N’nga Nlungu Unofunan’ni Waatu?

MWALERINGA jornale, mwaonelanga televizau, venango mwavwelanga radio, fendo dhinjinji munovwa myasa dhoonga a-vwela malamulo, khondo thitho uwalanga. Pyovweya ira nyo munosukwala mwasa wa marenda venango mwasa wa fwinyu venango balinyu ukwide.

Venango munodhifukecha:

• N’nga Nlungu afuna ira ingumi yanga na ya abalanga ikale e-ni?

• N’nga ndinafwanye waani pedhelo ira ndiode limbanana nyarwa dhinagumanana miyo?

• N’nga vinodha odeya atu dhakala varendele vailamboi?

Bibilya litokaana vyowakula vyo-inda rima vya vyofuka vyevi?

BIBILYA LINAFUNJI-A IRA NLUNGU UNODHA IRA VYONGO NINGA VI VAILAMBO YAVATHI:

• Atu katinodha uvwa upa, katinodha bulela, venango wukwa.— Apokalipse 21:4

• “Mutu orangala unodha gwela mwango ninga mwemo munairela mbala.” —Esaya 35:6

• “Metho aatu o-oona anodha dhuliwa.”—Esaya 35:5

• Atu okwa anodha venyathi-iwa.—Juwau 5:28, 29

• Atu katinodha bulela.—Esaya 33:24

• Mutu uliwethene unodha kaana vyodya vinjinji.—Salimo 72:16

  

VINAFUNJI-A BIBILYA VINOODA UKAMI-ANI

Venango munathuulela ira vimadhinyo uvwa ndulimu pivyongo vyo-oodeya. Mbwenye Nlungu utolanyedha ira unodha irana vyevi chineneeva, thitho Bibilya linoonga mwemo vyongo vyevi munofuna aliwa dhaireya.

Wenjedhela va vyongo vyevi, Bibilya linoonga vyongo vinanikami-e ira nikalenga aimwerumweru malamboano. N’nga pivyongo viivi vinausukwali-ani? Venango muli orambulela kobiri, nyarwa dhabanjani, urenda venango wukwa wa balinyu venango fwinyu. Bibilya linoukami-ani vilela nyarwa dhedhi thitho linoulimbi-ani mwasiwa linowakula vyofuka ninga vi:

• Mwasiwa ngwan’ni ninoona nyarwa?

• N’nga ninavilele a-vi nyarwa dhinagumanana i-yo?

• N’nga vinaodeye a-vi ira banjali-u likale laimwerumweru?

• N’nga inaireya chini mutu akwa?

• N’nga pyoodeya dhaonana na afwi-u venango abali-u akwide?

• N’nga inafuna nikami-a chini kaana iroromelo ira vilanyedhile Nlungu vinodha ireya?

Vinalerinyo bukuli, nguumboni oi munafuna muidhiwe vinafunji-a Bibilya. Bukuli linoukami-ani. Ndima iliyothene, itokaana yofuka thitho vyofukavyo vinoukami-ani livwechecha pama Bibilya. Atu anjinji anokala aimwerumweru tafunjedhanga Bibilya na Amboni dha Yohova thitho ninororomela ira nyo munodha kala waimwerumweru. Nlungu unodha uraeli-ani mwadhilimbi-edhanga sakasaka vinafunji-a Bibilya.