MURU 12
Yakobo atoowachela maraeli-o
Izaki angana vyawa 40 atoothela Rabeka thitho anoom’dhiveliwana maningi. Vira wahora atoobala a-ima ambili anasambili.
Oroma baliwa dhinalee ali Ezau wanambili ali Yakobo. Ezau adhiveliwana kokolani masayanga nyama. Mbwenye Yakobo adhiveliwana laba mabasa avandhe.
Vahora yeniyo baba akwa, mwana wandimuwa ngwenuo ava-iwa limburo nlukulu thitho kobiri dhinjinji dha banjalo. Vyava-iwa liyevyo vyaitaniwa vyotuva. Mu banja la Izaki yotuva yei yathangani-avo vyongo vyalanyedhile Yohova wa Abrahamu. Ezau kaathuulela maningi vyolanyedha vyevi, mbwenye Yakobo aona ira vyolanyedha vyevi pyofuneya maningi.
Dambo n’nango Ezau angadhowile masaya, awenleo angali ochenyela maningi thitho atookaana ndhala. Afwaidhe Yakobo apiyanga vyodya vyonukela maningi voi atoom’mwandela Yakobo ira: ‘Kandiva-emo nditokaana ndhala maningi.’ Yakobo awakhunle ira: ‘Ndinoova-amo, mbwenye urome ndilanyedha ira ndinowachela maraeli-oaa.’ Ee-no Ezau atoowakhula ira: ‘Miyo kandinavyo basa namaraeli-o. Wachela maraeli-oao inofuna miyo khudya baa-i.’ N’nga unothuulela ira eva Ezau atoothuulela pama? Khabe, ninoonga e-no namwasa oi liye atoovelela yongo yofuneya maningi kwaranya parato yavyodya.
Izaki angaulule, yali hora yoi avelele maraeli-o wa Ezau namwasa oi liye ali ndimuwa. Mbwenye Rabeka atoom’kami-a Yakobo ira awachele maraeli-oao. Ezau angazindiyele ira Yakobo utowachela maraeli-oee, atoothakaleliwa maningi thitho anoofuna m’pha baleuo. Izaki na Rabeka tanoofuna m’barela Yakobo, ee-no tatoom’mwandela ira: ‘Udhowe wu Harana wa titiwaa Labani. Umakale weo fiyedha rima wa Ezau ungakhurudheile.’ Yakobo atoovwela vyaongile anamabalee thitho atootawela wu Harana.
“N’nga mutu unaganyali n’ni akaana vyongo vyothene vyavailamboi mbwenye liye luza ingumiyee? Venango, n’nga mutu unavelele n’ni ira aode gula ingumiyee?”—Marku 8:36, 37