Mwene oroma wa Aisraeli

Yohova atowava-a Aisraeli namatonga ira aasogolelenga. Mbwenye aliwa tafuna ira takaena mwene. Moi ee-no atwao tatom’mwandela Samueli ira: ‘Atu amaziza othene atokaana mwene. I-yo thitho ninofuna ira nikaena mwene.’ Vyevi kavyam’sangalali-idhe Samueli ee-no atoolobelela wa Yohova mwasula. Yohova atom’mwandela ira atwala katikondile weyo mbwenye takondile miyo. Waawandele ira pyoodeya kaana mwene, mbwenye taidhiwe ira mwenuo unodha funa vinjinji vyokumela waaliwa.’ Mbwenye atwao tatoonga ira: ‘Kavali yorucha i-yo ninofuna mwene baa-i.’

Yohova atom’mwandela Samueli ira Sauli ngunofuna kala mwene oroma. Ee-no Samueli atoozoza Sauli vom’ela makhura vamuruvee vahora Sauli yadhowile liye wu Rama mam’mona.

Ee-no Samueli atooitana Aisraeli othene ira aaoni-e mweniwa. Mbwenye Sauli kaalivo. Unoidhiwa wali liye? Liye ali angavithanle vari vamitolo. Moi ee-no tatoofwanya, nom’mwimeli-a vari vaatu. Sauli ali obaleya thitho olapa kwaranya uliwethene. Samueli atoonga ira: ‘Yohova um’sakunle wen’na.’ Atwao tatookuwa ira: ‘Mwene akaena ingumi yolapela.’

Voromavene Sauli anom’vwela Samueli thitho Yohova, mbwenye vasogolovee atoo-iya. Mwaifwanafwani-o, Mwene kaafwanela velela sembe. Mbwenye vahora inango, angalive ira Samueli atoom’mwandela ira am’dedi-e liye aona ira Samueli unaadembuwa ee-no atoovelela sembe. N’nga Samueli airilen’ni? Liye atoom’mwandela ira: ‘Kamuirile pama ee-no kamuvwele Yohova.’ Mbwenye Sauli kafunjedhilevo yongo.

Vahora inango Sauli angadhowile makhoma khondo na Amaleki, Samueli atom’mwandela ira amanonge yongo iliyothene ya muilambonimo. Mbwenye liye kaam’phide mwene waweo dhinale Agagi. Yohova atom’mwandela Samueli ira: ‘Sauli uto-iya ndivwela thitho kanondi-arela.’ Samueli angavwide vyevi, atoosukwala maningi thitho atoodhowa mam’mwandela Sauli ira: ‘Namwasa oi kamuvwele Yohova, liye utosakula Mwene mwinango.’ Vevo Samueli vyadhimbinuwile liye ira adhowenga, Sauli atoo-inda kamize yaundhe thitho yatoong’ambeya. Adhamale, Samueli atom’mwandela ira: ‘Yohova utong’amba umwene noukhumi-a wawee. Vyevi vyathapulela ira Yohova unooda velela umwenuo wa mutu unom’dhiveliwana thitho m’vwela.