Muthuulele mwadhi Loti

Loti akalecha vambo-i na Abrahamu wu Kanani. Othene tatokaana vifuo vinjinji voi mamburo odyi-edhelao vifuovyo tatowayevela. E-no Abrahamu atom’mwandela Loti ira: ‘Kavinoodeya ira nikalenga vambo-i. Urome sakula we unofunawee makalanga thitho miyo ndinodhowa wu ikhundu inango.’ Veva Abrahamu atoothonyi-edha ira kaali ovidhiveliwana ekhene.

Loti asakunle isa yavaduzi na sidadi la Sodoma. Liye asakunle isa yei namwasa oi watookala ma-inje manjinji thitho malachi obitimela. Ee-no atoothamela weo vambo-i na banjalee.

Atu asidadi la Sodoma na sidadi n’nango lavaduzi laitaniwa Gomora, tali amakalelo othakala maningi. Ee-no Nlungu atoona ira ndi pama nonga sidadilo. Mbwenye atothuulela vyovulumucha Loti na banjalee. Yohova atooruma angelo ambili ira tamaawandele ira: ‘Venyathini mombaranya. Kumanimo sidadimu namwasa oi Yohova unofuna alinonge.’

Mbwenye Loti na i-yanee tanoodembuwa kuma voi angelwao tatoofiya vowa-inda mandha nowakumi-edha undhe wa sidadi. Tatoawandela ira: ‘Mbaranyani, ovela munakwe. Mbwenye kamuing’ane nduli, mwaing’ana nduli munokwa.’

Tangafiile wu sidade ya Zoari, Yohova atoorumbwi-a mulo na sulufule mu sidadi ya Sodoma na Gomora. Masidade amelene enala tatoovyelatu. Mbwenye mwadhi Loti kaavwele vyawenjeli-wile aliwa voi atooing’ana nduli. N’nga utoidhiwa vyaireile angaing’ane nduli? Atoosanduwa iruwa ya mwinyu. Mbwenye Loti naa-imee aa-iyana tatoovulumuwa namwasa oi tatom’vwela Yohova. Vinooneya ira othene tatoodhivwela tangaranga tangaonile ira m’miwa utokwa namwasa o-ovwela. Mbwenye tatoosangalala ira atovwela malangi-o a Yohova.