Ana atoovepha mwana

Lombwana mwinango wau Israeli dhinalee Elikana atokaana a-iyana ambili. A-iyanao madhiniwa ali Ana na Penina. Mbwenye Elikana anom’dhiveliwana maningi Ana. Penina atokaana a-ima anjinji mbwenye Ana kaana mwana na mwasa wa vyevi, Penina anom’nyozecha Ana hora dhothene. Yawa iliyothene Elikana anoodhowa malambela wu Silo vambo-i na banjalee. Dambo n’nango angali weo, atoozindiyela ira Ana utosukwala maningi. Liye atom’mwandela ira: ‘Ana kule. Ndinoudhiveliwana maningi. N’nga miyo kandikwaranyidhe a-ima anofuna wee?’

Moi ee-no Ana atoovenyathi nodhowa malobela. Liye atom’vepha Yohova ira am’kami-e thitho anoolobela wu alanga mo-okhuwa. Ana atoolanyedha ira: ‘Yohova, mwandiva-a mwana wa lombwana, ndinodha uva-ani ira aulambelengani waingumiyee yothene.’

Moi ee-no ndimuwa waalimbo velela sembe dhinalee Eli, atoona milomo ya Ana itekenyeyanga moi athuulela ira utolezela. Mbwenye Ana atom’mwakula ira: ‘Khabe bwiyanga, miyo kandilezenle. Nditokaana nyarwa ilukulu maningi yeniyo inom’mwandela miyo Yohova.’ Eli atoozindiyela ira utodawi-a thitho atom’mwandela Ana ira: ‘Nlungu auva-e vivephile weevyo.’ Adhamale Ana atooroma dhivwa pama rimanimwee thitho atoowelela waniwa. Yawa ya-anamale atoobala mwana wa lombwana nom’va-a dhina loi Samueli. Vinooneya ira Ana atoosangalala maningi.

Ana kaadiwalile vyongo vyalanyedhile liye wa Yohova. Samueli anga-iidhe wamwa, atom’velela ira amalabenga sasani. Liye atoom’mwandela Eli ira: ‘Mwana wen’na ngwavepecha miyo hora yen’ne. Ndinom’velela ira am’labelenga Yohova vaingumiyee yothene.’ Yawa iliyothene Elikana na Ana tadhowanga mam’mona Samueli, tanootukulecha kamiza yogwanda miono nodhowa mam’va-a. Yohova atoova-a Ana a-ima enango aalombwana araru naa-iyana ambili.