Davide na Sauli

Davide angam’phide Goliyati, Mwene Sauli atoom’mwandela ira akale ndimuwa waanyakondo. Davide atooganyali khondo dhinjinji thitho atoovweya maningi. Awelanga khondoni a-iyana tanooina thitho omba nyumbo ira: ‘Sauli uphide mamiliyau oyeva mbwenye Davide uphide mamiliyau manjinji. Ee-no Sauli atoothakaleliwa na vyevi noroma m’saka Davide ira am’phe.

Davide anooidhiwa omba bangwe. Dambo n’nango aombelanga Sauli nyumbo, Sauluo atooponya mwalango ira am’phe Davide. Mbwenye Davide atoozengwa thitho mwalangule watoodhowa malatha vachi-ini. Romela vevo, Sauli anoovilimbi-edha ira am’phe Davide. Vyevi vyatooiri-a ira Davide atawele kokolani.

Sauli atootukula anyakhondwe 3.000 noroma m’sakasaka Davide. Moi ee-no dambo n’nango tatoovolowa paoni weo wali Davide vambo-i naafwee. Afwee a Davide tatoonga ira: ‘Yen’na njingaraa Davide, liye atoowambadha nogwandao isaala yakhundu mwakamizee yo-okaana miono mbwenye Sauli kaaidhi yongo iliyothene.’ Adhamale, Davide atooroma vikhumbanyedha maningi noonga ira kandilemezile mwene ozoziwa wa Nlungu. Liye kaarumeli-idhe ira afweao tam’phe Sauli. Moi ee-no Sauli angakumile paoni, Davide atookuwa nom’mwandela ira: ‘Ndatookaana ngari ira nduuphe mbwenye nditou-iya.’ N’nga Sauli atochinja mathuulelo?

Khabe. Sauli atoodhowanave m’sakasaka Davide. Dambo n’nango nama-iyu, Davide nabalee dhinalee Abisai, tatoodhowa wu limburo lelo lagonathidhe Sauli naanyakhondwee. Tafwaidhe ira Abineri wenuo aing’anela mwene agonanga. Abisai atoonga ira: ‘Ngari kinokwaranya veva, unoona a-vi ndim’phe? Mbwenye Davide atoonga ira: ‘Khabe. Wen’na unodha langiwa na Yohova. Dhowe nitukule mwalangwee namunwee wama-injula nidhowenga.’

Ee-no Davide angagwenle vamwangoni wenuo wali vaduzi atookhuwa ira: ‘We Abineri unaagona a-barela mwenuo? N’nga mwalangwee nama-injee vili wani?’ Sauli angazindiyenle madhu a Davide atoonga ira: ‘Ngari yondipha watooikaana mbwenye ute ndiriyela rima. Va-eni nditozindiyela ira weyo unodha kala mwene wa Aisraeli.’ Adhamale Sauli atoodhowa waniwa. Mbwenye kaiira atu othene abanjani mwa Sauli tanom’mwidanana Davide.