MURU 9
N’nga ninaire avi ira nikhozeelenga phama migumanwi-u?
Camboja
Ukaraniya
Akhala ira munofunjedha Bibilya na wa Mboni dha Yohova, hora dhothene munofwanela khozeela vinofunanyo funjedha. Ira muganyalinga na migumano yapingo vili phama khozeela mwa-anadhowe migumanoniwo. Vyongo vinouwendelani phama akhala ira mutokhaana ndandanda youkhami-ani khozeela.
Sakhani hora na limburo laphama lofunjedhela. N’nga njihora ivi inaodenyo khozeela phama? Namabebe-i mwa-anarome i-nda basa, venango nama-iyu a-iminyu tangagonile? Akhala ira khamunaode funjedha hora indendai, sakhani hora youdhivelani ira mufunjedhe, thitho khamurumele ira yongo iliyothene yuuiri-eni afunjedha. Sakhani limburo laphama thitho muone ira valimburonivo khavali yongo yofuna udhodhomi-ani. Munooda ira vyevyi vomiyali-a televizau, telefoni, venango radio. Ira lobelo mwa-anarome funjedha unoukhami-ani ira mwa-asimbwenga thuulela vyongo vyoireya vya sikhulelo. Vyevi pyofuneya ira vyothuulela vinyu vyothene vyikhale vamadhu a Nlungu anofunanyo funjedhao.—Afilipi 4:6, 7.
Mu-elenga izindiyelo vamakhundo afwaidhe nyo mwakhozeelanga ira mumawakhule. Mwa-anakhozeele, muromenga ona mwasa othene mogwandela ira muode khaana iruthiruthi yamwasuwo. Munooda ira vyevyo vothuulela muru wamwasuwo, thitho miru dhamwari munowvelanela aliwa na muru nlukhulu wamwasuwo. Muonenga virutiruthi thitho vyofukha yvoweli-edha vyevyo vinothonyi-edha makhundo malukhulu a mwasuwo. Mwaira-eno, muleri ndima iliyothene na yofukha yiwa na dhilimbi-edha fwanya yowakhula ya yofukha yeniyo. Muleringa Bibilyani mwinyu malemba ali mmwasaweniyo na thuulela mwemo munavwelanela aliwa na mwasuwo. (Mayirelo 17:11) Akhala ira mutofwanya yowakhula ya yofukha yeniyo, e-lani izindiyelo vamakhundo ofuneya va yowakhula yeniyo, vyevyo vinoukhami-ani ira mudhathuulele yowakhula yeniyo. Eno mwadhowa migumanoni munooda venyathi-a ndhandha ira muwakhule mogwandela na madhu i-nyune.
Mwakhozeelanga myasa dho-iyana-iyana dhinofunjedha iyo sumana lili lothene vamigumanoni, munodha wenjedhela makhundo mapya a Bibilyani rimani mwinyu, mwemo muli ninga molokhotedhamo “fuma.”—Mateu 13:51, 52.
N’nga muna-arele ndandanda ivi vokhozeela migumano?
N’nga munakhozeele avi ira mumawakhule vamigumanoni?