfwa pali Yesu. Kucakubonenaako tulatondesha ayi tulisuni Yesu kwiinda mukucafwa bamakwabo bananikitwe. Yesu wakaamba ayi alaakoombolosha mbelele kweelana anshobakalinga kucita kubamakwabo. (Mate. 25:31-40) Inga twacafwa bamakwabo Klistu kwiinda mukusebensa cankusu muncito yakushimikila akucafwa bantu kuba bashikwiiya. (Mate. 28:18-20) Aboobo tulyeelete kusebensesha kabotu shitabatisho shakusebensesha mukwiisha Baibo nshebatupa mbuli libuku lya Amusangalale Abuumi Kwamuyayaya! Na tamucite ciiyo ca Baibo pacecino ciindi, amusebense cankusu kulangoola bantu beenga basuna kwiiya Baibo.

16. Ino nshiinshi nsheenga twaciita pacecino ciindi kwaamba ayi tulibambile kuba balelwa ba Bwaami bwakwe Lesa?

¹⁶ Tulyeelete kutalika paciindi ceenka cino kucita shintu sheshi shikape kwaamba ayi Yehova akatusuminishe kukala mu Paladaiso. Cino nceciindi ndyetweelete kusebensa cankusu kuba bantu bashomeka mushintu nshetwaamba anshetucita alimwi akucita shintu mukweelanya kabotu. Alimwi inga twatondesha kushomeka kuli Yehova, mucikwati, akubashominyineesu. Na katunyumfwila Yehova pacecino ciindi ndyetuli mucishi cibiibi ici, cilaakuba cuubu kumunyumfwila mu Paladaiso. Alimwi inga tweeyako lushibo amibo itondesha kwaamba ayi tutolibambila kukala mucishi cipya kunembo. Amubone mutwi utokwaamba ayi “Sa Mulilibambite Kunjila Mucishi Cipya?” utoocanika mumagazini iyi.

17. Sa tulyeelete kulinyumfwa kulefuka ceebo ca shilubo nshetwakacita kale kale? Amusansulule.

¹⁷ Tulyeelete kusebensa cankusu kwaamba ayi tuleye kutolelela kulinyumfwa cibiibi pashilubo nshetwakacita kale kale. Nacibi boobo tatweelete “kunoobisha kashanga” ceebo cakwaamba ayi Lesa wakatupa cilubula. (Ebu. 10:26-31) Na twaana cancine pesule lyakucita cilubo cinene akusenga lucafwo lwakwe Yehova kwiinda mubamanene, lyalo akwaalula mibo yesu, nkokwaamba ayi Yehova watulekelela cakumaninina. (Isa. 55:7; Milimo 3:19) Mutaluubi maswi Yesu ngaakalwiita baFalisi ayi: “Nshikwe kwisa mukwiita baluleme, sombi bamucita shibi.” (Mate. 9:13) Mulambu wacilubula ulicite nkusu shakupa kwaamba ayi shilubo shesu shoonse shilekelelwe.

INGA MWEKALA KWAMUYAYAYA MU PALADAISO

18. Ino nshiinshi nsheenga mwasuna kubandika amusankwa wakalinga kapondo uyo wakafwita pomwi a Yesu?

¹⁸ Amuyeeye kwaamba ayi muli mu Paladaiso, mutobandika amusankwa wakalinga kapondo Yesu ngwakabandikaakwe. Ncakutatoonsha noonse inga mwaamba mbomutolumba pa mulambu wakwe Yesu. Alimwi mpashi inga mweepusha musankwa uyo kwaamba ayi amulwiite shiinji shakacitika mawoola aniini Yesu kaatana kufwa amusankwa uyo mbwaakalinyumfwa Yesu ndyaakamukumbula pesule lya kumusenga. Mpashi musankwa uyo alakwe inga wasuna kumwiipusha buumi mbobwakalinga munshiku shakweelaako sha bweende bwakwe Satana. Cilaakuba coolwe cinene abuumbi kwiisha Maswi akwe Lesa bantu mbuli musankwa uyu!​—Efe. 4:22-24.

19. Ino nceebonshi buumi mu Paladaiso teshi bukanolensha butolo? (Amubone cikope cili papeeji yakutaanguna.)

¹⁹ Buumi mu Paladaiso teshi bukanolensha butolo. Lyoonse tulaakunooba acoolwe cakushiba bantu mbotwatakalinga kushiiwo kabotu akusebensa ncito shisangalasha. Alimwi ciinditeewo, bushiku abushiku tulaakunooba acoolwe cakushiba kabotu Ishiwesu wakwiculu akusangalala ashintu nsheshi akanootupa. Lyoonse kulaakunooba shintu shiinji shakwiiya pali nguwe alimwi kulaakuba shiinji shakwiiya pashintu nshaakalenga. Kukala kwamuyayaya kulaakutupa kumusuna abuumbi Lesa. Tulalumba abuumbi kuli Yehova a Yesu kwaamba ayi bakatushomesha ayi inga twekala kwamuyayaya mu Paladaiso!