Yodya yanamaulo yogomi-edha ya Mbwiye

Ayuda tatooira pwando la paskwa va dambo la 14 la mwedi wa Nisani. Aliwa tanooirana vyevi vothuulela vyaairele Nlungu vowakhumi-a wu Iguputu ira takhale muilambo yolanyedhiwa. Mu yawa ya 33 C.E., Yesu naarumiwee tatooira mwambula wu Yerusalemu mu kwartu yadhulu. Vogomi-edha Yesu atoonga ira: ‘M’mbo-i wa nyo unodha ndivelela.’ Arumiwao tatoodabwa maningi thitho tatom’fuka Yesu ira: ‘Munoonga naani?’ Yesu atoawakhula ira: ‘Unofuna miyo m’va-a pawila.’ Adhamale atoom’va-a pau Yudasi Isikarioti. Hora yeniyene Yudasi atookhuma.

Yesu atoolobela, adhamale atooimeyameya pau noivelela waarumiweao. Thitho aongile ira: ‘Dyani pauwila. Inoimelela manungwanga anofuna dhaveleliwa namwasa wanyo.’ Adhamale atolobela okoka novelela vinyu wa arumiweao. Aongile ira: ‘Mwani vinyula. Unoimelela sangiranga inofuna veleliwa naifunelo yoi vyodawa vyaatu vileveleliwe. Muirengana vyevi yawa iliyothene vondithuulela. Ndinoulanyedhani ira ninodha tongangani vambo-i dhulu.’ Romela vahora yeniyo, anama-arela a Yesu tanooira mwambo othuulela ukwawee yawa iliyothene. Mwambo wen’na unoitaniwa yodya yanamaulo yambwiye.

Mwambula ungamadhi, arumiweao tatooroma kangana. Mwasee wali oi ndimuwa mbaani. Mbwenye Yesu atoawandela ira: ‘Ndimuwa maningi wanyo mwethene, ngwenuo unodhiona ira ngumwana maningi.’

‘Nyo muli afwanga. Ndinouwandelani yongo iliyothene inofuna Babanga ira ndiuwandeleni. Vachineneeva ndinodhowa dhulu wa Babanga. Atu anodha idhiwa ira nyo muli anamafunjedhanga akala munodhivelana. Ee-no mudhivelanenga ninga mwemo munoudhiveliwanani miyo.’

Vogomi-edha, Yesu atoom’vepha Yohova ira abarele anamafunjedhee. Atoovepha thitho ira aakami-e ira tairenga vyongo movwelana. Thitho atoovepha ira dhina la Yohova licheni-iwe. Adhamale Yesu naarumiweao tatoomba nyumbo dhom’titimi-a Yohova. Tadhamale omba nyumbo tatookhuma kwarutunimo. Ee-no hora yoi Yesu amangiwe yatookwivela.