Okutuukiriza Obulungi Obuweereza Bwaffe—Okuyambako Oyo gw’Oba Obuulira Naye

Lwaki Kikulu: Yesu yali akimanyi nti kya muganyulo nnyo omubuulizi okubaako gw’abuulira naye. Eyo ye nsonga lwaki bwe yali atuma abayigirizwa be 70 okugenda okubuulira, yabatuma babiri babiri. (Luk. 10:1) Oyo gw’oba obuulira naye asobola okukuyamba singa ofuna ekizibu oba singa oba tomanyi ngeri ya kuddamu kibuuzo ky’oyo gwe muba mubuulira. (Mub. 4:9, 10) Asobola okukubuulirako ku ebyo ebimuyambye mu buweereza bwe naawe ebisobola okukuyamba. (Nge. 27:17) Ate era by’ayogera nga munyumya naye biyinza okukuzzaamu amaanyi.—Baf. 4:8.

Engeri y’Okukikolamu:

Munno bw’aba alina gw’ayogera naye, wuliriza bulungi. (Yak. 1:19) Bw’aba asoma ekyawandiikibwa, goberera mu Bayibuli yo. Ekyo kikusobozesa okumuyambako bwe kiba kyetaagisa.
Kozesa amagezi okumanya lwe kyetaagisa okubaako ky’oyogera. (Nge. 25:11) Oyo gw’oba obuulira naye bw’aba ayigiriza omuyizi we, osobola okubaako by’oyongerezaako bwe kiba kyetaagisa. Naye, bwe muba mubuulira nnyumba ku nnyumba, kiba kirungi okuleka munno n’ayogera n’omuntu bwe kiba nti y’alina okwogera. Wadde kiri kityo, bw’aba mubuulizi mupya oba bw’aba teyekakasa ngeri ya kuddamu kibuuzo ekibuuziddwa, oyinza okumuyambako. Kyokka, bwe muba mubuulira nnyumba ku nnyumba, nga muzzeeyo eri oyo eyasiima obubaka bwaffe, oba nga muyigiriza omuyizi, tosala munno kirimi, teweefuga mboozi, era weewale okwogera ebitakwatagana n’ekyo kye muba mwogerako.
Buulirako munno ku ebyo ebikuyambye mu buweereza bwo. Oluusi bw’oba olina amagezi g’oyagala okuwa oyo gw’oba obuulira naye agayinza okumuyamba mu buweereza bwe, totya kugamuwa. (Nge. 3:27) Mu kiseera ekituufu, oyinza okumugamba nti: “Olowooza ennyanjula eyo ebadde etya?” oba “Wali ogezezzaako amagezi gano . . . ?” oba “Nze ntera kukola bwe nti . . .” Kijjukire nti babuulizi bannaffe basiima bwe tubawabula, naye bwe tubawabula buli kiseera bayinza okuggwaamu amaanyi.

Mu Mwezi Guno Gezaako Kino:

Bwe muba mumaze okubuulira, oyo gw’obuulidde naye mubuulire engeri gy’akuyambyemu era omwebaze.