Mose atoosakula ira am’lambelenga Yohova

Wu Iguputo atu abanja la Yakobo tatooroma idhiweyana dhina loi Aisraeli. Yakobo na Yosefi tangakwide, Farau mwinango atooroma tonga. Liye anoaova Aisraeli namwasa oi aliwa taira injiva kwaranya Aiguputo. Ee-no atooiri-a ira Aisraeli takale adhaari. Atoatonga ira taumbenga mabuloko thitho laba mabasa ochenyeli-a maminda. Mbwenye angalive ira tanooni-iwa nyarwa maningi na Aiguputo, Aisraeli tatoodhowanave injivi-ana. Voi Farau kaafuna vyevi, atootonga ira a-ima othene alombwana Aisraeli tabaliwa taphiwenga. N’nga munothuulela ira Aisraeli tavivwide a-vi lamulo leli lingakaathi-iwile?

Vyevi vingaireile, m’ma mwinango wau Israeli dhinalee Yokebedi, atoobala mwana wa lombwana obaleya maningi. Vofuna barela mwanuo, tatooluwa tanga nom’elamo nom’dhowana mu-inje wa Nilo. Rongolee mwanuo dhinalee Miriamu, Atokaathi vaduzi ira am’mwing’anelenga.

Ee-no mwana Farau wa-iyana angadhidhe ira a-ambe, atoona tangule. Angadhunle tanguo atoofwanyamo mwana. Mwanuo anoola thitho atom’vwela tangaranga. Miriamu atom’fuka mwana Farau wa-iyanuo ira: ‘N’nga vinoodeya ira ndimausakeleni mutu ira am’samalelenga?’ Mwana Farau angarumenle, Miriamu atoodhowa mam’mwandela m’mee. Tangadhidhe mwana Farauo atoawandela ira: ‘M’tukhuleni mwanuo mumam’samalelenga thitho ndinongo upagalini.’

Mwanule angaulukunle, Yokebedi atom’velela wa mwana Farau wa-iyanule thitho atom’va-a dhina loi Mose nokalanga naliye ninga mwanee. Mose asamaleliwa ninga mwana mwene thitho angaodile kaana yongo iliyothene yafuna liye, mbwenye liye kaam’diwanle Yohova. Anooidhiwa ira ali wa Anaisraeli a-kala wau Iguputu thitho atoosakula ira am’lambelenga Yohova.

Mose angana vyawa 40, anoofuna kami-a Aisraeli afwee. Ee-no angaoni mutu wau Iguputu am’komanga Muisraeli fwee, Mose atoom’khoma mutu wau Iguputuo fiyedha m’pha. Adhamale atom’lokota mutuo vasevani. Farau angaidhiwile vyevi, anoofuna m’pha Mose. Ee-no Mose atootawela wu Midiyani. Angali weo Yohova ali naliye.