Hkriꞈ yaˇ ve a shaꞈ teꞈ hkʼaˇ
Ngaˬ hui Gʼuiˬ sha ve kanˉ te cheuˬ la ve awˬ hkʼaˇ—Tawˇ yaw tuˬ awˬ hkʼeun hkʼaw hto toˇ ve
Aˬ htoꞈ ma te a yeˇ uiˍ ve le?: Daꞈ ve awˬ lawn sha tanˇ teˇ kaˬ le le hto maˍ gʼa tuˬ, tawˇ yaw tuˬ awˬ hkʼeun hkʼaw hto toˇ ve lehˬ, a yeˇ uiˍ jaˇ ve teˇ hkʼaˇ hpehꞈ ve yoˬ. (Tcuh 20:24)a Awˬ hkʼaˇ chi lehˬ shu htaꞈ maˇ gʼa mawˬ daꞈ ve htawˇ, daꞈ ve awˬ lawn sha tanˇ hto piˇ gʼa tuˬ ga laˇ ve yoˬ.
Ngaˬ hui hkʼaˬ hkʼe te tuˬ le?:
Gu ve. Keunˍ ve awˬ lawn htaꞈ leuˆ sheˍ. Kʼoˆ maˍ ve chi suhˉ˗ehˍ bvuhꞈ teh sheˍ. Yehˬ shehˍ hpaˇ nawˬ htaꞈ maˇ haꞈ laˇ kʼo, liꞈ chi suhˉ˗ehˍ bvuhꞈ leh feu piˇ gʼa ve yoˬ. Hto toˇ tuˬ awˬ pon awˉ lawˉ gu teh ve kʼo daꞈ ve yoˬ. Tawˇ pa haˉ te kʼo, JW Laiˉbaˍliˍ maˇ heˆ leh jw.org® hpawnˬ daꞈ tuˬ, tawˇ yaw tuˬ awˬ hkʼeun, Htehˆ˗leꞈ, Hkaw˗hpi˗u˗teuˇ gu teh gʼa ve yoˬ.
Taˇ kawˆ. Nawˬ tawˇ yaw meuˬ ve hkʼe yaw sheˍ. Yawˇ htaꞈ mehˆ hpfuhˇ mawˬ daꞈ ve hkʼe kʼehˉ te leh yaw sheˍ. Taꞈ iˉ taˇ chehˇ. Awˬ viˉ awˬ nyi teˇ gʼaˇ nawˬ geh meu taˍ ve kʼo daꞈ ve yoˬ. Yehˬ shehˍ hpaˇ na hkawˇ na laˇ htaˇ, nawˬ geh meu taˍ ve awˬ viˉ awˬ nyi hkʼawꞈ laˇ hkawˇ ga ca laˇ tuˬ, na hkawˇ oˇ ve htaꞈ teˇ pawˆ kʼawꞈ kʼoˆ sheˍ.
Teˇ pawˆ kʼawꞈ yaw daꞈ gʼa tuˬ na hkawˇ teh piˇ sheˍ. Chaw oˇ ve teˇ gʼaˇ nyi ma pfuhˇ ve kʼo, teˇ pawˆ kʼawꞈ yaw daꞈ gʼa tuˬ na hkawˇ teh piˇ sheˍ. Nawˬ yawˇ htaꞈ liꞈ kʼoˆ piˇ tuˬ, i˗me, yawˇ htaꞈ nawˬ hkʼaˇ nawˬ yuˬ piˇ ve, liꞈ feuˬ piˇ ve kaꞈ te gʼa ve yoˬ. Chi hkʼoˆ kaꞈ VDO leh awˬ lawn teˇ hpaˍ i˗me hkʼaw feu piˇ ve kaꞈ te gʼa ve yoˬ. Keunˍ ve tehꞈ nawˬ dawˇ ve kʼo, ngaˬ hui ve vehˆsaiˉ kʼoˆ maˍ piˇ sheˍ.
a Nawˬ ve chehˇ kuiˬ lo tawˇ yaw daꞈ tuˬ awˬ hkʼeun hkʼaw hto toˇ ve mvuhˇ miˬ ve awˬ liˇ maˇ yaꞈ ve kʼo, shu ve awˬ lawn awˬ tanˇ mvuhˇ miˬ ve awˬ liˇ htaꞈ caˉ daꞈ ve gʼaꞈ te sheˍ.