Miipusho Kuswa Kubeshikubelenga
Ino nceebonshi Josefu a Maliya bakasalawo kutolelela kuba mu Betileemu muciindi cakuboolela ku Nasaleti kumishaabo, pesule lya kushalwa kwakwe Yesu?
Baibo tayaambiwo. Nacibi boobo, ilatulwiita makani amwi asangalasha eenga atucafwa kushiba cakapa kwaamba ayi mpashi basalewo kutaboolela kumishaabo ku Nasaleti paciindi cilya.
Munjelo wakalwiita Maliya ayi alaakumita akuba amwaana musankwa. Paciindi munjelo ndyaakalwiita Maliya makani aya, Maliya a Josefu bakalinga kukala mu Nasaleti mushi wakalinga mu Galili. (Luka 1:26-31; 2:4) Lyalo ndyebakaswa ku Ijipiti, bakaboolela ku Nasaleti. Yesu wakakomenena mumushi uyu alimwi wakalinga kwiitwa ayi ngu mwine Nasaleti. (Mate. 2:19-23) Aboobo tulayeeya pamushi wa Nasaleti na twaamba pali Yesu, Josefu, a Maliya.
Maliya wakalinga kucite shikamukowa waliina lya Lisabeti, uyo wakalinga kukala ku Juda. Lisabeti wakalinga kweebetwe kuli Sekaliya uyo wakalinga mupailishi alimwi Lisabeti wakesa mukuba banyina Joni Mubombeki. (Luka 1:5, 9, 13, 36) Maliya wakalinga wafwakashila Lisabeti alimwi wakekala anguwe kwa myeenshi yotatwe mu Juda. Lyalo Maliya wakaboolela ku Nasaleti. (Luka 1:39, 40, 56) Ncoceeco cakapa kwaamba ayi Maliya aushiibe musena wa Juda.
Mukuya kwaciindi, Josefu wakakonkela mulawo wakuya mukulembesha. Aboobo Josefu wakaswa ku Nasaleti akuya ku Betileemu kundabala yakwe Defedi. Alimwi Baibo yakaambila limwi ayi Mesiya mwaakalinga kusa mukushalilwa. (Luka 2:3, 4; 1 Samwe. 17:15; 20:6; Mika 5:2) Pesule lyakwaamba ayi Yesu washalwa, Josefu taakwe kulwiita Maliya ayi beende mushinso ulaamfu wakuboolela ku Nasaleti ceebo cakwaamba ayi Yesu wakalinga kateta. Aboobo bakekala mu Betileemu apo pakweenda mushinso mpashi wa makilomita ali 9 kuswa ku Jelusalemu. Aboobo, cakalinga cuubu kuli mbabo kutola mwaana ku tempele mukubenga mulambu wakalinga kuyandika kweelana amulawo.—Lefi. 12:2, 6-8; Luka 2:22-24.
Kumatalikilo munjelo wakwe Lesa wakalwiita Maliya ayi mwanaakwe musankwa alaakupekwa “bwaami bweenka bwakalinga kucite Defedi,” alimwi ayi ‘alaakuba Mwaami.’ Sa Josefu a Maliya bakayeeya ayi cakalinga cintu ciyandika kwaamba ayi Yesu wakashalilwa kundabala yakwe Defedi? (Luka 1:32, 33; 2:11, 17) Mpashi bakayeeya ayi cili kabotu kukalaako mu Betileemu akulindila kushikila Lesa abalwiite nsheshi bacite.
Tatucishiiwo na bakekalaamo ciindi cilaamfu buyani mu Betileemu, beshikubona bweenda nyenyeenshi ndyebakashika. Nacibi boobo, paciindi ici bakalinga kukala muŋanda alimwi mwanaabo musankwa taakalinga kateta. (Mate. 2:11) Citoboneka ayi muciindi cakuya ku Nasaleti, bakasalawo kukala mu Betileemu kwaciindi cilaamfu akushibila buumi bwa mundabala iyi.
Elodi wakapa mulawo wakwaamba ayi ‘bacaye baana basankwa boonse mu Betileemu . . . abo bakalinga kucite myaaka yobilo kuboola panshi.’ (Mate. 2:16) Munjelo wakacenjesha Josefu pamakani aya, aboobo Josefu a Maliya bakacicila ku Ijipiti pomwi a Yesu akukala nkuko kushikila Elodi ndyaakafwa. Mukuya kwaciindi, Josefu wakaya ku Nasaleti pomwi amukwashi wakwe. Ino nceebonshi tabakwe kuboolela ku Betileemu? Mukwiinga paciindi ici, Akelosi mwanaakwe Elodi musankwa ngowakalinga kweendelesha mu Judeya alimwi wakalinga shilunkutwe. Alimwi munjelo wakacenjesha Josefu ayi atabooleli ku Betileemu. Aboobo ndyebakalinga ku Nasaleti, cakalinga cuubu kuli Josefu kwiisha Yesu kulambila kwancine.—Mate. 2:19-22; 13:55; Luka 2:39, 52.
Citoboneka kwaamba ayi Josefu wakafwa Yesu kaatana kufwa akupa kwaamba ayi cikonsheke bamwi kutalika kuya kwiculu. Aboobo Josefu alaakubushikwa peenka pano pacishi capanshi. Baanji balaakucikonsha kubonana anguwe akushiba shiinji shakapa kwaamba ayi lakwe a Maliya basalewo kutolelela kukala mu Betileemu pesule lya kushalwa kwakwe Yesu.