Yohova atom’va-a Samisoni kopolo

Vahora inango Aisraeli tatooroma okoka lambela mafwano. Thitho Yohova atoorumeli-a ira Afilisiti taatongenga Aisraeli mwauwalanga. Mbwenye vatookala Aisraeli enango enao tam’dhiveliwanave Yohova. M’mbo-i mwa atwala ngu Manowa. Liye na i-yanee katana a-ima. Dambo n’nango Yohova atom’ruma ngelo ira adhowe wa mwadhi Manowa. Ngelo atom’mwandela mwadhi Manowa ira: ‘Unodha kaana mwana wa lombwana, wenuo unofuna dha vulumucha Aisraeli mandhani mwa Afilisiti. Mbwenye mwanuo unodha kala Naziri.’ N’nga Anaziri utowaidhiwa? Mbaarumiwi avakundu a Yohova thitho katarumeli-iwa inga sisi.

Vangavirile Hora, mwadhi Manowa atoobaladi mwana wa lombwana thitho atom’va-a dhina loi Samisoni. Mwanuo angaulukunle Yohova atom’va-a kopolo dhinjinji. Liye atoopha kalamu vo-okaanene ipano iliyothene. Dambo n’nango angali ekene atoopha Afilisiti 30. Afilisiti tanom’mwidanana maningi Samisoni thitho tanoosakasaka ndhila yoi tam’phe. Dambo n’nango agonanga wu Gaza, Afilisiti tatoodhowa valango wa sidaduo nodedi-edhelanga ira undhe wacha tam’phe. Mbwenye Samisoni atoovenyathi vari va ma-iyu nokumi-ao suo wa valango wa sidadiyo, nouzemula liye dhowa mautatilela wu mwangoni mwinangwee wavaduzi na Eburoni!

Vidhaireye e-no, Afilisiti tatoodhowa wa mwendee Samisoni dhinalee Dalila. Aliwa atom’fuka ira: ‘N’nga sengeredho ya kopolo dha Samisoni tivi? Waniwandela ninouva-a kobiri dhinjinji. Ninofuna nim’inde nimam’fungele parezoni.’ Voi Dalila ali odhiveliwana kobiri, atoawandela ira unosakasaka sengeredhwee. Voroma Samisoni anookonda m’mwandela Dalila sengeredhwee. Mbwenye liye atom’kanyi-edha voi Samisoni atoofiya vochenyela thitho atom’mwandela sengerendhwee. Liye aongile ira: ‘Miyo ndili Naziri, sisi langali kandinaliingevo. Mwandiinga kopolodhanga dhothene dhinomalela vevo.’ Samisoni a-aidhiwe vyevyo kaam’mwandele.

Hora yeniyene Dalila atoowandela Afilisiti ira: ‘Utondiwandela sengeredhwee.’ Adamale atoom’gonathi-a Samisoni vamendonivee, nom’mwitana mutu ira am’mwinge sisilee. Angam’mwingile, Dalila atookuwa ira: ‘Samisoni, Afilisiti anaudha.’ Samisoni atoovenyathi mbwenye kaana kopolo. Afilisitao tangam’indile tatom’kumi-amo metho nodhowa mam’fungela perezoni.

Dambo n’nango Afilisiti tatoogumanyeya va sasani walambelamo aliwa nlungwiwa dhinalee Dagoni. Aliwa tatookuwa ira: ‘Nlungwi-u utoniva-a Samisoni! M’kumi-eni ira nim’mwaredhena.’ Ee-no atwao tatoo-ela vari va mizati mili noroma m’theya. Samisoni atookuwa ira: ‘Yohova pepani, ndiva-eni kopolo fendo umbo-i baa-i.’ Vahora yeniyo sisilee lali lingamadhi mela. Samisoni atoondunya mizatiyo na kopolodhee dhothene. Nyumbiyo yatoogwa thitho yatoopha atu othene tali mwemo. Na liyene Samisoni akwele mwemo.