Yesu atoom’venyathi-a Lazaro

Yesu atokaana afwee araru enao akalecha wu Betaniya. Afweao ali Lazaro naarongolee ambili, Mariya na Marta. Dambo n’nango, Yesu angali kombela n’nanga la-inje wa Yordani, Mariya na Marta tatoom’tumizela milanyu yoonga ira: ‘Lazaro unaabulela maningi. Pepani mudhe mombaranya.’ Mbwenye Yesu kaadhowileo hora yeniyene. Atookala weo malambo meli. Moi e-no atoawandela anamafunjedhee ira: ‘Dhoweni wu Betaniya. Lazaro unaagona mbwenye ndinofuna ndimam’venyathi-e.’ Atwao tatom’mwandela ira: ‘Akala Lazaro unaagona, chineneeva unokala pama.’ Moi ee-no Yesu atoawandela ira: ‘Lazaro utokwa.’

Vahora yafiya Yesu wu Betaniya, Lazaro ali angali masiyeni malambo 4. Watoodha atu anjinji enao adhidhe dham’dili-a Marta na Mariya. Marta angavwide ira Yesu unaaudha, atoom’arela. Angam’gumanena atoom’mwandela ira: ‘Mbwiye, Mbwiye, mwaakale uno rongolanga kaakwee.’ Yesu atom’mwandela ira: ‘Rongolaa unovenyathi. Unororomela vyevyi?’ Marta atoonga ira: ‘Ee ndinororomela ira undha venyathi-iwa vadambo lomari-a.’ Moi ee-no Yesu atoom’mwandela ira: ‘Miyo ndili venyathi na ingumi.’

Ee-no Marta atoodhowa mam’mwandela Mariya ira: ‘Yesu utodha.’ Mariya atootamangela wali Yesu thitho gurupu laatu latom’arela. Mariya atookokora vaduzi na vali Yesu alanga. Ee-no atoonga ira: ‘Mbwiye, mwaakale uno rongoli-u kaakwe.’ Yesu angaoni ira Mariya utosukwala maningi, naliyene atooroma ula. Atu tangaoni ira Yesu unaagwi-a mi-odi taongile ira: ‘Ee, mbwenye anom’dhiveliwana maningi Lazaro.’ Mbwenye atu enango tatooroma fuka ira: ‘Mwasiwa ngwan’ni kaam’kami-idhe ira a-akwe?’ N’nga Yesu airilen’ni?

Yesu na atwao tatoodhowa masiyeni thitho tafwaide ira vamasiyenivo vafungiwile na libwe. Liye atoawandela atu ira: ‘Kumi-anivo libweli.’ Mbwenye Mariya atoonga ira: ‘Utomala malambo 4. Ee-no vinooneya ira utoroma nuka.’ Mbwenye atwao tatookumi-avo libwelo thitho Yesu atooroma lobela ira: ‘Baba, ndinousimbani ira mutondivwa. Nditoidhiwa ira munondivwecha hora dhothene, mbwenye ndinolobela mongweli-a madhu ee-ni ira atwala taidhiwe vyoi ngu nyo undirumile.’ Adhamale lobela atookhuwa ira: “Lazaro, kakhuma.” Adhaire ee-no vatooireya vyodabwi-a. Lazaro atookhuma thitho ali angamadhi potiwa na nguwo. Yesu atoonga ira: “Kam’thatuleni ira aodhe wenda.”

Atu anjinji tangaoni vyevi tatoom’roromela Yesu. Mbwenye atu enango tatoodhowa mawandela Afarisi thitho Afarisao tanoofuna m’pha Lazaro na Yesu. M’mbo-i mwaarumiwee 12 dhinalee Yudasi Isikarioti, atoozemba nodhowa Waafarisi maafuka ira: ‘N’nga munondiva-a kobiri dhingasi ndaukami-ani m’fwanya Yesu?’ Tatoovwelana ira ninouva-a kobiri dha siliva 30. Ee-no Yudasi atooroma sakasaka pata wapama ira am’velele Yesu.