Sikana atoom’khami-a ndimuwa waanyakhondo

Sikana mwinango wau Israeli atootukuliwa makalanga ninga dhaari wu Siriya weo wali olaphela maningi na waniwa. Gulu laanyakhondo a Asuri mbam’tukunle Sikanula. Wu Siriyao alaba basa wa ndimuwa mwinango dhinalee Namani. Sikanula anoom’lambela Yohova angalive ira atu aweo talambela milungu yonama.

Namani atookaana marenda avikhutwe thitho anoovwa upha maningi hora dhothene. Sikanula anoofunechecha m’khami-a Namani. Ee-no atoom’mwandela patarawee wa-iyana ira: ‘Nditom’mwidhiwa mutu wenuo unaode m’mwili-a patarau. Mutwee ngu Elizeu liye unokhala wu Israeli. Mwaimbarimbari unooda m’mwili-a.’

Mwadhi Namani atoom’mwandela man’nee mwasula. Namani atoodhowadi wu Israeli ira amaonane na Elizeu. Angafiile weo, athuulela ira Elizeu unom’thonyi-edha lemezo lavakhundu ninga mutu olemezeya. Mbwenye Elizeu kaaongile naliye. Arumile zombwe ira amam’mwenyule nom’mwandela ira: ‘Udhowe uma-ambe fendo 7 i-njeni wa Yordani, waira ee-no unoila.’

Namani angavwide vyevi, atoothakaleliwa maningi. Moi atoonga ira: ‘Ndathuulela ira namaongelula unondiili-a voitana dhina la Nlungwee thitho awendi-anga dhandhale wu na wu. Amala unondiwandela ira ndidhowe ndima-ambe? N’nga kanoidhiwa ira wu Siriya utokala mi-inje kwaranya yau Israeli uno? N’nga kandaode dhowa ma-amba mi-inje yawani-u?’ Adhamale atoovenyathi mosukwala nodhowanga.

Mbwenye anamalabee tatoom’kami-a ira athuulele pama mwasula. Tatoom’mwandela ira: ‘N’nga kamunaode ira yongo iliyothene inaukami-eni ira muile? Thitho vyongo viongile Namaongelula kai vyorucha. Muirena vyevyo.’ Namani atoovwela anamalabeao thitho atoodhowa ma-amba i-nje wa Yordani. Anga-ambile fendo yogomi-edha atoona ira vikutwevyee vitomala. Adhamale atoosangalala maningi thitho atoodhowa wa Elizeu mam’simba. Atoom’mwandela ira: ‘Va-eeni nditoidhiwa ira Yohova ngu Nlungu waimbarimbari.’ N’nga unothuulela ira Sikanula adhivwide a-vi angam’monile Namani adhanga angaili-iwile?