Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ ve hkʼaˬ hkʼe te henˇ ve le?
Yaˬhoˉvaˬ ve Shaˉhkiˆhkanˍ ve chaw nawˬ htaꞈ Liꞈ hpu henˇ ve jehˬ laˇ gaˇ ve yoˬ. Liꞈ hpu henˇ ve lehˬ nawˬ awˬ bon laiˉ ceuˬ gʼa tuˬ yoˬ. Tawˇ pa haˉ te kʼo,
Nawˬ a shaꞈ teꞈ kuiˬ hkʼaw ha lehˬ gʼa ve
Nawˬ Gʼuiˬ sha htaꞈ awˬ chawˇ gʼa te ve
Awˬ gʼuˇ suhˍ hpawˇ Gʼuiˬ sha ka tiꞈ te taˍ laˇ ve htaꞈ nawˬ gʼa shiˍ ve
Awˬ lawn chi ve hkʼaw awˬ hawˉ lo ve awˬ lawn htaꞈ nawˬ gʼa henˇ tuˬ yoˬ.
Ngaˬ Liꞈ hpu henˇ˗oˬ ve kʼo, Shaˉhkiˆhkanˍ ve chaw gʼa hpehꞈ ve laˇ?
Ngaˬ awˬ nu ve chaw htaꞈ jehˬ piˇ leh teˇ geh henˇ hpehꞈ˗aw laˇ?
Maˍ laˇ ve chaw maˇ cawˬ leh ngaˬ hkʼaˇ ngaˬ Liꞈ hpu henˇ gaˇ ve kʼo hpehꞈ˗aw laˇ?
Ngaˬ hui Liꞈ hpu hkʼaˬ hkʼe te henˇ ve le?
Liꞈ hpu maˍ ve chaw lehˬ, Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ yehˇ leh nawˬ htaꞈ teˇ lawn peuˬ teˇ lawn maˍ laˇ tuˬ yoˬ. Liꞈ hpu hkʼaw aˬ htoꞈ ma maˍ laˇ taˍ ve le? Liꞈ hpu hkʼaw nawˬ awˬ bon aˬ htoꞈ ma gʼa ve le? Nawˬ gʼa shiˍ tuˬ yoˬ. Chi aꞈ kehˉ kʼawꞈ shiˍ gaˇ ve kʼo VDO chi nyi sheˍ.
Henˇ ve hpu peuˬ˗aw laˇ?
Maˇ peuˬ. Yeˍsuˆ awˬ laꞈ gʼawˇ htaꞈ kʼoˆ piˇ ve, “nawˬ hui hkʼe leˇ gʼa ve hkʼa shuˍ shuˍ, shu htaꞈ hkʼe leˇ kʼawꞈ piˇ˗oˆ” tehꞈ, Yaˬhoˉvaˬ ve Shaˉhkiˆhkanˍ ve chaw lehˬ Yeˍsuˆ ve hkawˇ htaꞈ na yuˬ leh gʼaꞈ te ve yoˬ. (Maꞈhtehˍ 10:8) Chi hkʼoˆ kaꞈ, Liꞈ hpu henˇ tuˬ awˬ pon liꞈ kʼoˆ kaꞈ maˇ gʼa vuiˬ. Nawˬ ve a shaꞈ co co taiˍ taiˍ ha lehˬ gʼa ve! liꞈ kʼoˆ hkʼe leˇ lawˬ gʼa ve yoˬ.
Hkʼaˬ hkʼe maw gʼa henˇ ve le?
Henˇ tuˬ ve awˬ lawn hkʼa peu˗eˬ 60 lawnˬ cawˬ ve yoˬ. Nawˬ hkʼaˬ hkʼe taw henˇ tuˬ leuˆ yuˬ gʼa ve yoˬ. Maˇ˗awˍ ve chaw kʼo, teˇ shinˉ ve hkʼaw 1 lawn hkʼa peu˗eˬ henˇ ve dawˇ cawˇ ve yoˬ. Maˇ heˆ leh, teˇ hpaˍ kʼo teˇ shinˉ ve hkʼaw laiˉ lawn henˇ ve dawˇ cawˇ ve yoˬ.
Henˇ gaˇ ve kʼo hkʼaˬ hkʼe gʼa te ve le?
1. Nawˬ ve awˬ lawn awˬ tanˇ awn˗laiˉ hkʼaw bvuhꞈ keu sheˍ. Nawˬ bvuhꞈ keu taˍ ve awˬ lawn awˬ tanˇ nawˬ htaꞈ caˉ daꞈ tuˬ ceh tiˉ ngaˬ hui yehˇ tuˬ yoˬ.
2. Maˍ laˇ ve chaw nawˬ htaꞈ caˉ daꞈ tuˬ yoˬ. Liꞈ hpu hkʼaˬ hkʼe te henˇ ve maˍ laˇ ve chaw nawˬ htaꞈ kʼoˆ maˍ laˇ tuˬ yoˬ. Nawˬ htawˇ dawˇ nawˬ dawˇ cawˬ ve na hkawˇ htaꞈ kaꞈ yawˇ hkʼawꞈ laˇ tuˬ yoˬ.
3. Nawˬ henˇ gaˇ ve awˬ yanˇ tinˍ piˇ gʼa ve yoˬ. Nawˬ teˇ gʼaˇ tawˬ teˇ gʼaˇ, tawˇ yaw tuˬ awˬ hkʼeun hkʼaw, In˗teu˗neꞈ hkʼaw, liꞈ bvuhꞈ feu daꞈ ve maˇ heˆ leh I˗me hkʼaw henˇ kaꞈ gʼa ve yoˬ. Teˇ pawˆ leh teˇ pawˆ henˇ ve awˬ yanˇ 1 naˍ riˍ yehˇ ve yoˬ. Yaꞈ hkʼaˇ, nawˬ awˬ yanˇ maˇ cawˬ ve maˇ heˆ leh chi aꞈ kehˉ kʼawꞈ henˇ gaˇ ve kʼo, awˬ yanˇ pa gʼa ve yoˬ.
Teˇ lawn lawn ceh henˇ nyi sheˍ ve hpehꞈ˗aw laˇ?
Hpehꞈ ve yoˬ. Nawˬ awn˗laiˉ hkʼaw awˬ lawn awˬ tanˇ bvuhꞈ keu peuˬ hkʼawꞈ nawˉ, maˍ laˇ ve chaw nawˬ htaꞈ caˉ daꞈ la tuˬ yoˬ. Nawˬ henˇ ve dawˇ cawˇ maˇ dawˇ cawˇ ve chi suhˉ˗ehˍ henˇ nyi shaˍ tehꞈ, maˍ laˇ ve chaw htaꞈ kʼoˆ piˇ gʼa ve yoˬ. Maˍ laˇ ve chaw lehˬ, Nawˬ ve a shaꞈ co co taiˍ taiˍ ha lehˬ gʼa ve!—Liꞈ hpu htaꞈ henˇ nyi sheˍ liꞈ kʼoˆ ehˉ chi yehˇ leh maˍ laˇ tuˬ yoˬ. Liꞈ kʼoˆ chi ve lehˬ 3 lawn ceh tiˉ cawˬ ve yoˬ. Nawˬ Liꞈ hpu henˇ ve dawˇ cawˇ maˇ dawˇ cawˇ ve shiˍ tuˬ, liꞈ kʼoˆ chi ve ga laˇ tuˬ yoˬ.
Ngaˬ Liꞈ hpu henˇ˗oˬ ve kʼo, Shaˉhkiˆhkanˍ ve chaw gʼa hpehꞈ ve laˇ?
Maˇ heˆ. Liꞈ hpu hkʼaw aˬ htoꞈ ma maˍ laˇ ve Yaˬhoˉvaˬ ve Shaˉhkiˆhkanˍ ve chaw awˬ nu ve chaw htaꞈ kʼoˆ piˇ gaˇ ve yoˬ. Nawˬ bon liˇ pa tuˬ ngaˬ hui maˇ nyiˉ laˇ. Liꞈ hpu hkʼaw kʼoˆ ve hkʼe ngaˬ hui gʼaꞈ te ve yoˬ. Awˬ nu ve chaw aˬ htoꞈ ma ve bon liˇ yonˍ ve htawˇ yawˇ hui dawˇ cheˆ ve htaꞈ ngaˬ hui yawˆ yan ve yoˬ.—1 Peˍtruˆ 3:15.
Ngaˬ ve Liꞈ hpu yehˇ hpehꞈ˗aw laˇ?
Hpehꞈ ve yoˬ. Nawˬ Liꞈ hpu hkʼaˬ ve teˇ kʼoˆ yehˇ kaꞈ hpehꞈ ve yoˬ. Yaˬhoˉvaˬ ve Shaˉhkiˆhkanˍ ve chaw lehˬ, Miˬ guiˬ awˬ suhˉ yuˬ tawˆ ve Liꞈ hpu yehˇ ve yoˬ. Liꞈ hpu chi teˇ kʼoˆ lehˬ, tcuhˉ kuiˬ cawˇ ve leh na gʼa sha ve yoˬ. Yaꞈ hkʼaˇ, nawˬ yehˇ jaw ve Liꞈ hpu htaꞈ yehˇ kaꞈ gʼa ve yoˬ.
Ngaˬ awˬ nu ve chaw htaꞈ jehˬ piˇ leh teˇ geh henˇ hpehꞈ˗aw laˇ?
Hpehꞈ ve yoˬ. Nawˬ ve awˬ chawˇ maˇ heˆ leh yehˬ kʼa hkʼaw ve chaw htaꞈ jehˬ piˇ leh teˇ geh henˇ ve kaꞈ hpehꞈ ve yoˬ.
Ngaˬ Yaˬhoˉvaˬ ve Shaˉhkiˆhkanˍ ve chaw geh Liꞈ hpu henˇ jaw ve kʼo, teˇ pawˆ kʼawꞈ henˇ hpehꞈ˗aw laˇ?
Hpehꞈ ve yoˬ. Oˇ htaˇ aꞈ kehˉ kaꞈ chi teˇ pawˆ henˇ ve htaꞈ nawˬ pyawˍ tuˬ yoˬ. Awˬ lawn kʼo, awˬ tcuhˉ awˬ yanˇ htaꞈ hawˍ daꞈ ve henˇ tuˬ ve laꞈ caˉ kaꞈ pa ve yoˬ. Liꞈ kʼoˆ chi teˇ maˬ hkʼaw VDO cawˬ leh henˇ htaˇ kaꞈ pyawˍ tuˬ yoˬ.
Maˍ laˇ ve chaw maˇ cawˬ leh ngaˬ hkʼaˇ ngaˬ Liꞈ hpu henˇ gaˇ ve kʼo hpehꞈ˗aw laˇ?
Hpehꞈ ve yoˬ. Laiˉ gʼaˇ Liꞈ hpu henˇ htaˇ awˬ nu ve chaw kʼoˆ maˍ laˇ tcuh ve pa taw awˬ bon gʼa jaˇ. Yaꞈ hkʼaˇ, chaw teˇ hpaˍ kʼo yawˇ hkʼaˇ yawˇ henˇ nyi gaˇ ve yoˬ. Ngaˬ hui Liꞈ hpu henˇ tuˬ ve laꞈ caˉ cawˬ ve yoˬ. Nawˬ Liꞈ hpu henˇ gʼa tuˬ chi teˇ tawn hkʼaw hpfuhˆ nyi tuˬ ve laꞈ caˉ laiˉ ceuˬ cawˬ ve yoˬ. Nawˬ awˬ hawˉ lo cawˬ ve laꞈ caˉ teˇ hpaˍ htaꞈ yehˇ gʼa ve yoˬ.
Liꞈ hpu maˍ ve awˬ tawn. Chi ve teˇ tawn hkʼaw, ngaˬ hui a shaꞈ teꞈ kuiˬ hkʼaw yuˬ yehˇ gʼa ve Liꞈ hpu hkʼaw ve awˬ liˇ awˬ hkʼaˇ kʼoˆ maˍ laˇ taˍ ve laiˉ lawn cawˬ ve yoˬ. Tawˇ pa haˉ te kʼo, dawˇ haˍ dawˇ hkiˉ ve htaꞈ gu ve awˬ hkʼaˇ, yaˇ htaꞈ maˍ ve awˬ hkʼaˇ, kanˉ te ve hpu maˇ gʼa maˇ ve kʼo hkʼaˬ hkʼe te tuˬ le?
VDO Liꞈ hpu henˇ tuˬ ve awˬ pon. Liꞈ hpu htaꞈ kʼoˆ maˍ laˇ tuˬ chi suhˉ˗ehˍ ve VDO laiˉ maˬ cawˬ ve yoˬ.
Liꞈ hpu hkʼaw hkʼawꞈ laˇ hkawˇ. Liꞈ hpu htaꞈ caˉ daꞈ ve na hkawˇ teˇ hpaˍ hkʼawꞈ laˇ hkawˇ cawˬ ve yoˬ.
Liꞈ hpu awˬ tawn kʼoˆ maˍ laˇ taˍ ve. Liꞈ hpu awˬ tawn ve tcuhˉ kuiˬ leh tawˇ hkawˇ teˇ hpaˍ ve tcuhˉ kuiˬ htaꞈ kʼoˆ maˍ laˇ ve yoˬ.