Yesu atoodyi-a atu anjnji

Dambo n’nango arumiwi tatoodha kumela walaleela aliwa. Vahora yeniyo paskwa wa 32 C.E., wali unga-adhi vang’ono ireya. Arumiwao tali tangachenyenle maningi. Yesu atoovenyathi naaliwa na baruku nodhowa wu Betisaida. Tangawandamenle rundani tatoona ira atu anjinji tali tangamadhi fiya wale thitho taira m’dedi-a. Angalive ira yali hora yoi avume naanamafunjedhee, Yesu atoawachela pama. Atooili-a atu othene abulela moi ee-no atooroma afunji-a. Yesu atoafunji-a vya Umwene wa Nlungu dambo lothene. Ee-no namaulo, anama-arelee tatoom’mwandela ira: ‘Atwala atokaana ndhala, mwaawandele ira tamasake yodya.’

Yesu atoawakhula ira: ‘Katidhowe. Nyo mwaava-e yodya.’ Arumiwao tatoom’fuka ira: ‘Munothapulela ira nidhowe nimaagulele vyodya?’ Ee-no rumuwi mwinango dhinalee Filipi, aongile ira: ‘Masiki na-akaena kobiri dhinjinji kanaode gula yodya yaatu othene enala.’

Yesu atoafuka ira: ‘N’nga yodya ina i-yo choinjiva moi a-vi?’ Andreya aongile ira: ‘Choyeva maningi. Nina mapau 5 na somba mbili baa-i.’ Ee-no Yesu aongile ira: ‘Dhanani vyevyo uno.’ Adhamale atoawandela atwao ira takaathi vamalachini mumagurupu 50 venango 100. Yesu atootukula mapau na somba mbili noing’ana dhulu thitho atoolobela. Moi ee-no atoovelela yodyayo waanamafunjedhee thitho anamafunjedhao tatoogawedha atu. Vali alombwana 5.000 thitho a-iyana naa-ima mbwenye othene tatoodya norumbala. Arumiwao tatoogumanya vyo-ala vyoi vyatookwakwana migogoda 12, vyevi vyali vyodabwi-a maningi.

Atu tangaoni vyevi tatoodabwa maningi moi tafuna ira Yesu akale mweniwa. Mbwenye Yesu atooidhiwa ira hora yeniyo kaali hora yafuna Yohova ira liye akale mwene. Ee-no atoawandela atu othene ira tadhowenga thitho liye naarumiwee tatoodhowa kombela n’nango la bara ya Galileya. Arumiwao tatoogwela barukuni mbwenye Yesu atoodhowa ekene mwangoni ira amalobele wa Babee. Yesu anoodhilimbi-edha fwanya hora yolobela wa Babee angalive ira anoopingeya maningi.