Elizabeti atookaana mwana

Vangavirile vyawa vyokwaranya 400 kumela vevo panda wa Yerusalemu vyamangiwile aliwa, mulimbo velela sembe mwinango akalecha duzi na sidadi ya Yerusalemu. Dhinalee ali Zakariya i-yanee ali Elizabeti. Aliwa tatookala banjani wa vyawa vinjinji mbwenye katana mwana. Dambo n’nango Zakariya avelelanga sembe mu nyumba yavakhundu, atoom’mona ngelo Gabirieli. Zakariya atoova maningi mbwenye Gabirieli atoom’mwandela ira: ‘Khuove. Nditoudhelana milanyu yapama yokhumela wa Yohova. I-yanaa unodha kaana mwana thitho mwanuo mudham’va-e dhina loi Juwau. Yohova unofuna ira Juwauo alabe basa yavakhundu.’ Zakariya atoom’fuka ira: ‘Nnga ndinaroromele a-vi vinondiwandela nyoovi? Miyo na-iyananga nitomala ulula thitho pyo-oodeya kaana mwana.’ Gabirieli aongile ira: ‘Nlungu ngundirumile ira ndidhauwandele vyevi. Mbwenye voi khunaroromela unokala o-oonga fiyedhela mwanuo baliwa.’

Zakariya atookala m’mba mwa nyumba yavakhundwiyo wahora indendai. Angakhumile atu tanoofuna idhiwa vyam’mwiri-idhe dembuwa. Mbwenye Zakariya kaaoda onga. Ee-no atooroma onga na mandha. Atwao tangaoni vyevyo tatoozindiyela ira utowachela milanyu yokhumela wa Nlungu.

Vangavirile hora, vyaongile ngelule vyatooireyadi. Elizabeti atokaana wise ongobala mwana wa lombwana. Afwee a Elizabeti na abalee tanoodha dham’mona mwanuo thitho tatoosangalala maningi. Ee-no Elizabeti atoawandela ira: ‘Dhina la mwanula ndi Juwau.’ Atwao taongile ira: ‘Banjani mwinyu kamuli mutu una dhina ninga leli. N’nga a-vi weyo m’va-a dhina la babee loi Zakariya?’ Adhamale Zakariya atoolemba ira: ‘Dhinalee ngu Juwau.’ Angalembile dhinalo atooroma onga. Mwasa oonga vya mwanula watoovweya mu Yudeya mwethene thitho atu tanoodabwa noonganga ira: ‘N’nga mwana wen’na adhaulukhula unodhakala oi a-vi?’

Moi ee-no Zakariya atoodhaleliwa na zimu ochena. Liye atoonga ira: ‘Yohova atitimi-iwe. Liye atom’lanyedha Abrahamu ira unodha m’ruma Mesiya ira adhanivulumuche. Juwau unodha kala namaongela thitho unodha saka-edha ndhila ya Mesiya.’

Vahora yen’na vyongo vinango vyova-a ifunelo vyatoom’mwireela thitho balee wa Elizabeti dhinalee Mariya. Ninotapanyani vyevyo mu muru o-arela.