Yesu atoogumanana i-yana wau Samariya vaisimeni

Paskwa ungamadhi, Yesu naanamafunjedhee tatooroma ulendo owelela wu Galileya, mbwenye tadhele wu Samariya. Tangafiile sidadi lau Sukari, Yesu atooimela vaisimeni ya Yakobo. Anamafunjedhee tatoom’iya avumanga aliwa dhowa magula yodya sidadimo.

Ee-no vatoofiya i-yana mwinango dharunga ma-inje. Yesu atom’mwandela i-yanuo ira: “Kandiva-emo ma-inje omwa i-yanawe.” Moi ee-no i-yana wau samariule atoom’fuka Yesu ira: ‘N’nga vinaodeya a-vi nyo Muyuda ndivephanga miyo i-yana wau Samariya ma-inje? Namwasa oi Ayuda na Asamariya katinovwelana.’ Vowakhula Yesu atoom’mwandela i-yanuo ira: ‘Mwa-aidhiwe vya yotuva yapezi ya Nlungu na mutu unouwandelani ira mundiva-emo ma-inje ira ndimwe, mwangam’vephile liye thitho angauva-idheni ma-inje aingumi.’ I-yanuo atom’mwandela Yesu ira: “Mbwiye, nyo kamuna kabungu orungana ma-inje thitho isimei chodi-a. N’nga ma-inje aingumao mwaarungile wani?” Vowakhula Yesu aongile ira: “Mutu unofuna dhamwa ma-inje anofuna miyo dham’va-a kanodha kaana okoka tona navang’onovene.” I-yanuo atom’mwandela Yesu ira: ‘Mbwiye mundiva-emo ma-injao ira nda-akaenave okoka tona thitho ira nda-adhe okoka uno dharunga ma-inje.’

Ee-no Yesu atoom’mwandela i-yanuo ira: ‘Dhowa umam’mwandele man’naa.’ I-yanuo atoom’mwakhula ira: ‘Kandina lombwana.’ Yesu atom’mwandela ira: ‘Mutoonga phama vowakula ira kandina lombwana.’ Mutoongadi vyaimbarimbari namwasa oi mwatootheliwa na alombwana 5 thitho lombwana unanyo va-eni kaimaninyu.’ I-yanuo atoonga ira: ‘Mbwiye nditozindiyela ira nyo muli Namaongela. I-yo ninororomela ira ninofwanela lambela Nlungu mwangonimu, voi nyo Ayuda munoonga ira ninofwanela dhowa mam’lambela Yohova wu Yerusalemu. Mbwenye ndinororomela ira Mesiya adhadha unodha nifunji-a ira n’nga ninalambelenga a-vi.’ Ee-no Yesu atom’mwandela vyongo vyoi ali a-anawandelevo mutu uliwethene. Liye aongile ira: ‘Miyo ndili Mesiya.’

I-yanuo atootamanga mawandela Asamariya afwee ira: ‘Nditogumanana Mesiya. Liye utoidhiwa vyothene vyokuza miyo. Dhoweni mumam’mone.’ Atwao tatoodhowa vambo-i na liye thitho Yesu atoafunji-a vyongo vinjinji.

Ee-no atookalave naaliwa wa malambo menli aafunji-anga thitho atu anjinji tanom’roromela. Ee-no tatoom’mwandela i-yanule ira: ‘Vyongo vivwide i-yo wamutula vinonikami-a idhiwa ira liye ngunamavulumucha wailambo.’