Mwene wa i-yana wa makhalelo othakala atoolangiwa

Mwene Ahabu aing’ana undhe dhela vajanelani angali m’mbamwee wu Yezereeli, anoona munda wa mauva wa Naboti. Ahabu anoufuna maningi munduo thitho atoom’mwandela Naboti ira am’guli-edhe. Mbwenye Naboti atookonda namwasa oi ilamulo ya Yohova yanookondi-a atu guli-a yotuva venango vyongo viva-iwile aliwa naanamabaliwa. N’nga Ahabu atoosangalala Naboti angairile vyongo vyofwanelela? Khabe. Malomwee atoothakaleliwa maningi thitho atookonda udya voi atoofiyedhela a-kumanga vandhe liye khaathinga kwartuniwee baa-i.

Ee-no i-yanee Yezebeli wenuo ali wamakhalelo othakala maningi atoom’mwandela ira: ‘Nyo muli mwene wa Aisraeli, munooda kaana yongo iliyothene inofunanyo. Ndinoira vyothene vinaode miyo ira mundula ukale winyu.’ Yezebeli atoalembela makarta andimuwa asidadimo noawandela ira tam’nukhedhele Naboti ira utonyoza Nlungu thitho tam’phe voira m’ponyedha mabwe. Andimuwao tatooiranadi vyevi. Ee-no Yezebeli atom’mwandela Ahabu ira: ‘Naboti utokwa, va-eeni mundule ngwaa.’

Mbwenye kaiira Yezebeli aphide Naboti baa-i. Liye atoopha atu anjinji o-odawa enao adhiveliwana Yohova. Yezebeli alambela mafwano thitho anooirana vyongo vyothakala maningi. Yohova anoona vyongo vyothene vyevi. N’nga airilen’ni?

Ahabu angakwide, mwanee Yehoramu atookala mwene. Yohova atoom’ruma mutu mwinango dhinalee Yehu ira amam’lange Yezebeli na banjalee.

Yehu atoogwela vagaletalee noroma ulendo odhowa wu Yezereeli weo wakala Yezebeli. Anga-adhi vang’ono fiya, Yehoramu atoom’arela na galetalee. Ee-no atoom’fuka Yehu ira: ‘N’nga unodhela vya rendele Yehu?’ Mbwenye Yehu am’mwakule ira: ‘Rendele unakalevo a-vi m’maa airangana vyongo vyothakala maningi?’ Yehoramu angavwide vyevi, atoodhimbinucha galetalee noroma tawa. Mbwenye Yehu atoom’latha thitho akwele vevo.

Ee-no Yehu atoodhowa nyumbani wa Yezebeli. Yezebeli angavwide ira Yehu unaadha, atoodhibalei-a nosaka-edha pama sisilee nodhowa makhaathi vajanelani m’dedi-edhelanga. Yehu angafiile, Yezebeli atoom’mwenyula mwaiburutu. Ee-no Yehu atoawandela anamalaba a Yezebeli ira: “M’ponyedheni vathi.” Aliwa tatooponyadi Yezebeli dhela vajanelani thitho atoogwela vathi nokwa.

Vidhaireye ee-no, Yehu atoopha a-ima aalombwana 70 nomali-a lambela baala muilambo yothene yeniyo. N’nga utoona ira Yohova unoidhiwa vyothene thitho vahora yofwanelela unolanga atu anoirana vyongo vyothakala?