Oluyimba lwa Sulemaani
8 “Singa wali nga mwannyinaze,
Eyayonka amabeere ga mmange!
Bwe nnandikusanze ebweru, nnandikunywegedde,+
Era tewali yandinnyoomye.
Nnandikuwadde omwenge oguteereddwamu ebirungo n’onywa,
N’omubisi ogusogoddwa mu nkomamawanga.
3 Omukono gwo ogwa kkono gwandibadde wansi w’omutwe gwange,
N’omukono gwo ogwa ddyo gwandimpambaatidde.+
4 Mmwe abawala ba Yerusaalemi mbalayiza:
Temugolokosanga kwagala kwange newakubadde okukuzuukusa okutuusa we kulyagalira.”+
5 “Ani oyo ava mu ddungu,
Nga yeesigamye ku mwagalwa we?”
“Nnakuzuukusa ng’oli wansi w’omuti gwa apo.
Awo nnyoko we yalumirwa ng’akuzaala.
Awo ebisa we byalumira eyakuzaala.
6 Nteeka ku mutima gwo ng’akabonero,
Nteeka ku mukono gwo ng’akabonero,
Kubanga okwagala kwa maanyi ng’okufa,+
Era obwesigwa bunywereza ddala ng’amagombe.*
Okwagala kulinga ennimi z’omuliro ogubumbujja, ennimi z’omuliro gwa Ya.*+
Omuntu ne bwe yandiwaddeyo obugagga bwonna obw’omu nnyumba ye olw’okwagala,
Bwandibadde bunyoomebwa* nnyo.”
8 “Tulina mwannyinaffe omuto,+
Atannasuna mabeere.
Tulimukolera ki
Ku lunaku lwe balimwogereza?”
9 “Bw’aba bbugwe,
Tujja kumuzimbako omuziziko ogwa ffeeza,
Naye bw’aba luggi,
Tulimukubako olubaawo olw’entolokyo.”
10 “Ndi bbugwe,
N’amabeere gange galinga eminaala.
N’olwekyo mu maaso ge nninga
Omuntu afunye emirembe.
11 Sulemaani yalina ennimiro y’emizabbibu+ mu Bbaali-Kamooni.
Ennimiro eyo yagikwasa abantu bagirabirire.
Olw’ebibala ebyalimu, buli omu ku bo yaleetanga ebitundu bya ffeeza lukumi.
12 Ennimiro yange ey’emizabbibu yange.
Ggwe Sulemaani, ebitundu bya ffeeza olukumi bibyo,*
Ate ebitundu bya ffeeza ebikumi ebibiri by’abo abagirabirira.”
13 “Ggwe abeera mu nnimiro,+
Bannange balindiridde okuwulira eddoboozi lyo.
Nange ka ndiwulire.”+
14 “Omwagalwa wange, yanguwa,
Era wenyuka ng’enjaza+
Oba ng’empeewo ento
Ku nsozi eziriko ebimera eby’akaloosa.”