Pedru atoom’khonda Yesu

Yesu angali kwartu ladhulu, Atoawandela Arumiwee ira: ‘Ma-iyano nyo mwethene munotawa nondi-iya ndekhene. Mbwenye Pedru atoonga ira: ‘Miyo khabe. Masiki atu othene tatawe, miyo mekene kandinou-iyani.’ Mbwenye Yesu atoom’mwandela ira: ‘Thumbi a-anale weyo unodhaonga fendo uraru ira kunondiidhiwa.’

Vahora atu vyam’indile aliwa Yesu nom’dhowana wa Kayafa, Arumiwi othene tatoom’tawa mbwenye ambili tanoo-arela gulu laatulo. M’mbo-i mwaaliwa ali Pedru. Liye atoovolowa naaliwa m’mba mwa Kayafa nootanga mulo naatu enango. Ee-no namalaba mwinango wa sikana atoom’zindiyela Pedru noonga ira: ‘Andimuwa nditouwidhiwani nyo mwali vambo-i na Yesu.’

Pedru atoowakhula ira: ‘Khabe miyo kandali naliye, thitho vinoonga weevyo kandinoviidhiwa.’ Adhamale atookhumavo nodhowa makala valango. Mbwenye namalaba mwinango wa sikana angam’moni atoowandela atu ira: ‘Ndimuula thitho ali vambo-i na Yesu.’ Mbwenye Pedru aongile ira: ‘Miyo Yesu kandinom’mwidhiwa navang’onovene.’ Ee-no lombwana mwinango atoonga ira: ‘Weyo uli namafunjedha wa Yesu. Maongelwaa anooni-a ira uli wau Galileya.’ Mbwenye Pedru atoolumbela ira: ‘Mwaimbarimbari miyo kandinom’mwidhiwa wenuo!’

Vahora yeniyo Thumbi atoola. Adhamale Yesu atoodhimbinuwa nom’mwing’ana Pedru. Ee-no Pedru atoothuulela vyaongile Yesu moi Pedru atookhuma vandhe noroma ula thitho vikhumbanyedha maningi.

Anamatonga a tribunale nlukhulu la Ayuda, tatoogumaneya m’mba mwa Kayafa ira tarome tonga selu wa Yesu. Aliwa tali tangamadhi vwelana ira tam’phe Yesu moi tasaka mwasa om’nukhedhela. Mbwenye katafwaidhe. Ee-no Kayafa atoom’fuka Yesu ira: ‘N’nga we uli mwana Nlungu? Yesu atoowakhula ira: ‘Ee.’ Ee-no Kayafa atoonga ira: ‘Kavanofuneelave thitho umboni mwinango. Unonyoza Nlungu wen’na.’ Anamatonga othene tatoorumelela ira: ‘Aphiwe baa-i.’ Ee-no atu enango tatoom’koma Yesu puradha nom’thurelanga mare. Tanookunela uthoni nom’koma, amala aliwa onganga ira: ‘Akala uli namaongela niwandele uukomile mbaani!’

Undhe ungachide, tatoom’tukula nom’dhowana wulimburo lotongelao miselu thitho tatoom’fuka ira: ‘N’nga we uli mwana Nlungu?’ Yesu atoowakhula ira: ‘Munoonga mwekene ira ndili mwana Nlungu.’ Veva tatoom’fwanyela selu onyoza Nlungu thitho tatoom’dhowanee wa ndimuwa wa anamatonga wau Roma dhinalee Potiyo Pilato. N’nga weo vyamadhi a-vi? Ninoonani mu muru o-arela.