MURU 61
Tatookhonda lambela fwano
Kumela vevo mwene Nebukadinezara vyaro-ile liye, tatoosaka-edha fwano nlukulu la oro. Fwanoli taliimechile uikundu inango ya ilambo ya Dura thitho tatooitana atu othene ana vizo vilukulu muguverno thangani-avo Sadirake, Mesake na Abedinego. Atwao tangagumaneele, mwene atootonga ira: ‘Mwavwa ula wa lipenga, itoliro, bangwe na mafaramento o-iyana-iyana oombana, mukokore nolambela fwanoli. Mutu uliwethene unakonde kokorela fwanoli, unoponyedhiwa lindini la mulo.’ N’nga azombwe araru Aieberale tairilen’ni? N’nga tatookokorela fwanolo venango tatoosikimizela m’lambela Yohova?
Adhamale mwene atoonga ira nyumbo irome. Mutu uliwethene atokokora nolambela fwanolo. Mbwenye Sadirake, Mesake na Abedinego katakokorile. Atu enango tangaoni, tatoom’mwandela mwene ira: ‘Azombwe araru Aieberala anaakonda lambela fwanoli.’ Nebukadinezara atowaitani-a azombwao noawandela ira: ‘Ndinouva-ani ngari inango yoi mulambele fwanoli. Akala kamunolambela munoponyedhiwa lindini lo-inda mulo thitho kavali nlungu unauvulumucheni mandhani mwanga.’ Aliwa tatoowakula ira: ‘Kamurucheye niva-anga ngari inango. Nlungwi-u unooda nivulumucha. Mbwenye akala kanonivulumucha, idhiwani ira nyo mwene i-yo kaninolambela fwano linyuli.’
Nebukadinezara angavwidhe vyevi, atoothakaleliwa maningi rimanimwee. Moi atoowandela atu ira: ‘Thethedhani mulo lindinimo fendo 7 ira mukale mokha-a maningi kwaranya mwemo munokalelecha aliwa.’ Moi e-no atoowandela anyakhondweao ira: ‘Amangeni nowaponyedha lindinimo.’ Lindinimo mwali mungaka-ile maningi moi anyakhondwao tangawandamele, tatookwa vahora yeniyene. Azombwe araru Aiebarale tatoponyedhiwadi lindinimo. Nebukadinezara angapatamenle lindinimo, atoona ira lindinimo muli atu 4 a-kala araru. Angaoni vyevi atoova maningi thitho atoofuka o-arelee ira: ‘N’nga vale kanaponyedhilemo atu araru mulindi lamuloli? Miyo ndinoonamo atu 4 thitho mwinanguo unooneya ninga ngelo.’
Adhamale Nebukadinezara atoofiya vaduzi na valindinivo nokuwa ira: ‘kumani nyo arumiwi a Nlungu wadhuludhulu.’ Atu othene tatoodabwa ona ira Sadirake, Mesake na Abedinego takumanga o-ovyene. Likhungu, sisi na vyowara viwa kavyavyide thitho katanuka wichi.
Nebukadinezara atoonga ira: ‘Atitimi-iwe Nlungu wa Sadirake, Mesake na Abedinego. Liye atooruma ngelwee dhaavulumucha. Kavali nlungu mwinango ofwanafwana naliye.’
N’nga weyo unooda kalave ororomeleya wa Yohova ninga mwairele azombwe Aiebere ararwale?
“Yohova Nlungwaa ngunofwanelawee m’lambela thitho unofwanela m’labelanga liye baa-i.”—Mateu 4:10