Nawˬ tawnˇ gʼa˗aw laˇ?

Chi teˇ hkʼawꞈ ve Shaw nyi kuiˬ Taꞈ yehˬ nawˬ hkʼa dehꞈ gʼaw nyi˗oˬ laˇ? Awˬ hawˉ lo ve na hkawˇ chi teˇ hpaˍ htaꞈ nawˬ hkʼawꞈ laˇ sheˍ:

“Nyi ma awˬ suhˉ kʼawꞈ pa” ve hkʼaˬ hkʼe kʼoˆ gaˇ ve le? (Roˉmaꞈ 12:2)

Nyi ma awˬ suhˉ kʼawꞈ pa ve lehˬ, daꞈ ve awˬ ceuˬ htaꞈ te ve ceh maˇ heˆ. Yaꞈ hkʼaˇ, awˬ tehˬ kʼo ngaˬ hui hkʼaˬ hkʼe hpehꞈ ve htaꞈ gʼa dawˇ nyi cawˇ ve yoˬ. Yaˬhoˉvaˬ ve awˬ liˇ awˬ hkʼaˇ htaꞈ gʼaꞈ te gʼa tuˬ te gʼa ve hkʼe ngaˬ hui gʼa te cawˇ ve yoˬ.—w23.01, liꞈ mehˆ hpfuhˇ 8-9.

Miˬ guiˬ hkʼoˆ lo ve awˬ heˆ teˇ hpaˍ htaꞈ mawˬ htaˇ, keunˍ lawꞈ cawˇ lawꞈ ve dawˇ hkʼaˇ cawˬ sheˍ

Liꞈ hpu hkʼaw tcuh kaˍ paˍ ve tawˇ hkawˇ miˬ guiˬ hkʼoˆ lo awˬ tehˬ hpehꞈ la chehˇ ve awˬ heˆ teˇ hpaˍ htaꞈ ngaˬ hui a yeˇ yuˬ ve yoˬ. Ngaˬ hui hkʼaˇ ngaˬ hui dawˇ yuˬ ve kʼo, Hkriꞈ yaˇ awˬ moˍ hkʼaw maˇ cawˇ maˇ hawˍ daꞈ tuˬ te laˇ gʼa ve yoˬ. Gʼuiˬ sha ve kanˉ hkʼaˇ hkʼaw beˆ maˍ laˇ taˍ ve htaꞈ cuˇ leh ngaˬ hui tawˇ yaw daꞈ cawˇ ve yoˬ. (1 Kawˇrenˍhtuˆ 1:10)—w23.02, liꞈ mehˆ hpfuhˇ 16.

Yeˍsuˆ Baˆtiˆsaˬ haꞈ yuˬ ve leh awˬ laꞈ gʼawˇ hui Baˆtiˆsaˬ haꞈ yuˬ ve hkʼaˬ hkʼe peun daꞈ ve le?

Iˉsaˍreˍlaˆ chaw Yaˬhoˉvaˬ htaꞈ awˬ to chiˇ aꞈ piˇ˗oˬ ve chaw ceuˬ geh Yeˍsuˆ paw la ve pa taw, Yeˍsuˆ Yaˬhoˉvaˬ htaꞈ awˬ to chiˇ aꞈ piˇ tuˬ maˇ loˍ. Yeˍsuˆ lehˬ biˇ ve chaw hpehꞈ leh venˇ baˆ maˇ cawˬ ve yoˬ.—w23.03, liꞈ mehˆ hpfuhˇ 5.

Awˬ viˉ awˬ nyi hkʼa dehꞈ hkʼawꞈ gʼa tuˬ ngaˬ hui hkʼaˬ hkʼe gʼa te ve le?

Awˬ nu ve chaw kaꞈ hkʼa dehꞈ hkʼawꞈ tuˬ ngaˬ hui chi suhˉ˗ehˍ hkʼawꞈ cawˇ ve yoˬ. Maˇ gʼa hkʼawꞈ sheˍ ve awˬ lawn awˬ nu ve chaw htaꞈ hkʼawꞈ tcuh tuˬ, ngaˬ hui laiˉ lawn htaꞈ teˇ pawˆ tiˉ taˇ hkʼawꞈ.—w23.04, liꞈ mehˆ hpfuhˇ 23.

Iˉsaˍyaˆ liꞈ 35:8 hkʼaw ve “daꞈ kehˬ ve yaꞈ kʼaw” aˬ htoꞈ ma htaꞈ kʼoˆ gaˇ ve le?

Yuˇdaꞈ chaw Baˍbuˍlonˍ te leh Iˉsaˍreˍlaˆ mvuhˇ miˬ lo kʼoꞈ˗e tuˬ, oˇ htaˇ teˇ co˗e yaꞈ kʼaw chi ve htaꞈ yaꞈ kʼaw lonˉ tehꞈ kʼoˆ ve yoˬ. Chi ve lehˬ yawˇ hui ve chehˇ kuiˬ hpehꞈ ve yoˬ. Leh chi beuꞈ teˇ co˗e “daꞈ kehˬ ve yaꞈ kʼaw” chi htaꞈ aˬ htoꞈ ma kʼoˆ gaˇ ve le? 1919 hkʼawꞈ C.E. htaˇ tanˬ leh yaꞈ kʼaw chi ve htaꞈ laiˉ hkʼaˇ gu ve yoˬ. Tawˇ pa haˉ te kʼo, liꞈ yuˬ tawˇ ve, leh Liꞈ hpu yanˍ tawˆ ve yoˬ. Chi hkʼoˆ kaꞈ, chi beuꞈ teˇ co˗e Yaˬhoˉvaˬ ve Shaˉhkiˆhkanˍ ve chaw “daꞈ kehˬ ve yaꞈ kʼaw” chi htaꞈ toˇ chehˇ ve yoˬ. Chi ve yawˇ hui Yaˬhoˉvaˬ htaꞈ caˉ leh oˉ kʼoˍ pui gʼa tuˬ ga piˇ ve yoˬ. Chi teˇ hkui leh awˬ gʼuˇ suhˍ hpawˇ Gʼuiˬ sha ve mvuhˇ miˬ lehˬ miˬ guiˬ hkʼoˆ lo daꞈ ve awˬ ceuˬ ceh tiˉ cawˬ tcuh tuˬ yoˬ.—w23.05, liꞈ mehˆ hpfuhˇ 15-19.

Tawˇ naˉ ve liꞈ kaˇ nanˉ uiˍ 9 hkʼaw yaˇ miˇ 2 gʼaˇ htaꞈ tehˆ taˍ ve awˬ lawn hkʼaw ngaˬ hui htaꞈ aˬ htoꞈ ma maˍ laˇ ve le?

Tawˇ naˉ ve liꞈ hkʼaw kʼoˆ ve, ‘cuˇ yiˍ maˇ cawˬ ve yaˇ miˇ’ jehˬ piˇ ve htaꞈ gʼaꞈ te ve chaw lehˬ “suh kʼai peuˬ.” Yaꞈ hkʼaˇ, ‘awˬ tehˬ ve cuˇ yiˍ’ hpehꞈ ve yaˇ miˇ teˇ gʼaˇ kʼoˆ ve tawˇ htaꞈ na yuˬ ve chaw lehˬ, “cuˇ yiˍ awˬ hkʼaˇ suh gʼaꞈ kʼai” ve chaw hpehꞈ leh co co taiˍ taiˍ a shaꞈ gʼa tuˬ yoˬ. (Tawˇ naˉ ve 9:1, 6, 13, 18)—w23.06, liꞈ mehˆ hpfuhˇ 22-24.

Yaˬhoˉvaˬ lehˬ nyi ma nuˇ nehˬ leh awˬ hkʼaˇ ca puiˉ ve tehꞈ Lawˇtaˍ htaꞈ hkʼaˬ hkʼe hpeuꞈ maw piˇ ve le?

Yaˬhoˉvaˬ Lawˇtaˍ htaꞈ hkʼaw hkʼoˆ lo hpaw˗e tuˬ kʼoˆ piˇ ve yoˬ. Yaꞈ hkʼaˇ, Lawˇtaˍ kawˆ jaˇ ve pa taw, yawˇ leh yawˇ ve yehˬ kʼa Zawˇraˆ venˇ ehˉ hkʼaw hpaw˗e tcuh laˇ tuˬ lawˬ ve yoˬ. Lawˇtaˍ lawˬ ve hkʼe Yaˬhoˉvaˬ gʼaꞈ te ve yoˬ.—w23.07, liꞈ mehˆ hpfuhˇ 21.

Nawˬ ve awˬ ca awˬ ku nyi ve awˬ han nyi ve kʼo, nawˬ hkʼaˬ hkʼe te tuˬ le?

Nawˬ awˬ to htaꞈ venˇ baˆ maˇ taˍ leh nawˬ Yaˬhoˉvaˬ geh meuˆ daꞈ ve htaꞈ a yeˇ yuˬ sheˍ. Liꞈ hpu hkʼaw yaˇ miˇ, nyi ma luˬ ve awˬ lawn nawˬ gʼaw leh hkʼa dehꞈ dawˇ nyi htaˇ, yawˇ hui Yaˬhoˉvaˬ geh bon lawˬ leh awˬ gʼaˇ gʼa ve yoˬ. Chi yawˇ ve awˬ hpawˇ in˗teu˗neꞈ hkʼaw awˬ ku nyi ve awˬ han maˇ kʼawꞈ nyi tuˬ ga piˇ gʼa ve yoˬ.—w23.08, Liꞈ mehˆ hpfuhˇ 14-17.

Ngaˬ hui ve yonˍ hkʼaˇ htaꞈ maˇ daꞈ ve hpawˇ awˬ nu ve chaw na laˇ htaˇ, hkʼa dehꞈ na gʼa ve lehˬ, ngaˬ hui nyi ma nuˇ nehˬ ve tehꞈ hkʼaˬ hkʼe hpeuꞈ maw piˇ ve le?

Yawˇ kʼoˆ ve leh na laˇ ve tawˇ yawˇ hkʼaˬ hkʼe dawˇ ve leh aˬ htoꞈ ma htaꞈ a yeˇ yuˬ ve ngaˬ hui shiˍ tuˬ te laˇ ve yoˬ. Chi ngaˬ hui yawˇ htaꞈ nyi ma nuˇ nehˬ ve hkʼaw hkʼawꞈ piˇ gʼa tuˬ ga laˇ ve yoˬ.—w23.09, liꞈ mehˆ hpfuhˇ 17.

Maˍriˆ awˬ gʼaˇ cawˬ tuˬ shu ga piˇ ve htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le?

Maˍriˆ Meˍsiˉyaꞈ ve awˬ e gʼa hpehꞈ tuˬ shiˍ htaˇ, awˬ nu ve chaw ga laˇ tuˬ lawˬ ve yoˬ. Maˍriˆ htaꞈ awˬ gʼaˇ piˇ tuˬ, mvuhˇ naw ma tcuh yaˇ Gaˍbeˍlaˆ leh Eˇliˇsaˍbehˆ Liꞈ hpu hkʼaw ve awˬ lawn htaꞈ kʼoˆ ve yoˬ. Chi ve hkʼa shuˍ shuˍ, nawˬ awˬ gʼaˇ hehnˇ la tuˬ awˬ viˉ awˬ nyi kaꞈ nawˬ htaꞈ ga laˇ gʼa ve yoˬ.—w23.10, liꞈ mehˆ hpfuhˇ 15.

Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ˗aw laˇ?

Yaˬhoˉvaˬ ngaˬ hui ve bon lawˬ hkawˇ htaꞈ hkʼawꞈ laˇ tuˬ yoˬ tehꞈ ka tiꞈ te taˍ laˇ ve yoˬ. Leh yawˇ hkʼawꞈ laˇ htaˇ kaꞈ yawˇ ve a loˍ htaꞈ hkʼaˬ htaˆ kaꞈ dawˇ nyi ve yoˬ. (Yeˍraˍmiˆ 29:12) Yaˬhoˉvaˬ ve kanˉ te ve chaw bon hkʼa shuˍ lawˬ ve htawˇ, teˇ gʼaˇ leh teˇ gʼaˇ ve bon lawˬ hkawˇ htaꞈ yawˇ hkʼawꞈ piˇ ve maˇ shuˍ daꞈ. Hkʼaˬ hkʼe hpehꞈ ve htawˇ maˇ kʼoˆ, yawˇ ngaˬ hui htaꞈ ga laˇ gʼa ve tehꞈ yonˍ ve yoˬ.—w23.11, liꞈ mehˆ hpfuhˇ 21-22.

Roˉmaꞈ liꞈ 5:2 hkʼaw “dawˇ law” kuiˬ gʼa henˇ˗oˬ ve hkʼe, ehˉ 4 hkʼaw aˬ htoꞈ ma te awˬ lawn chi htaꞈ kʼawꞈ kʼoˆ sheˍ ve le?

Chaw teˇ gʼaˇ Liꞈ hpu gʼa henˇ htaˇ, miˬ guiˬ awˬ suhˉ hkʼaw yawˇ co co taiˍ taiˍ gʼa chehˇ tuˬ dawˇ law taˍ ve yoˬ. Yaꞈ hkʼaˇ, yawˇ tuꞈ ve hkanˍ ve gʼa hpuˇ htaˇ, yawˇ yeunˇ hkanˍ gʼaˇ leh Gʼuiˬ sha yawˇ htaꞈ nyi hkʼaˇ suh jaˇ ve tehꞈ shiˍ gʼa ve yoˬ. Chi ve yawˇ ve dawˇ law kuiˬ htaꞈ yonˍ gʼa jaˇ tuˬ te piˇ leh Gʼuiˬ sha yawˇ htaꞈ daꞈ ve awˬ ceuˬ peꞈ laˇ tuˬ yoˬ tehꞈ yonˍ gʼa jaˇ tuˬ kaꞈ te piˇ ve yoˬ.—w23.12, liꞈ mehˆ hpfuhˇ 12-13.