YOFUNJEDHA 12
N’nga munaire a-vi ira mwa-a-iye funjedha Bibilya?
Mo-okaikela funjedha Bibilya kokami-a maningi. Mbwenye hora dhinango irana vyevi unokala orucha. Venango munovikaikela akala munodhowanave funjedha Bibilya. Mwasiwa ngwan’ni munofwanela kaana thindhi ira mwa-a-iyachi funjedha Bibilya? N’nga chini inaukami-eni ira mwa-a-iyachi funjedha angalive ira munogumanana vyorucha?
1. Mwasiwa ngwan’ni funjedha Bibilya kofuneya?
Bibilya linoonga ira: “Madhu a Nlungu mbaingumi thitho akopolo.” (Aebere 4:12) Bibilya tokami-a maningi namwasa oi linoukami-ani idhiwa mwemo Nlungu munothuulela liye thitho munouwonelani liye. Kai ira Bibilya linoukami-ani idhiwa vyongo baa-i, mbwenye thitho linoukami-ani kaana zelu thitho kaana idedi-edho yapama. Kwaranya vyothene, Bibilya linooda ukami-ani kala xamwali wa Yohova. Mwafunjedhanga Bibilya munokala murumeli-anga ira kopolodhee dhiukami-eni chinja ingumiinyu.
2. Mwasiwa ngwan’ni ninofwanela ona ira imbarimbari ya Bibilyani chapereso yavadhulu?
Imbarimbari ya Bibilyani ili ninga fuma yapereso yavadhulu. Ngumwasiwa Bibilya linonilimbi-a ira “nigule imbarimbari thitho kaniiguli-e.” (Sanganiko 23:23) Nathuulelanga funeya wa imbarimabari ya Bibilyani, ninokaana thindhi vofunjedha angalive ira vikale vyorucha.—Muleri Sanganiko 2:4, 5.
3. N’nga Yohova unaukami-eni a-vi ira mwa-a-iyachi funjedha?
Voi Yohova ngunamapanducha wa kopolo dhothene thitho fwinyu, liye utouidhiwani pama thitho unofuna ukami-ani ira mum’mwidhiwe. Yohova unodha “limbi-a vyofuna vinyu ira muire vyothene vinodhiveliwana liye.” (Muleri Afilipi 2:13.) Ee-no hora dhinango mwafuneelanga limbi-iwa ira mudhowenave funjedha winyu no i-ndi-edha basa vinofunjedhanyo, liye unodha ukami-ani. Akala munogumanana nyarwa venango runi-iwa, Nlungu unouva-ani kopolo ira muode vilela. Mulobelenga wa Yohova hora dhothene ira aode ukami-ani dhowanave funjedha Bibilya.—1 Atezalonika 5:17.
FUNJEDHANI VINJINJI
Sakasakani ira muone vinairenyo ira mwa-a-iyachi funjedha Bibilya angalive ira muli opingeya venango runi-iwa. Mwamala thuulelani mwemo Yohova munaukami-edheni liye ira mudhowenave funjedha.
4. Muonenga ira funjedha Bibilya kofuneya maningi
Hora dhinango i-yo ninokalecha opingeya na mabasa oneyanga ira kai vyoodeya kaana hora yofunjedha Bibilya. N’nga chini inanikami-e? Muleri Afilipi 1:10, mwamala mutapanye vyofuka vyo-arelavi:
N’nga munoona ira “pivyongo viivi vili vyofuneya” vaingumi?
N’nga munaire a-vi ira muonenga ira funjedha Bibilya kofuneya maningi vaingumiinyu?
Mwaroma e-la useva baldini amala nyo e-langamo mabwe, mabwawo katinayamo othene
Mbwenye mwaroma e-lamo mabwe, muno-ala limburo ira useva unjinji uyemo. Mwandhila imbo-ive mwa-ela vyongo vyofuneya va limburo loroma, munodha kaana hora yoira vyongo vinango
Nafunjedhanga Bibilya ninokala nividyi-anga mwauzimu namwasa ozindiyela ira ninofuneela m’mwidhiwa Nlungu nomlambela. Muleri Mateu 5:3, mwamala mutapanye yofuka yo-arela:
N’nga ninanganyali a-vi navilimbi-edhanga kaana hora yofunjedha Bibilya?
5. Kamurumele ira atu enango tauimwanani-eni funjedha Bibilya
Hora dhinango atu tanooda ufooki-ani ira mu-iyachi funjedha Bibilya. Muone vyam’mwireele Francesco. Muonele VIDIYO, mwamala mutapanye vyofuka vyo-arelavi.
Vidiyonimu, afwee Francesco nam’mee tairilen’ni liye angaawandele vinofunjedha liye?
N’nga araeli-iwe a-vi namwasa odhowanave funjedha?
Muleri 2 Timoteo 2:24, 25, mwamala mutapanye vyofuka vyo-arelavi:
N’nga abalinyu naafwinyu tanoonga vyoi a-vi namwasa ofunjedhawinyu Bibilya?
Movwelana na maversuala, nyo munaire a-vi akala ira mutu mwinango kanosangalala namwasa oi munaafunjedha Bibilya? Mwasiwa ngwan’ni?
6. Munyindelenga Yohova ira aukami-eni
Uxamwali-u na Yohova walimbanga, paevo vanofunechecha i-yo ira vyongo vyomsangalali-a. Mbwenye hora dhinango vinonirucha chinja vyongo vinango vaingumii-u ira ni-arelenga vinofuna liye. Akala ira nyo munovivwa ee-no kamuwelele nduli, Yohova unodha ukami-ani. Muonele VIDIYO, mwamala mutapanye vyofuka vyo-arelavi.
Vidiyonimu, pivyongo viivi vyachinjile Jim ira asangalali-enga Yohova?
N’nga pivyongo vii-vi viudabwi-idheni va ifwanafwaniyee?
Muleri Aebere 11:6, mwamala mutapanye vyofuka vyo-arelavi:
N’nga Yohova unoairelan’ni atu “anomsakasaka na rima wethene” thapulela atu ale anovilimbi-edha m’mwidhiwa noirana vyongo vyomdhiveliwi-a?
Movwelana na lembali, nyo munoona ira Yohova unovwa a-vi aonanga thindhi linyu vofunjedha Bibilya?
MUTU UNANGO UNOODA UFUKANI IRA: “Mwasiwa ngwan’ni munofunjedha Bibilya?”
N’nga munam’mwakule a-vi?
MAKUNDO OGWANDELA
Angalive ira munogumanana vyorucha vofunjedha Bibilya, kamu-iye nyindela Yohova thitho liye unodha uraeli-ani ira musangalale na ingumi yodhowa nodhowa.
Vyofuka vyowelela
Mwasiwa ngwan’ni munoona ira imbarimbari ya Bibilyani njifuma yapereso yavadhulu?
N’nga munaire a-vi ira “musikimizele ira vyongo vyofuneya maningi piivi”?
Mwasiwa ngwan’ni munofwanela lobelanga ira Yohova aukami-eni dhowanave funjedha Bibilya?
IDHIWANI VINJINJI
Muone ndhila 4 dhedho dhikami-idhe atu anjinji i-ndi-edha basa horiwa mwazelu.
“Kodi Mungatani Kuti Muzigwiritsa Ntchito Bwino Nthawi?” (Galamukani!, Fevereiro wa 2014)
Muone mwemo Yohova mwakami-edhe liye i-yana unango weniyo man’nee kaavwechecha mwasee anodhilimbi-edha m’sangalali-a Nlungu.
Yehova Amatilimbikitsa Kuti Tithe Kulimbana Ndi Mavuto Athu (5:05)
Muone mwemo lombwana unango mwaganyalile liye namwasa oi i-yanee kaa-iidhe funjedha Bibilya.
Hora dhinango atu anoonga ira a Mboni dha Yohova anomwadhani-a mabanja aatu. N’nga vyevyo pyaimbarimbari?
“Kodi a Mboni za Yehova Amapangitsa Kuti Mabanja a Anthu Athe Kapena Alimbe?” (Mwasa wavasaiti)