Abrahamu atoothonyi-edha ira ali ororomeleya

Abrahamu atoom’funji-a mwanee Izaki ira am’dhiveliwengana Yohova thitho roromela vyolanyedhavyee. Mbwenye Izaki angana vyawa vaduzi duzi 25, Yohova atoom’vepha Abrahamu ira aire yongo yorucha maningi. N’nga am’mwandenle ira aire n’ni?

Nlungu atom’mwandela Abrahamu ira: ‘Tukula mwanaa mbo-uo umamʼvelele sembe wu mwango wa Moriya.’ Abrahamu kaaidhiwa mwasee Nlungu atom’mwandela irana vyevyo. Mbwenye atoovwela.

Dambo lo-arela namaebe-i, atoom’tukula Izaki naanamalabee ambili noroma wenda ulendo odhowa wu mwango wa Moriya. Tangawendile ulendo wa malambo mararu, tatooroma ona mwanguo mwavandandai. Abrahamu atoowandela anamalabeale ira tam’dedi-edhelenga vevo vahora liye na Izaki vyadhowa aliwa mavelela sembe. Abrahamu atoom’va-a Izaki khuni ira atukule thitho liye atukunle mbene. Mbwenye Izaki atoom’fuka babeuo ira: ‘N’nga libila linofuna i-yo mavelela sembe nli wani?’ Abrahamu atoowakula ira: ‘Mwananga Yohova unamaniva-e.’

Tangafiile vamwangonivo, tatoomanga iguwa yovelelavo sembe. Adhamale atom’manga Izaki miwono na mendo nom’gonathi-a vaiguwanivo.

Adhamale atootukula mbene ira am’phe Izaki. Vahora yeniyene atoowva ngelo wa Yohova akhuwanga ira: ‘Abrahamu! Khum’phe zombuo! Va-eeni nditoidhiwa ira unororomela Nlungu namwasa oi unofuna velela sembe mwanaa m’mbo-uo baa-i.’ E-no Abrahamu atoona libila lingali vaimurini vaduzi na vali liye. Adhamale atootukula libilalo nolivelela sembe wa Yohova malo mwa Izaki.

Romela va dambo lelo, Yohova atooroma m’mwitana Abrahamu ira ngufwee. Utoidhiwa ira mwasee ngwan’ni Yohova atom’mwitana Abarahamu ira ngufwee? Namwasa oi Abrahamu atooirana vyothene vyafuna Yohova angalive ira kaavivwechecha.

Yohova atooweli-edha okoka yolanyedha yam’mwandele liye Abrahamu ira: ‘Ndinodha uraeli-a thitho ndinodha injivi-a a-imaa.’ Veva Yohova athapulela ira unodha raeli-a atu othene apama dhela mubanja la Abrahamu.