Atu 8 tatoovulumuwa

Nowa na banjalee tatoovolowa mwadiyanimo vambo-i na vinyama. Vasogolovee Yohova atoofunga suo thitho dhongwe watooroma rumbwa. Watookala dhongwe m’njinji maningi thitho wa kopolo moi mwadiya watooroma beluwa. Ee-no ma-inje tatoodhala vailambo yothene yavathi moi atu othene ta-avolowile mwadiyani tatookwa. Mbwenye Nowa na banjalee tatoovulumuwa. Vinooneya ira tatoosangalala maningi voidhiwa ira tatoom’vwela Yohova.

Dhonguo watoorumbwa malambo 40 thana na ma-iyu. Adhamale watoochi-a thitho ma-inje tatooroma welelela. Ee-no mwadiya nlukuluo watoozakama vamwangoni. Mbwenye vailambo yavathi vali vangali ma-inje manjinji, e-no Nowa na banjalee tatookalave mwadiyanimo.

Ma-injao tatooroma welela vang’ono navang’ono. Nowa na banjalee tatookala mwadiyanimo wa hora yokwaranya yawa imbo-i. Adhamale Yohova atoawandela ira takume thitho vyakala ninga anovolowa muilambo ipya. Aliwa tatoom’simba maningi Yohova namwasa owavulumucha moi tatoovelela sembe.

Yohova atoosangalala maningi na sembiyo. Yohova atoolanyedha ira kanodha i-ndi-edhave basa igumula vononga vyongo vailambo yavathi. Vosikimizela vyevi Yohova atoiri-a ira dhulu uoneye zirilimbo. N’nga utoroma uonavo zirilimbo?

Adhamale Yohova atoom’mwandela Nowa na banjalee ira tabale a-ima nodhali-a ilambo yavathi.