1 Ebyomumirembe Ekisooka
20 Ku ntandikwa y’omwaka, ekiseera bakabaka we bagendera okutabaala, Yowaabu+ yakulembera amagye n’ayonoonayonoona ensi y’Abaamoni, era n’azingiza Labba+ nga Dawudi asigadde e Yerusaalemi;+ Yowaabu yalwanyisa Labba n’akizikiriza.+ 2 Oluvannyuma Dawudi yaggya engule ku mutwe gwa Malukamu,* era n’akisanga nti engule eyo yali ezitowa ttalanta* emu eya zzaabu; yalimu amayinja ag’omuwendo era yateekebwa ku mutwe gwa Dawudi. Ate era Dawudi yaggya omunyago mungi nnyo mu kibuga.+ 3 Abantu abaakirimu yabaggyamu n’abakozesa emirimu+ egy’okusala amayinja n’emirimu egyetaagisa okukozesa ebintu ebyogi eby’ekyuma n’embazzi; bw’atyo Dawudi bwe yakola mu bibuga byonna eby’Abaamoni. Oluvannyuma Dawudi n’abasirikale bonna baddayo e Yerusaalemi.
4 Oluvannyuma lw’ebyo, waabalukawo olutalo e Gezeri wakati w’Abayisirayiri n’Abafirisuuti. Sibbekayi+ Omukusa n’atta Sippayi, omu ku bazzukulu b’Abaleefa,+ Abafirisuuti ne bawangulwa.
5 Awo ne wabaawo nate olutalo n’Abafirisuuti; Erukanani mutabani wa Yayiri n’atta Lakami muganda wa Goliyaasi+ Omugitti. Olunyago lw’effumu lya Lakami lwali ng’omuti okulukirwa engoye.+
6 Awo ne wabaawo nate olutalo mu Gaasi,+ era waaliyo omusajja omuwagguufu ennyo+ eyalina engalo 6 ku buli mukono n’obugere 6 ku buli kigere, nga byonna awamu biri 24; oyo naye yali muzzukulu w’Abaleefa.+ 7 Yasoomoozanga+ Isirayiri, naye Yonasaani mutabani wa Simeeya+ muganda wa Dawudi n’amutta.
8 Abo baali bazzukulu b’Abaleefa+ abaali mu Gaasi,+ era battibwa Dawudi n’abaweereza be.