Gulu lakopolo laanyakhondo a Yohova

Beni-hadadi ali mwene wau Siriya thitho anoodhowecha makhoma khondo na Aisraeli. Mbwenye Hora dhothene Namaongela Elizeu am’mwidhiwi-a mwene wau Israeli mwenuo anootawa. Moi e-no Beni-hadadi atoothuulela vyoruma anyakhondwee ira tamam’inde Elizeu. Liye atoovwa ira Elizeu uli wu Dotana.

Anyakhondo awu Siriya tatoofiya wu Dotana nama-iyu norungunuwa sidadilo. Namaebe-i namalaba wa Elizeu angakumile vandhe, atoona gulu laanyakhondwao. Liye atoova maningi nokuwa ira: ‘M’maniwee! ninoira a-vi veva mbwiye?’ Mbwenye Elizeu atom’mwandela ira: ‘Khuove i-yo nitokaana anjinji kwaranya ana aliwao.’ Ee-no Yohova atoodhula metho anamalabuo moi atoona myango yothene yarungunuwile sidadilo, mungali makavalo na magaleta akhondo o-inda mulo.

Vahora anyakhondwao vyafuna aliwa m’inda Elizeu, liye atoolobela wa Yohova ira: ‘Pepani Yohova, airi-eni ira ta-aonenga.’ Mo-odedi-edhela, anyakhondwale katazindiele wali aliwa angalive ira tanoona. Vingaireile ee-no Elizeu atoawandela ira: ‘Mutodimela dhani uno nduuveleleni wamutu unom’funa nyo.’ Anyakhondwao tatooroma m’arela nofiya wu Samariya weo wakala mwene wau Israeli.

Tangafiile weo, anyakhondwala tatoozindiyela wali aliwa. Mwenuo angaoni atoom’fuka Elizeu ira: ‘N’nga ndaaphe?’ N’nga Elizeu atoona ira yen’na yali ngari ira aaphe atwala? Khabe. Malomwee atom’mwandela mwenuo ira: ‘Kamwaaphe mwaava-e yodya tadye mwamala mwaawandele ira tadhowenga.’ Ee-no mwenuo atoasaka-edhela pwando nlukulu. Tangamadhi udya tatoovenyathi nodhowanga waniwa.