Yohova atoonga na Samueli

Eli ali ndimuwa wa alimbo velela sembe thitho atokaana a-ima ambili enao talaba va sasani ninga alimbo velela sembe. Madhiniwa ali Ofeni na Finiyasi. A-imala katavwela malamulo a Yohova thitho tanoirela atu vyongo vyothakala. Aisraeli tadhana sembe dhoi tavelele wa Yohova, aliwa tanookula nyama dhapama dhowa madya. Eli atoovwa vyaira a-imeela mbwenye kaakami-idhe. N’nga Yohova airilen’ni vamwasa wen’na?

Vahora yeniyo Samueli ali mwana, mbwenye kaalandele makalelo othakalao thitho Yohova anoosangalala na liye. Dambo n’nango angagonathidhe, atoovwa mutu mwinango am’mwitananga. Samueli atoovenyathi nodhowa wa Eli, angafiile aongile ira: ‘Nditodha!’ Mbwenye Eli aongile ira: ‘Miyo kanduuwitan’ne. Dhowa umagonathi.’ Samueli angadhowile magonathi okoka atoovwa itana fendo yanambili. Fendo yaneraru, Eli atoozindiyela ira am’mwitana ali Yohova. Ee-no atom’mwandela Samueli ira auwitana okoka uwakule ira: ‘Ongani Yohova, miyo rumiwinyu ndinaauvwa.’

Samueli angadhowile magonathi atoovwa itana okoka ira: ‘Samueli! Samueli!’ Liye atoowakula ira: ‘Ongani Yohova, miyo rumiwinyu ndinaauvwa.’ Ee-no Yohova atom’mwandela ira: ‘Umam’mwandele Eli ira ndinom’langa liye vambo-i na banjalee. Liye unoidhiwa vyongo vyothakala vinoira a-imee vasasani, mbwenye liye unaalema.’ Undhe ungachide Samueli atoodhowa madhula misuo ya sasa ninga mwemo mwairelecha liye hora dhothene. Liye anoova m’mwandela ndimuwa wa alimbo velela sembuo vyam’mwandele Yohova. Mbwenye Eli atom’mwitana nom’fuka ira: ‘Mwananga, n’nga Yohova uuwandenle n’ni? Ndiwandele yongo iliyothene.’ Ee-no Samueli atom’mwandela vyongo vyothene vyam’mwandenle Yohova.

Yohova atoodhowanave m’sogolela Samueli. Atu othene amuilambo ya Israeli tatoidhiwa ira Yohova utom’sakula Samueli ira akale namaongela na namatonga.