Kye Tuyigira ku Nnukuta y’Olwebbulaniya Esinga Obutono

Ddala tusobola okuba abakakafu nti ebisuubizo bya Katonda byonna bijja kutuukirira? Yesu yali mukakafu ku ekyo, era ebyo bye yayigiriza byanyweza okukkiriza kw’abantu abaamuwulirizanga. Lowooza ku bigambo bye ebiri mu Matayo 5:18. Yagamba nti: “Mazima ddala mbagamba nti, eggulu n’ensi ne bwe biggwaawo, ennukuta esinga obutono oba akatundu k’ennukuta ey’omu Mateeka tebiriggwaawo okutuusa ng’ebintu bino byonna bituukiriziddwa.”

Ennukuta esinga obutono mu walifu y’Olwebbulaniya y’eno י era eyitibwa yod. Ennukuta eyo y’esooka mu linnya lya Katonda Yakuwa,a nga liwandiikiddwa mu Lwebbulaniya. Buli nnukuta mu Mateeka ga Katonda, Abawandiisi n’Abafalisaayo baagitwalanga nga nkulu nnyo.

Yesu yali ategeeza nti kyangu eggulu n’ensi okuggwaawo okusinga ennukuta esingayo obutono mu Mateeka obutatuukirira. Kyokka Ebyawandiikibwa bitukakasa nti eggulu n’ensi bijja kubeerawo emirembe gyonna. (Zabbuli 78:69) Ekyo kiraga nti tewali kintu kyonna ekyawandiikibwa mu Mateeka ekitajja kutuukirira, ka kibe kitono kitya.

Yakuwa Katonda afaayo ne ku bintu ebirabika ng’ebitali bikulu nnyo. Lowooza ku kino: Abayisirayiri ab’edda baagambibwa nti tebaalina kumenya ggumba lyonna ery’omwana gw’endiga ey’Okuyitako. (Okuva 12:46) Ekyo kirabika ng’ekitali kikulu nnyo. Oboolyawo Abayisirayiri tebaategeera nsonga lwaki Katonda yabagamba obutamenya ggumba lyonna. Naye Katonda yali akimanyi nti ekyo ekyali kirabika ng’ekitali kikulu nnyo kyali kisonga ku ekyo ekyandituuse ku Masiya, nti tewali na limu ku magumba ge eryandimenyeddwa ng’akomereddwa ku muti.​—Zabbuli 34:20; Yokaana 19:31-33, 36.

Ebigambo bya Yesu ebiri mu Matayo 5:18 bituyigiriza nti buli kimu Katonda kye yasuubiza kijja kutuukirira, ka kibe kitono kitya.