Yesu atooili-a mutu vadambo la Sabudu

Afarisi tanoomwidanana Yesu thitho tanoofuna m’fwanyela mwasa ira tam’mange. Aliwa taonga ira Yesu kaafwanelela ili-a atu vadambo la sabudu. Vadambo n’nango la sabubu, Yesu atoogumanana mutu mwinango o-oona wenuo avephecha kobiri ndhila. Liye atoawandela anamafunjedhee ira: ‘Dedi-ani muone mwemo kopolo dha Yohova munofuna aliwa kami-a mutula.’ Adhamale Yesu atoothurela mare vathi noamunya kala marogodo. Adhamale atoo-ela marogodwao muthoni mwamutuo nom’mwandela ira: “Udhowe umasusule wu Silowe.” Mutuo atoodhowadi thitho atooroma ona.

Atu tatoodabwa maningi na vyevi moi tatooroma m’fuka ira: ‘N’nga mutula ngwen’ne avephechule, venango ngu mutu mwinango utelandana baa-i naliye?’ Mutuo atoonga ira: ‘Ngu miyo thitho ndabaliwile o-oona.’ Atwao tatoom’fuka ira: ‘N’nga chini iireile ira urome ona?’ Liye angaawandenle vyevyo vyaireile, tatoom’tukula nom’dhowana wa Afarisi.

Mutuo atoawandela Afarisi ira: ‘Yesu atoomunya marogodo nondi-ela muthoni thitho atoondiwandela ira ndimasusule. Ndingadhowile masusula, ndatooroma ona.’ Mbwenye Afarisao taongile ira: ‘Akala Yesu unoili-a atu vadambo la sabudu, pyoi kopolodhee kai dhokumela wa Nlungu.’ Mbwenye atu enango taonga ira: ‘Aakale ira kopolodhee kai dhokumela wa Nlungu, kaaodenga ili-a atu.’

Afarisi tatooitana anamabala amutu abaliwile o-oonule noafuka ira: ‘Viodeile a-vi ira mwaninyula aromenga ona?’ Mbwenye anamabaleao tanoova namwasa oi Afarisi tanoom’kumi-a musinagoga mutu uliwethene am’roromela Yesu. Ee-no tawakhunle ira: ‘Kaninoviidhiwa. Mum’fuke mwinyaa.’ Afarisi tatoom’fuka mutuo vyofuka vinjinji fiyedhela liye awakula ira: ‘Nditomala uwandelani vyothene. Mwasiwa ngwan’ni munave ndifuka?’ Afarisao tatoothakaleliwa na vyevyo thitho tatoom’ponyedha undhe.

Yesu atodhowa weo wali mutuo thitho atom’fuka ira: ‘N’nga unororomela Mesiya?’ Mutuo atoowakhula ira: ‘Ee ndingaodile m’roromela aakale ira nditom’mwidhiwa.’ Yesu atom’mwandela ira: ‘Miyo ndili Mesiya.’ Veva Yesu atoothonyi-edha ira ali oriya rima. Ninoonga e-no namwasa oi atom’mwili-a mutuo thitho atoom’kami-a ira akaena iroromelo.