Yesu atoomangiwa

Yesu naanamafunjedhee tatoovandela dimba la Kidironi nodhowa mwangoni wa maolivi. Vahora yeniyo hora yali ingakwaranyile zero hora thitho mwedi wali ungakhumile wethene. Angafiile mundani mwa Gesemani, Yesu atoawandela anamafunjedhee ira: “Mukaathi vano miyo ndinaamalobela.” Ee-no angadhowile vasogolo vang’ono atookokora noroma lobela. Mbwenye atooroma rucheya maningi rimanimwee thitho atoolobela wa Yohova ira: “Vinofunanyo viireye.” Yohova atom’ruma ngelo dham’limbi-a Yesu. Angadhowile vali anamafunjedheale, aafwaidhe tagonanga. Liye atoawandela ira: ‘Muvenyathi yen’na kai hora yogona. Hora itofiya ira ndiveleliwe waamwidani.’

Va-anavire hora Yudasi atookumelela na gulu laatu tangatukunle masarasada namichamu. Yesu naarumiwee tanoodhiveliwana virana mundani mwa Gesemani. Yudasi atooidhiwa ira unamam’fwanye Yesu weo. Liye atoawandela atwao ira ndinamaire yongo inagweyee ira muode m’zindeyela Yesu. Moi ee-no atoofiya vevo vali Yesu noonga ira: ‘Namafunji-a, mucheliwa.’ Adhamale atom’bejari. Mbwenye Yesu atoonga ira: ‘Yudasi, N’nga unaandivelela voira ndibejari?’

Yesu atookwivela gululo noafuka ira: “N’nga munom’saka ani?” Aliwa tatoowakhula ira: “Yesu wau Nazareti.” Moi ee-no liye atoawakhula ira: “Ngumiyo.” Mbwenye atwao tangavwide vyevyo tatoowelela nduli nogwa vathi. Yesu atoafukha okoka ira: “N’nga munom’saka ani?” Aliwa tatoowakula ira: “Yesu wau Nazareti.” Yesu atoawandela ira: ‘Nditouwandelani ira ngumiyo. Mwaa-iyachi ala ira tadhowenga.’

Hora yeniyene Pedru atootholola sarasadalee nogwanda libaru la Makasi, wenuo ali dhaari wa ndimuwa waalimbo velela sembe. Mbwenye Yesu atootukula libarulo noliweleli-edha valimburonivee thitho atoom’mwili-a. Moi ee-no atoom’mwandela Pedru ira: ‘Weli-edha sarasadalaa limburonimwee. Waphanga atu na sarasada, naweene thitho unodha phiwa na sarasada’. Ee-no anyakhondwao tatoom’inda Yesu nom’manga. Thitho arumiweale tatotawa. Moi e-no anyakhondwao tatoom’tukula Yesu nom’dhowanee wa ndimuwa waalimbo velela sembe dhinalee Anasi. Angam’fukile vyofuka atoom’dhowana wa ndimuwa mwinango waalimbo velela sembe dhilalee Kayafa. N’nga chini yaireile waarumiwee?