Namaing’anela wa perezo atoofunjedha madhu a Yohova

Wu Filipi, watookala namalaba mwinango wasikana wenuo ana iwanda. Iwandiyo yanoom’mwiri-a ira sikanuo aongenga vyongo vyasogolo thitho yanoiri-a ira afumi-enga mapatrawee. Ee-no Paulo na Sila tangafiile wu Filipi, malambo manjinji sikanuo anoa-arela. Iwandiyo yanoom’mwiri-a kuwanga ira: “Atwala mbaadhaari a Nlungu Wadhuludhulu.” Paulo angachenyenle uvwa vyevyo atoowandela iwandiyo ira: “Ndinouwandela mudhina la Yesu Kristu ira ukhume mwasikanuo.” Hora yeniyene iwandiyo yatookhuma.

Mapatarau asikanula tangaoni ira ngariwa yofwanya kobiri itomala, tatoothakaleliwa maningi. Tatoo-inda Paulo na Sila nowadhowana wa anamatonga thitho taongile ira: ‘Atwala katino-arela malamulo thitho anododomi-a maningi sidadili.’ Ee-no andimuwa amaguverno tatootonga ira Paulo na Sila takwapuliwe no-eliwa perezo. Tatoa-ela perezo mokala isi thitho tatoamanga matandaza.

Tangali Perezonimo Paulo na Sila, tanoomba nyumbo dhom’titimi-a Nlungu thitho anyaperezo enango tanoovuruwana. Ee-no vari vama-iyu, vatooireya indharandhara yeniyo yatekenyile maningi perezwiyo. Misuo yothene ya perezwiyo yatoodhuleya thitho makurenti tatoothathuleya. Namaing’anela perezule angatamangile nofwanya Misuo yothene itomala dhuleya atoothuulela ira anyaperezo othene atomala tawa. Ee-no atootukula sarasada ira adhiphe.

Mbwenye Paulo atoom’mwandela ira: ‘Kudhiphe, i-yo othene nili muno.’ Namaing’anela perezo atoovolowa mombaranya nokokora duzi na vali Paulo na Sila. Ee-no atoafuka ira: “N’nga ndiiren’ni ira ndidhavulumuwe?” Aliwa tatoom’mwakhula ira: ‘Weyo vambo-i na banjalaa munofwanela roromela Yesu.’ Ee-no Paulo na Sila tatooroma m’funji-a namaing’anela perezo na banjalee lothene madhu a Yohova thitho othene tatoobadiziwa.