2 Ebyomumirembe Eky’Okubiri

15 Awo omwoyo gwa Katonda ne gujja ku Azaliya mutabani wa Odedi. 2 N’agenda mu maaso ga Asa n’amugamba nti: “Ggwe Asa ne Yuda yonna ne Benyamini, mumpulirize! Yakuwa ali nammwe singa nammwe muba naye;+ bwe munaamunoonya ajja kukkiriza mumuzuule;+ naye bwe munaamuvaako naye ajja kubavaako.+ 3 Isirayiri yamala ekiseera kiwanvu* nga terina Katonda ow’amazima, nga terina kabona ayigiriza, era nga terina mateeka.+ 4 Naye bwe baali mu nnaku ne badda eri Yakuwa Katonda wa Isirayiri ne bamunoonya, yakkiriza ne bamuzuula.+ 5 Mu kiseera ekyo tewaali muntu yali ayinza kutambula mirembe,* kubanga obutabanguko bwali bungi mu bantu bonna ab’omu nsi. 6 Eggwanga lyazikirizibwanga eggwanga eddala, n’ekibuga kyazikirizibwanga ekibuga ekirala, kubanga Katonda yabaleka okubeera mu butabanguko ne balaba ennaku eya buli ngeri.+ 7 Naye mmwe, mubeere bavumu era temuggwaamu maanyi,*+ kubanga mujja kuweebwa empeera olw’ebyo bye mukola.”

8 Asa olwawulira ebigambo ebyo n’obunnabbi bwa nnabbi Odedi, n’afuna obuvumu n’aggyawo ebifaananyi ebyenyinyaza ebyali mu nsi yonna eya Yuda+ ne Benyamini ne mu bibuga bye yali awambye mu kitundu kya Efulayimu eky’ensozi, era n’azzaawo ekyoto kya Yakuwa ekyali mu maaso g’ekisasi ky’ennyumba ya Yakuwa.+ 9 N’akuŋŋaanya Yuda yonna ne Benyamini n’abagwira bonna abaali mu bo abaava mu Efulayimu ne Manase ne Simiyoni,+ kubanga bangi nnyo baali bavudde mu Isirayiri ne bamwegattako, bwe baalaba nga Yakuwa Katonda we ali naye. 10 Ne bakuŋŋaanira e Yerusaalemi mu mwezi ogw’okusatu mu mwaka ogw’ekkumi n’etaano ogw’obufuzi bwa Asa. 11 Ku lunaku olwo ne bawaayo ssaddaaka eri Yakuwa okuva ku munyago gwe baali baleese, ente 700 n’endiga 7,000. 12 Ate era baakola endagaano okunoonya Yakuwa Katonda wa bajjajjaabwe n’omutima gwabwe gwonna n’obulamu bwabwe bwonna.+ 13 Omuntu yenna atandinoonyezza Yakuwa Katonda wa Isirayiri yali wa kuttibwa, k’abe muto oba mukulu,* musajja oba mukazi.+ 14 Ne balayira eri Yakuwa nga boogerera waggulu, nga bakuba emizira, era nga bafuuwa amakondeere n’eŋŋombe. 15 Ab’omu Yuda bonna ne basanyuka olw’ekyo kye baalayira, kubanga baalayira n’omutima gwabwe gwonna, era baamunoonya n’obumalirivu n’akkiriza ne bamuzuula;+ era Yakuwa n’ayongera okubawa ekiwummulo ku njuyi zonna.+

16 Ate era Kabaka Asa yagoba Maaka+ jjajjaawe ku bwa nnamasole, kubanga yali akoze ekifaananyi ekyesisiwaza ekyakozesebwanga mu kusinza ekikondo ekisinzibwa.*+ Asa yatemaatema ekifaananyi ekyo n’akibetenta n’akyokera mu Kiwonvu Kidulooni.+ 17 Naye ebifo ebigulumivu tebyaggibwa+ mu Isirayiri.+ Kyokka Asa yaweereza n’omutima gwe gwonna, obulamu bwe bwonna.*+ 18 Yaleeta mu nnyumba ya Katonda ow’amazima ebintu ye ne kitaawe bye baatukuza—ffeeza, zzaabu, n’ebintu ebikozesebwa ebitali bimu.+ 19 Tewaaliwo lutalo lwonna okutuusa mu mwaka ogw’asatu mu etaano ogw’obufuzi bwa Asa.+