Ngelo wa Yohova atoom’barela Ezekiya

Senakeribu wenuo ali mwene wa Asuri, atoogonji-a umwene wa Aisraeli wa maziza 10. Ee-no anoofuna gonji-a umwene wa Yuda wa maziza menli. Liye atooroma gonji-a masidadi a Yuda. Sidadi lafunechecha liye maningi lali la Yerusalemu. Mbwenye Senakeribu kaaidhiwa ira Yohova anoobarela sidadili.

Ezekiya wenuo ali mwene wa Yuda, atoom’va-a Senakeribu kobiri dhinjinji ira a-alande sidadi la Yerusalemu. Senakeribu atowachela kobiridho, mbwenye atooruma gulu laanyakhondwee dhowa wu Yerusalemu. Atu asidadimo tangavwide ira anyakhondwao ta-adhi vang’ono fiya, tatoova maningi. Mbwenye Ezekiya atoawandela ira: ‘Kamuove. Pyaimbarimbari ira Asuri mbakopolo, mbwenye Yohova unonikami-a.’

Senakeribu atoom’ruma Rabisake ira adhowe wu Yerusalemu maonga na Ayuda. Rabisake atooimela vandhe va sidadilo nokuwa ira: ‘Atunyo, Ezekiya kaunami-eni. Yohova kanaode ukami-ani. Kavali Nlungu unaniimwanani-e ugonji-ani.’

Ezekiya atom’vepha Yohova ira aakami-e idhiwa vyofwanelela irana. Yohova atoomwakhula ira: ‘Khuove vinoonga Rabisakevyo. Senakeribu kanaode gonji-a Yerusalemu.’ Ee-no Ezekiya atoowachela makarta okumela wa Senakeribu. Makartanimo mwali madhu oonga ira: ‘Uire onga ira utogonja baa-i. Yohova kanauvulumuchani.’ Adhamale Ezekiya atoolobela ira: ‘Pepani Yohova, nivulumucheni ira mutu uliwethene aidhiwe ira nyo muli Nlungu waimbarimbari.’ Yohova atom’mwandela ira: ‘Mwene wa Asuri kanofiya wu Yerusalemu. Miyo ndinobarela sidadi langa.’

Senakeribu aona ira unogonji-a Yerusalemu. Mbwenye nama-iyu, Yohova atooruma ngelo ulimburo wagonile anyakhondo Aasuri. Ngeluo atoopha anyakhondo 185.000. Anyakhondo othene akhopolo a Senakeribu thamalele vevo. Adhamale Senakeribu atooidhiwa ira utogonja thitho atooroma ulendo owelela waniwa. Veva Yohova atookwakwaneli-edha yolanyedhayee yoi unodha m’barela Ezekiya na sidadi la Yerusalemu. N’nga aakale ira weyo uli wu Yerusalemu, ungam’nyindele Yohova?