Yesu atoowenda vadhulu vama-inje

Wenjedhela voili-a marenda novenyathi-a atu okwa, Yesu anooda thitho tonga liphevo na dhongwe. Dambo n’nango, Yesu angamadhi lobela mwangoni, atoona vabara ya Galileya vangali liphevo nlukulu na mabimbi. Arumiwee tangali barukuni tanoolimbana liphevo vabaranivo. Ee-no liye atoothita va mwangoni noroma wenda vadhulu vama-inje nodhowanga weo wali baruku yaarumiwee. Arumiweao tangaoni mutu awendanga vadhulu vama-inje, tatoova maningi mbwenye Yesu atoawandela ira: ‘Kamuove ngumiyo.’

Pedru angaoni vyevyo atoonga ira: ‘Mbwiye akala ngu nyo, ndiwandeleni ndidhe uli nyoowo.’ Yesu atoom’mwandela ira: ‘Udha.’ Ee-no Pedru atookuma barukunimo noroma wenda vadhulu vama-inje dhowanga weo wali Yesu. Mbwenye angam’mwandamele, atooing’ana liphevo. Adhaire ee-no atoova thitho atooroma bwina. Liye atookuwa ira: ‘Mbwiye, ndikami-eni.’ Yesu atoom’inda dhandha nom’fuka ira: ‘Mwasiwa ngwan’ni watooroma kaikela? Iroromelwaa ili wani?’

Yesu na Pedru tatoongwela barukunimule, hora yeniyene liphevo latooparari. N’nga unothuulela ira arumiweao tavivwide a-vi? Aliwa tatoonga ira: “Mwaimbarimbari nyo muli mwana Nlungu.”

Kai hora yeniyo baa-i Yesu vyairele liye vyodabwi-a vyevi. Vahora inango angali naarumiwee barukuni, Yesu atoodhowa nduli wa baruku nogonanga. Angali muirulo, vabaranivo vatoroma liphevo. Mabimbi tanookoma barukulo thitho barukunimo mwatoovolowa ma-inje. Arumiwee tatoom’venyathi-a nom’mwandela ira: ‘Namafunji-a ninokwa pepani nikami-eni.’ Angavwide vyevyo atooveyathi nosumulula liphevolo thitho atoowandela bariyo ira: “Parari ufwaseye.” Angaongile ee-no liphevolo latooparari thitho baranimo mwatoofwaseya. Ee-no Yesu atoofuka arumiwee ira: ‘Mwasiwa ngwan’ni munoova e-ni, n’nga kamuna kaenave iroromelo? Arumiwao tatooroma fukana ira: “N’nga mutu wen’na ngoi a-vi, liphevo na bara vinooda m’vela.” aliwa tatoofunjedhavo vyongo ira akala anom’roromela Yesu, katafwanela ova yongo iliyothene.