N’nga kobiri dhokhami-a basa li-u lavailambo yothene dhinakhumela wani?

Gulu li-u linomwadha no gawa Mabibilya na mabuku enango mo-ophagali-a, thitho ninomanga no sakha-edha Nyumba dha Umwene na maofesi-u. Ninokhami-a atu anjinji enao analaba Beteli, mamisionario, thitho waireya soka ninokhami-echa atu enawo takhuziwile. Venango munodhifukha ira: ‘N’nga kobiri dholabi-edha basa lotheneeli dhinakhumela wani?’

Khaninawandelecha atu ira tavelelenga kobiri venango wendi-a pharato ira ta-elengamo vyovelela. Angalive ira basa lolaleela tofuna kobiri dhinjinji, khaninavephecha kobiri waatu. Vyawa vyokwaranya 100 vivirile ndulimu magazini ya Nsanja ya Olonda yaongile vyoi ninororomela ira Yohova nguliye unanikhami-a. Eno “chipo khaninavepha venango akhokorela atu ira tanikhami-e vabasali,’’ thitho chipo khaninaira vyevyo.—Mateu 10:8.

Kobiri dhinalabi-edha iyo basa tiyedho dhinavelelecha atu modhifunela okhene. Atu anjinji tanosimba basa li-u lofunji-a Bibilya eno tanovelela kobiri dhokhami-a basali. Naaliwene thitho a Mboni dha Yohova tanovelela kobiri dhiwa, na vyongo vyo-iyana-iyana, thitho tano-indi-edha basa hora na nguru dhiwa vokhami-a ira ifunelo ya Nlungu ireye vailambo yothene yavathi. (1 Limbili 29:9) Nyumbani Yaumwene na migumanoni mwi-u ilukhulu unokalecha makaxa a vyovelela ira uliwathene unafuna velela avelele mofuna mwae. Vilambo vinango abali tanavelela vyovelela viwa dhela va saitini ya jw.org. Hora dhinjinji kha-i atu ofumave tanavelela kobiri makaxanimo. Anjinji tanakhala ninga mwana-iyana waphawi venango osauwa wenne Yesu wansimbile liye anga-enlemo visikobiri ving’ono vinli makaxani a vyovelela vya kachisi. (Luka 21:1-4) Eno, hora dhothene uliwathene uno-ela iliyathene tumbani mwae ira adhavelele “movwelana na mwemo musikimizele liye rimani mwae.’’—1 Akoritiyo 16:2; 2 Akoritiyo 9:7.

Nitokaana iroromelo yoi Yohova unodhowanave limbi-a atu ira “tanlemezenga na vyongo viwa vyaphereso indendai” na dhowi-a sogolo basa la Umwene, thitho namwasa oi ifunelo yae ikwakwanele.—Sanganikho 3:9.

• Chini jina-iyani-a gulu li-u na mareligiau enango?

• N’nga kobiri dhinaveleliwa dhina-indi-edhiwa basa avi?