Yeoyada ali olimba rima

Yezebeli atokaana mwana wa i-yana dhinalee Ataliya. Mwanula ali wamakalelo othakala ninga m’mee. Ataliya atootheliwa na mwene wa Ayuda. Man’nee angakwide, mwanee walombwana atookala mwene. Ee-no mwaneuo angakwide, Ataliya atooroma tonga. Liye atoodhilimbi-edha upha atu othene abanja la mwene enao afuna dhavolowela umwenuo. Atoopha thitho adhulee voi atu othene tanom’mova maningi.

Ndimuwa waalimbo velela sembe Yeoyada na i-yanee, Yeoseba tatooidhiwa ira vyaira Ataliya vyali vyothakala. Ee-no tatom’tukhula Yeoasi, wenuo ali dhuulu wa Ataliya nodhowa mam’lokota kachisini. Tatooira vyevi angalive ira tatooidhiwa ira Ataliya azindiyela unoapha.

Yeoasi angana vyawa 7, Yeoyada atooitani-a anamasogolela amagurupu aanyakhondo na Alevi noawandela ira: ‘Muimele valango wa kachisi thitho muonecheche ira mutu uliwethene kavolowe muno.’ Ee-no Yeoyada atom’ela Yeoasi kala mwene wa Ayuda nom’mwari-a ichapowa yaumwene. Adhamale Ayuda tatookuwa ira: ‘Mwene akaena ingumi yolapela.’

Ataliya angavwide kuwa waatu, atootamangela kachisinio. Angam’monile mwene wa chineneevuo, atookhuwa ira: “Mutondiirela vyauphanga! Mutondiirela vyauphanga.” Adhamale anamasogolela aanyakhondwale, tatoom’inda nom’kumi-a vandhe thitho tatoom’pha. Mbwenye Ataliya ali angadimeli-idhe maningi Ayuda.

N’nga Yeoyada airilen’ni? Liye atookami-a ira Ayuda taire vwelano na Yohova thitho tatoolanyedha ira anodha m’lambelanga liye baa-i. Atoawandela ira tagwi-e kachisi wa Baala nononga mafwano othene. Wenjedhela vevo, atoosakula alimbo velela sembe na Alevi oi talabenga vakachisini ira atu tarome okoka lambela Yohova. Thitho atoosakula anamaing’anela oi takalenga valango naifunelo yoi taonechechenga ira mutu uliwethene othakali-iwa kavolowe. Ee-no Yeoyada naanamasogolela agulu laanyakhondwale, tatoom’tukula Yeoasi nom’dhowana nyumbani yau mwene thitho tatookaathi-a vapandoni. Ayuda tatoosangalala maningi. Vinooneya ira aliwa tangaodilenga m’lambela Yohova pama mo-otuchiwa na Ataliya venango dodomi-iwa naatu olambela Baala. Limba rima wa Yeoyada watookami-a atu anjnji.