1 Ebyomumirembe Ekisooka
10 Awo Abafirisuuti ne balwana ne Isirayiri; abasajja Abayisirayiri ne badduka Abafirisuuti, era bangi battirwa ku Lusozi Girubowa.+ 2 Abafirisuuti ne basemberera Sawulo ne batabani be, era Abafirisuuti ne batta Yonasaani ne Abinadaabu ne Malukisuwa,+ batabani ba Sawulo. 3 Olutalo ne luzitoowerera nnyo Sawulo; abalasi b’obusaale ne bamulaba ne bamutuusaako ebisago.+ 4 Sawulo n’agamba oyo eyamusituliranga eby’okulwanyisa nti: “Sowolayo ekitala kyo onfumite, abasajja abo abatali bakomole baleme kujja bantulugunye.”+ Naye oyo eyamusituliranga eby’okulwanyisa n’agaana kubanga yali atidde nnyo. Awo Sawulo n’akwata ekitala n’akigwako.+ 5 Oyo eyasitulanga eby’okulwanyisa bya Sawulo bwe yalaba nga Sawulo afudde, naye n’agwa ku kitala kye n’afa. 6 Bw’atyo Sawulo n’afa ne batabani be basatu, era n’ab’omu nnyumba ye bonna abaali naye.+ 7 Abantu ba Isirayiri bonna abaali mu kiwonvu bwe baalaba ng’abalwanyi bonna badduse era nga Sawulo ne batabani be bafudde, ne bava mu bibuga byabwe ne badduka; Abafirisuuti ne bajja ne babibeeramu.
8 Ku lunaku olwaddako, Abafirisuuti bwe baagenda okunyaga ebintu by’abo abaali battiddwa, ne basanga omulambo gwa Sawulo n’egya batabani be ku Lusozi Girubowa.+ 9 Ne bamwambula ne bamutemako omutwe, ne batwala n’ebyambalo bye eby’olutalo,* era ne baweereza obubaka mu nsi y’Abafirisuuti yonna okutegeeza ebifaananyi byabwe+ n’abantu amawulire ago. 10 Ne bateeka ebyambalo bye eby’olutalo* mu nnyumba* ya katonda waabwe, era ne basiba omutwe gwe mu nnyumba ya Dagoni.+
11 Abo bonna abaali babeera e Yabesi+ mu Gireyaadi bwe baawulira ebyo byonna Abafirisuuti bye baali bakoze Sawulo,+ 12 abalwanyi bonna ne basituka ne bagenda ne baggyayo omulambo gwa Sawulo n’emirambo gya batabani be, ne bagitwala e Yabesi ne baziika amagumba gaabwe wansi w’omuti omunene mu Yabesi,+ era ne basiiba okumala ennaku musanvu.
13 Bw’atyo Sawulo n’afa olw’obutaba mwesigwa eri Yakuwa, kubanga teyagondera kigambo kya Yakuwa+ era yeebuuza ne ku mulubaale+ 14 mu kifo ky’okwebuuza ku Yakuwa. Katonda kyeyava amutta, obwakabaka n’abuwa Dawudi mutabani wa Yese.+