Miˬ guiˬ awˬ suhˉ hkʼaw lo gawˬ lehˍ ve a shaꞈ
Liꞈ kʼoˆ ehˉ chi ve awˬ hkʼaw lo awˬ han htaꞈ mawˬ ve teˇ yanˇ, nawˬ hkʼaˬ hkʼe dawˇ le? Awˬ han chi ve htaꞈ mawˬ ve hkʼa shuˍ gawˬ lehˍ dawˇ sha leh hpehꞈ sha ve htaꞈ nawˬ loˍ ve maˇ heˆ laˇ? Yoˬ. Yaꞈ hkʼaˇ, miˬ guiˬ hkʼoˆ lo chi hkʼa shuˍ hpehꞈ la gʼa tuˬ yonˍ ve zuhꞈ maˆ ve hkʼe ceh hpehꞈ ve hehˉ laˇ?
Chaw maˇ˗awˍ ve chi hkʼe dawˇ ve yoˬ. Teˇ nyi le le hpehꞈ chehˇ ve hkʼe bawˆ daꞈ ve, yaꞈ daꞈ ve, meuꞈ ve kaˆ ve, naˬ gawˬ ve, mawˇ kʼai ve,—choˬ kaˬ lo kʼoˆ taˍ ve lehˬ hkʼaˬ nyiˇ ceuˬ maˇ heˆ sheˍ. Yaꞈ hkʼaˇ, dawˇ law kuiˬ awˬ hkʼaˇ cawˬ ve yoˬ. Awˬ gʼuˇ suhˍ hpawˇ hpehꞈ la tuˬ ve htaꞈ, Liꞈ hpu hkʼaw lo chi hkʼe kʼoˆ ve: “Gʼuiˬ sha yawˇ ka tiꞈ cawˬ taˍ ve hkʼe, mvuhˇ naw ma awˬ suhˉ leh miˬ guiˬ awˬ suhˉ cawˬ la tuˬ ve htaꞈ ngaˬ hui dawˇ law chehˇ ve yoˬ. Oˇ kaˬ lo hteˇ ve cawˇ ve awˬ ceuˬ ceh tiˉ cawˬ tuˬ yoˬ.”—2 Peˍtruˆ 3:13; Iˉsaˍyaˆ 65:17.
Liꞈ hpu awˬ hkʼaw lo bvuhꞈ taˍ ve hkʼe, “Mvuhˇ naw ma awˬ suhˉ” leh “miˬ guiˬ awˬ suhˉ” mvuhˇ naw ma awˬ tehˬ leh miˬ guiˬ awˬ tehˬ ve htaꞈ kʼoˆ ve maˇ heˆ. Awˬ tehˬ ve miˬ guiˬ leh mvuhˇ naw ma htaꞈ hkʼa dehꞈ daꞈ lehˬ hpanˍ taˍ peuˬ. Liꞈ hpu hkʼaw kʼoˆ ve, awˬ ceuˬ chi hkʼa peu˗eˬ hkʼaˬ htaˆ kaꞈ yeˬ chehˇ tuˬ yoˬ. (Chiˇ mvuh ve 89:36, 37; 104:5) “Miˬ guiˬ awˬ suhˉ” hteˇ ve cawˇ ve chaw yaˇ chi miˬ guiˬ hkʼoˆ lo chehˇ tuˬ ve htaꞈ kʼoˆ ve yoˬ. “Mvuhˇ naw ma awˬ suhˉ” mvuhˇ naw ma hkʼoˆ lo cawˬ ve Gʼuiˬ sha ve mvuhˇ miˬ biˇ jaˇ ve, maˇ heˆ leh, laˇhtaˇbanˇ (a coˉ yaꞈ) chi miˬ guiˬ hkʼoˆ chehˇ ve chaw yaˇ awˬ hkʼoˆ lo uˉ peunˍ ve htaꞈ kʼoˆ ve yoˬ. Yaꞈ hkʼaˇ, “miˬ guiˬ awˬ suhˉ” chi ve hpehꞈ kʼai gʼa tuˬ awˬ hkʼaˇ cawˬ˗aw laˇ?
Awˬ tehˬ kʼoˆ taˍ ve htaꞈ nyi sheˍ. Miˬ guiˬ hkʼoˆ chehˇ sha cawˬ sha ve a shaꞈ chi hkʼe hpehꞈ tuˬ, awˬ hkuiˉ puiˍ htaˇ kaꞈ Gʼuiˬ sha dawˇ taˍ ve yoˬ. Yawˇ lehˬ awˉ lawˉ peuˇ chaw yaˇ teˇ ceh htaꞈ Eˍdenˍ hko hkʼaw lo chehˇ tcuh leh, daꞈ jaˇ ve kanˉ teˇ hpaˍ yawˇ hui htaꞈ te tcuh ve yoˬ. “Yaˇ maˇ maˇ paw la leh, miˬ guiˬ hkʼoˆ lo biˇ la piˇ˗oˆ. Miˬ guiˬ hkʼa peu˗eˬ hkʼoˆ uˉ peunˍ chehˇ˗o.” (Awˬ hkuiˉ puiˍ 1:28, MGS) Yoˬ, yawˇ hui awˬ yaˇ awˬ duˬ cawˬ maˇ la leh, miˬ guiˬ chi hkʼoˆ hkʼa caw zuhˇ daꞈ jaˇ ve hko te kʼai tuˬ Gʼuiˬ sha dawˇ taˍ ve yoˬ. Yaꞈ hkʼaˇ, awˬ hkʼawꞈ nawˉ htaˇ, chaw yaˇ Gʼuiˬ sha ve hkawˇ htaꞈ maˇ na yuˬ. Hkʼe htaꞈ pa taw, co co taiˍ taiˍ a shaꞈ teꞈ chehˇ tuˬ maˇ keunˍ ve yoˬ. Hkʼaˬ hkʼe hpehꞈ htawˇ, awˬ hkuiˉ puiˍ htaˇ Gʼuiˬ sha dawˇ taˍ ve hkʼe, Gʼuiˬ sha maˇ pa. Miˬ guiˬ awˬ suhˉ awˬ tehˬ kʼawꞈ hpehꞈ la tuˬ yoˬ.—Iˉsaˍyaˆ 55:11.
Jawˇmawˇ Yeˍsuˆ maˍ laˇ ve bon lawˬ hkawˇ htaꞈ nawˬ lawˬ ve teˇ yanˇ, Gʼuiˬ sha ve mvuhˇ miˬ gaˬ la tuˬ htaꞈ lawˬ ve yoˬ. Awˬ tehˬ kʼoˆ kʼo, mvuhˇ naw ma hkʼoˆ chehˇ ve laˇhtaˇbanˇ chi ve, miˬ guiˬ hkʼoˆ haiˬ ve awˬ ceuˬ htaꞈ yuˬ baˬ leh uˉ peunˍ la tuˬ ve htaꞈ nawˬ htawˇ lawˬ chehˇ ve yoˬ. (Maꞈhtehˍ 6:9) Bon lawˬ ve hkʼe, Gʼuiˬ sha hkʼawꞈ laˇ tuˬ ve htaꞈ yonˍ hpehꞈ ve yoˬ. Awˬ lawn kʼo, Gʼuiˬ sha ka tiꞈ chi hkʼe te taˍ laˇ ve, “Hteˇ ve cawˇ ve chaw hui lehˬ, miˬ guiˬ hkʼoˆ lo gʼa chehˇ leh, oˇ kaˬ lo co co taiˍ taiˍ gʼa chehˇ tuˬ yoˬ.”—Chiˇ mvuh ve 37:29, MGS.
Gʼuiˬ sha ve miˬ guiˬ suhˉ awˬ hkʼaw lo ve a shaꞈ
Gʼuiˬ sha ve mvuhˇ miˬ uˉ peunˍ ve miˬ guiˬ hkʼoˆ lo awˬ bon awˬ shinˉ hkʼa biˇ ngaˬ hui ca dawˇ maˇ gaˬ htaˇ hkʼa gaˬ naꞈ laˇ tuˬ ve yoˬ. Awˬ hkuiˉ puiˍ htaˇ kaꞈ Gʼuiˬ sha dawˇ taˍ ve hkʼa shuˍ miˬ guiˬ chi hkʼoˆ yawˇ ve chaw teˇ hpaˍ htaꞈ daꞈ ve awˬ ceuˬ ceh tiˉ naꞈ piˇ tuˬ yoˬ. Nyi bawˬ ve leh, nyi cha daꞈ ve awˬ ceuˬ htawˇ, maˇ kʼawꞈ cawˬ˗o. Awˬ leh meuˇ kʼo, miˬ guiˬ hkʼoˆ ve chaw hkʼa peu˗eˬ teˇ gʼaˇ leh teˇ gʼaˇ awˬ tehˬ ve awˬ chawˇ hpehꞈ ve yoˬ. Liꞈ hpu hkʼaw lo Gʼuiˬ sha ka tiꞈ te taˍ laˇ ve “Miˬ guiˬ hkʼoˆ lo bawˆ daꞈ chaw daꞈ ve hkʼa peu˗eˬ htaꞈ yawˇ tawˍ taˍ ve yoˬ.” “Chaw ceuˬ teˇ hpaˍ lehˬ, teˇ pawˆ kaꞈ maꞈ maˇ kʼawꞈ bawˆ daꞈ leh, maꞈ bawˆ tuˬ teˇ pawˆ kaꞈ kʼawꞈ gu tuˬ ve maˇ heˆ.”—Chiˇ mvuh ve 46:9; Iˉsaˍyaˆ 2:4.
Awˬ leh meuˇ gaˬ kʼo, miˬ guiˬ chi hkʼa peu˗eˬ daꞈ jaˇ ve hko awˬ tehˬ awˬ na hpehꞈ tuˬ yoˬ. Liꞈ hpu hkʼaw chi hkʼe kʼoˆ ve, “Hehˆ puiˉ hkʼaw lonˉ teˇ hpaˍ ha lehˬ leh, suhˉ veˆ teˇ hpaˍ lehˬ, gawˬ cu gawˬ pehˆ ve mvuhˇ miˬ hkʼaw veˆ tawˆ la tuˬ yoˬ . . . shehˇ de hkʼaw lo, iˉ kaˆ gʼuiˬ tuˇ teˇ hpaˍ tawˆ la tuˬ yoˬ. Chiˆ jaˇ ve shehˇ de lehˬ, iˉ kaˆ gʼuiˬ po kʼawꞈ hpehꞈ la leh, goˇ choˆ ve mvuhˇ miˬ hkʼaw iˉ kaˆ gʼuiˬ tuˇ maˇ maˇ tawˆ la tuˬ yoˬ.”—Iˉsaˍyaˆ 35:1, 6, 7.
Miˬ guiˬ hkʼoˆ daꞈ jaˇ ve hko hpehꞈ ve awˬ hkʼaw lo teˇ gʼaˇ le le htawˇ ha lehˬ tuˬ awˬ hkʼaˇ cawˬ ve yoˬ. Chaw yaˇ caˇ tuˬ maˇ cawˬ leh, meuꞈ ve kaˆ ve htawˇ, maˇ kʼawꞈ cawˬ. Liꞈ hpu hkʼaw kʼoˆ ve, “Miˬ guiˬ lehˬ, awˬ shiˍ awˬ nu teˇ hpaˍ tawˆ la piˇ taˍ peuˬ.” (Chiˇ mvuh ve 67:6; 72:16) Ngaˬ hui ve Gʼuiˬ sha ka tiꞈ te taˍ laˇ ve hkʼa shuˍ teˇ gʼaˇ le le htawˇ a shu yawˇ ve kanˉ htaꞈ gʼa ha lehˬ tuˬ yoˬ. “Yawˇ hui te taˍ ve a pehˉ meuˇ hko yawˇ hui gʼa caˇ tuˬ yoˬ . . . yawˇ hui te taˍ ve a pehˉ meuˇ hko shu caˇ tuˬ ve maˇ heˆ.”—Iˉsaˍyaˆ 65:21, 22, MGS.
Gʼuiˬ sha ve miˬ guiˬ suhˉ awˬ hkʼaw lo teˇ gʼaˇ le le shu ve yehˬ htaꞈ cehˍ cehˍ nuˆ nuˆ te ngaˍ chehˇ tuˬ kaꞈ maˇ loˍ, maˇ heˆ leh chaꞈ chiˆ ve awˬ ti lo ca chehˇ tuˬ kaꞈ maˇ loˍ. Awˬ lawn kʼo, Gʼuiˬ sha chi hkʼe te tuˬ dawˇ taˍ ve yoˬ. “Yawˇ hui te taˍ ve yehˬ yawˇ hui chehˇ tuˬ yoˬ. . . . yawˇ hui yehˬ te leh shu chehˇ ve maˇ heˆ.” Liꞈ hpu hkʼaw ka tiꞈ kʼawꞈ te taˍ laˇ ve, “Yawˇ hui te ve kanˉ teˇ hpaˍ a hkʼe leˇ maˇ heˆ.” (Iˉsaˍyaˆ 65:21-23, MGS) Hkʼe htaꞈ pa taw, teˇ gʼaˇ le le te taˍ ve kanˉ htaꞈ nyi hkʼaˇ suh ve hkʼe uiˍ la piˇ ve yoˬ. Hpehꞈ bawˬ ve htawˇ maˇ kʼawꞈ cawˬ.
Awˬ yanˇ gaˬ la ve teˇ yanˇ, Gʼuiˬ sha ve mvuhˇ miˬ awˬ hkʼaw lo chaw yaˇ leh, to nuˇ to shaˆ awˬ kaˬ lo gawˬ lehˍ kʼawꞈ cawˬ piˇ tuˬ yoˬ. Eˍdenˍ hko hkʼaw lo oˇ hkʼe hpehꞈ jaw ve yoˬ. Liꞈ hpu hkʼaw kʼoˆ ve, “Heh hpuiˇ leh yawˬ ehˉ teˇ hpaˍ teˇ geh gawˬ lehˍ chehˇ tuˬ yoˬ. Laˇ teˇ hpaˍ lehˬ, aˉ cheꞈ ehˉ teˇ hpaˍ geh zuhꞈ chehˇ taˍ tuˬ yoˬ. Nuˇ yehˇ leh laˇ caˬ shiˉ yehˇ teˇ hpaˍ teˇ geh kʼaˆ caˇ chehˇ leh, yaˇ ehˉ teˇ hpaˍ yawˇ hui htaꞈ haꞈ shaˉ piˇ tuˬ yoˬ.”—Iˉsaˍyaˆ 11:6-9; Hawˇseˍ 2:18.
Nawˬ dawˇ nyi sheˍ daꞈ jaˇ ve hko hpehꞈ ve miˬ guiˬ chi hkʼoˆ naˬ gawˬ ve leh hkui hteh mehˆ cuˉ ve teˇ ceuˬ le le htaꞈ htawˇ, gu na˗e peuˬ piˇ tuˬ yoˬ! Gʼuiˬ sha ve tawˇ hkʼawˇ chi hkʼe kʼoˆ taˍ ve, “Ngaˬ hui ve mvuhˇ miˬ hkʼaw chehˇ taˍ ve chaw teˇ hpaˍ lehˬ, naˬ ve gawˬ ve htaꞈ pa taw teˇ pawˆ kaꞈ gʼa kʼawꞈ hkʼanˇ tuˬ ve maˇ heˆ.” (Iˉsaˍyaˆ 33:24) “[Gʼuiˬ sha lehˬ] yawˇ hui ve mehˆ gʼuiˬ hkʼa peu˗eˬ htaꞈ shiˆ baˬ piˇ tuˬ yoˬ. Suh ve teˇ ceuˬ maˇ kʼawꞈ cawˬ. Dawˇ haˍ ve, paˆ hawˬ ve, naˬ ve, awˬ ceuˬ chi teˇ hpaˍ htawˇ maˇ kʼawꞈ cawˬ. Awˬ lawn kʼo, awˉ lawˉ htaˇ cawˬ ve awˬ ceuˬ teˇ hpaˍ mehˉ kʼai peuˬ.”—Hpeuꞈ maˍ ve 21:4.
Nawˬ te cawˇ ve awˬ ceuˬ
Gʼuiˬ sha ka tiꞈ te taˍ laˇ ve, miˬ guiˬ suhˉ awˬ hkʼaw lo hteˇ cawˇ ve a shaꞈ htaꞈ caˉ daꞈ ve awˬ ceuˬ nawˬ shiˍ ve teˇ yanˇ, nawˬ htawˇ ha lehˬ jaˇ tuˬ yoˬ. Chaw teˇ hpaˍ hpaˍ Gʼuiˬ sha naꞈ laˇ ve awˬ bon htaꞈ awˬ tehˬ hpehꞈ kʼai maˇ gʼa tehꞈ dawˇ ve yoˬ. Yaꞈ hkʼaˇ, haꞈ pehnˇ uiˍ ve ngaˬ hui ve Gʼuiˬ sha lehˬ, awˬ ceuˬ chi teˇ hpaˍ htaꞈ te tuˬ haˍ ve maˇ heˆ.—Chiˇ mvuh ve 145:16; Miˆhkaˍ 4:4.
Maˇ maw maw kʼo, miˬ guiˬ chi hkʼoˆ cawˬ la tuˬ ve daꞈ jaˇ ve hko hkʼaw ngaˬ hui co co taiˍ taiˍ a shaꞈ teꞈ chehˇ gaˇ ve kʼo, Gʼuiˬ sha loˍ ve hkʼe gʼa te gʼa ve yoˬ. Gʼuiˬ sha geh bon lawˬ ve teˇ yanˇ, a yeˇ uiˍ ve awˬ ceuˬ htaꞈ Yeˍsuˆ Hkriꞈ chi hkʼe beˆ maˍ laˇ ve, “Co co taiˍ taiˍ ve a shaꞈ htaꞈ gʼa tuˬ awˬ tehˬ awˬ na ve Gʼuiˬ sha teˇ gʼaˇ tiˉ leh, yawˇ peu laˇ ve Yeˍsuˆ Hkriꞈ ve awˬ lawn htaꞈ yawˇ hui hkʼaˬ htaˆ kaꞈ gʼa henˇ chehˇ ve yoˬ.”—Yoˇhanˬ 17:3, MGS.
Hkʼe htaꞈ pa taw, Gʼuiˬ sha ve miˬ guiˬ suhˉ awˬ hkʼaw lo ngaˬ hui chehˇ gaˇ tehˬ ve kʼo, Gʼuiˬ sha a loˍ cawˇ ve awˬ ceuˬ htaꞈ awˉ lawˉ henˇ leh te cawˇ ve yoˬ. Awˬ lawn kʼo, awˬ tehˬ kʼoˆ taˍ ve hkʼe, “Miˬ guiˬ leh, miˬ guiˬ htaꞈ caˉ daꞈ ve heuˆ gaˇ ve teˇ hpaˍ lehˬ, mehˉ kʼai tuˬ yoˬ. Yaꞈ hkʼaˇ, Gʼuiˬ sha ve a loˍ htaꞈ te ve chaw teˇ gʼaˇ lehˬ, co co taiˍ taiˍ gʼa teꞈ chehˇ tuˬ yoˬ,” leh haꞈ pehnˇ uiˍ ve Gʼuiˬ sha awˬ bon naꞈ laˇ ve teˇ hpaˍ awˬ hkʼaw lo gʼa ha lehˬ tuˬ yoˬ.—1 Yoˇhanˬ 2:17, MGS.
Awˬ kaˬ awˬ nu awˬ heˆ te taˍ ve maˇ heˆ kʼo, Liꞈ hpu teˇ tawn le le Lahu Bible (TBS-1997) hkʼaw yuˬ tawˆ taˍ ve yoˬ. MGS te taˍ ve liꞈ mehˆ chi htaꞈ mawˬ kʼo Daꞈ Kehˬ ve Liꞈ Hpu Miˬ Guiˬ Suhˉ awˬ hkʼaw lo ve (Kaˇlaˇhpu hkawˇ) htaꞈ yuˬ tawˆ taˍ ve tehꞈ kʼoˆ gaˇ ve yoˬ.