Zekkaliya

Yakuwa y’akola ebire by’enkuba,

Y’atonnyeseza abantu enkuba,+

Era awa bonna ebimera mu nnimiro.

 2 Ebifaananyi bya baterafi* byogedde eby’obulimba,

Abalaguzi bafunye okwolesebwa okw’obulimba.

Boogera ebirooto ebitalina mugaso;

Era bateganira bwereere okubudaabuda.

Eyo ye nsonga lwaki balibungeeta ng’endiga;

Balibonaabona olw’obutaba na musumba.

 3 Nsunguwalidde abasumba,

Era nja kuvunaana abakulembeze abanyigiriza abalala.*

Yakuwa ow’eggye ajjukidde ekisibo kye,+ ajjukidde ennyumba ya Yuda,

Era abafudde ng’embalaasi ye ey’ekitiibwa mu lutalo.

 4 Mu ye mwe muva omukulembeze,*

Mu ye mwe muva omufuzi awanirira,

Mu ye mwe muva omutego ogw’olutalo;

Era mu ye mwe muva buli mulabirizi;* bonna bava mu ye.

 5 Baliba ng’abalwanyi

Abalinnyirira ebitoomi by’omu nguudo mu lutalo.

Balirwana kubanga Yakuwa ali wamu nabo,+

Era abeebagala embalaasi baliswala.+

 6 Ennyumba ya Yuda ndigifuula ya maanyi,

N’ennyumba ya Yusufu ndigirokola.+

Ndibazzaawo

Kubanga ndibasaasira;+

Baliba nga be sigobangako;+

Kubanga nze Yakuwa Katonda waabwe era ndibaanukula.

 7 Aba Efulayimu baliba ng’omulwanyi ow’amaanyi,

Era omutima gwabwe gulisanyuka ng’ogw’omuntu anywedde omwenge.+

Abaana baabwe kino balikiraba ne basanyuka;

Emitima gyabwe girisanyuka olw’ebyo Yakuwa by’aliba abakoledde.+

 8 ‘Ndibayita ne mbakuŋŋaanya;

Ndibanunula,+ era balifuuka bangi;

Balyeyongera obungi.

 9 Wadde nga mbasaasaanya mu mawanga ng’ensigo,

Balinzijukira nga bali mu bitundu eby’ewala;

Bo n’abaana baabwe baliddamu amaanyi ne bakomawo.

10 Ndibakomyawo okuva mu nsi ya Misiri,

Era ndibakuŋŋaanya wamu okuva mu Bwasuli;+

Ndibatwala mu nsi ya Gireyaadi+ ne Lebanooni,

Era ekifo tekiribamala.+

11 Aliyita mu nnyanja n’agitabangula;

Era alikuba amayengo g’ennyanja;+

N’obuziba bwonna obwa Kiyira bulikalira.

Amalala ga Bwasuli galikkakkanyizibwa,

Ne ddamula ya Misiri erivaawo.+

12 Nze Yakuwa ndibafuula ba maanyi,+

Era balitambulira mu linnya lyange,’+ Yakuwa bw’agamba.”