Yonatani ali olimba rima thitho ororomeleya

Mwana oroma wa Sauli ali Yonatani thitho ali nyakhondo olimba rima. Davide atoonga ira Yonatani anootamanga maningi kwaranya ivangwe thitho ali wakopolo kwaranya kalamu. Dambo n’nango, Yonatani atoona anyakhondo 20 Afilisiti tangali vamwangoni. Liye atoom’mwandela namalabee wenuo am’tukhulela mafwaramento ira: ‘Ninooda agonji-a. Dhowe nione akala Yohova unoniva-a izindiyelo. Aniwandela ira nidhowe pyoi njihora yapama thitho ninamaagonji-e.’ Hora yeniyene Afilisiti tatookhuwa ira: ‘Dhani niwaneni!’ Yonatani na namalabeuo tatoogwela mwangonimo thitho tatoodhowa maagonji-a.

Voi Yonatani ali mwana oroma, ali ofwanelela dhavolowela umwene wa Sauli. Mbwenye liye anooidhiwa ira Yohova asam’khunle Davide thitho kaamwirela Sanje. Yonatani na Davide tanoovwelana maningi thitho tatoolanyedhana ira anongobarelana. Yonatani atom’va-a Davide yowara, sarasada, urwa na situ vothonyi-edha ira ngufwee wavarimani.

Vahora inango Davide am’tawanga Sauli, fweula atoodhowa mam’mwandela ira: ‘Ulimbe rima khuove yongo iliyothene. Yohova utousakhula ira ukale Mwene. Masiki Babanga utoidhiwa vyevyo.’ N’nga weyo khunofuna kaana fwaa wapama ninga Yonatani?

Yonatani anoo-ela ingumiyee vangovini vofuna m’kami-a Davide. Liye anooidhiwa vyoi Mwene Sauli unofuna m’pha Davide ee-no atom’mwandela Babeuo ira: ‘Babani munoidhiwa ira munaadawa? N’nga Davide uudaweleni n’ni ira mufunenga vyom’pha? Mbwenye Sauli atoothakaleliwa maningi na Yonatani. Vangavirile vyawa, Sauli na Yonatani takwele khondoni.

Yonatani angakwide, Davide atom’sakasaka mwanee dhinalee Mefiboseti. Angam’fwaidhe atoom’mwandela ira: ‘Miyo na babaa nanoovwelana maningi, ee-no ndinousamalela vaingumiyaa yothene. Unakalenga nyumbani wanga thitho ninadyelenga vambo-ive.’ Veva Davide atoothonyi-edha ira kaam’diwanle Yonatani.