Dhaari ororomeleya na wazelu mbaani?

Yesu anga-adhi vang’ono ira aphiwe, tatotapanya na anamafunjedhae anai vakhundu: Pedru, Tiyago, Juwau, na Andreya. Vevale Yesu vyavaelatu liye awandela yongo yafuna dhakhala izindiyelo yoi liye utoroma tonga, Yesu atofuka yofuka yofuneya vinjinji yoi: “Mbaani uli dhari ororomeleya na wazelu weniyo mbwiyae u-enle ira aing’anelenga anamalabae avandhe, naava-a yodya vaora yofwanelela?’’ (Mateu 24:3, 45; Marku 13:3, 4) Yesu ninga “mbwiye’’ wa anamafunjedhae owaroromeli-a ira unodha ela “dhari’’ oi hora dhothene tadhavelelenga yodya yaunemba wa anama-arelae othene, va hora yakomoni. N’nga dhaari wenna mbaani?

Aliwa tigulu ling’ono la makristau ozoziwa a Yesu. “Dhaari’’ wenna unaitaniwa ira Gulu Lotonga la Mboni dha Yohova. Liye unovelela yodya yaunemba wa anamalaba a Yohova. Iyo ninanyindela dhaari ororomeleya ira niwachelenga “yodya yokwakwanela va hora yofwanela.’’—Luka 12:42.

Dhari wen’na unaing’anela mbumba ya Nlungu. (1 Timoteo 3:15) Yesu utomva-a dhaari izo yosogolela basa inalabiwa vailambwila na atu a Yohova: Dhaarula unoing’anela basa lolaleela, unonifunji-a dhela mumpingoni, thitho unoing’anela vyongo vyothene vya gulu la Yohova. “Dhari” ororomeleya na wazelu unogawa yodya yaunemba dhela mabuku analabi-edha i-yo urumiwini, na enango anofunjedha i-yo migumanoni yapingo na migumano milukhulu.

Dhari ngororomeleya na mwasa oi uno-arela imbarimbari ya Bibilyani vamwasa olaleela; thitho gwazelu namwasa oi unoing’anela mwazelu basa la Kristu vailambo yavathi. (Mayirelo 10:42) Yohova unana raeli-a basa linalaba dhaarula vowenjedheya waatu thitho vovelela yodya yaunemba.—Esaya 60:22; 65:13.

• N’nga Yesu u-elile liye mbaani ira ava-enga anama-arelae yodya yaunemba?

• Mwasiwa ngwan’ni ninaonga ira dharula ngororomeleya thitho ngwazelu?