Yesu atookala Mesiya

Juwau alaleela ira: ‘Mutu mwinango okwaranya miyo unaaudha.’ Yesu angana vyawa 30 atoodhowa i-njeni wa Yordani weo wabadiza Juwau atu. Vahora yen’na Yesu akumela wu Galileya. Liye afuna ira Juwau am’badize mbwenye Juwauo atoonga ira: ‘Khaabe miyo kandili ofwanelela ubadizani. Nyo nguli ofwanelela ndibadiza miyo.’ Yesu atoonga ira: ‘Yohova unofuna ira undibadize.’ Ee-no atoodhowa i-njeni mwa Yordani moi e-no Juwau atoom’badiza Yesu moira m’bwini-a tutulee lothene.

Yesu angathavuwile ma-injenimo atooroma lobela. Ee-no dhulu watoodhuleya zimu ooneya ninga kangaiwa watoothitha dham’gotela. Adhamale Yohova atoonga angali dhulu ira: “Ula ngumwananga odhiveliwiwa, unom’dhiveliwana miyo.”

Zimu wa Yohova ungafiile va Yesu, Yesuo atookala Kristu venango ira Mesiya. Ee-no atooroma laba basa lam’rumile Nlungu.

Yesu angabadiziwile wene atoodhowa kokolani thitho atookala weo malambo 40. Juwau angam’moni Yesu adhanga atoonga ira: ‘Ula ngumwana libila la Nlungu unofuna kumi-a madawo ailamboi.’ N’nga utoidhiwa vyaireile vahora Yesu vyali liye kokolani? Ninoonani vyaireile mu muru o-arela.