Dhowananive limbi-a idedi-edho yinyu

1. N’nga Yohova univa-idhe idedi-edho yoi a-vi?

YOHOVA utoniva-a idedi-edho yapama maningi ya ingumi yo-omala. Enango tanodedi-edhela dhakala dhulu modhowa nodhowa ninga vyopanduchiwa vyauzimu vyoi kavinokwa. (1 Akor. 15:50, 53) Mbwenye atu anjinji tanodedi-edha dhakala vailamboi modhowa nodhowa tangana manungo apama thitho mosangalala. (Apok. 21:3, 4) Akala ninodedi-edhela dhakaana ingumi yo-omala dhulu venango vailamboi, ninoona ira idedi-edho yi-u chapereso yavadhulu.

2. N’nga idedi-edho inokumela wani, n’nga mwasiwa ngwan’ni ninoonga e-no?

² Madhu oi “idedi-edho” ninga mu-indi-edhiwile aliwa basa Bibilyani, anooda thapulela ira “dedi-edhela ira vyongo vinangovyee vyapama viireye.” Idedi-edho yi-u yasogolo chosikimizeleya namwasa oi inokumela wa Yohova. (Aroma 15:13) Ninoidhiwa vyongo vinilanyedhile liye, thitho nitoidhiwa ira hora dhothene unokwakwaneli-edha vyolanyedhavyee. (Num. 23:19) Nili osikimiza ira Yohova unofunechecha thitho utokaana kopolo yokwakwaneli-edha vilivyothene viongile liye. Ee-no ideddi-edho yi-u kainothapulela thuulela venango funechecha vyongo vinangovyee vyapama, mbwenye ninodedi-edhela vyongo vyaimbarimbari vyevyo vina umboni.

3. N’nga ninofuna nitapanyen’ni muyofunjedha yei? (Salimo 27:14)

³ Babi-u wadhulu unonidhiveliwana, thitho unofuna ira nimroromelenga. (Muleri Salimo 27:14.) Idedi-edho yi-u wa Yohova yakala yolimba, ninodha oda vilela vyowesedhiwa, ninodha kala olimba rima thitho ninodha kala osangalala masiki nigumamena vyoi a-vi sogolou. Dhoweni nioneni mwemo idedi-edho yi-u munonivunelela aliwa. Ira niidhiwe vyevi ninoona idedi-edho yi-u muli aliwa ninga nangula thitho kapaseti. Namala ninotapanya mwemo munalimbi-edhe i-yo idedi-edho yi-u.

IDEDI-EDHO YI-U ILI NINGA NANGULA

4. N’nga idedi-edho inofwanafwana a-vi na nangula? (Aebere 6:19)

⁴ Karta lalembele liye Aebere, rumiwi Paulo atofwanafwani-edhela idedi-edho na nangula. (Muleri Aebere 6:19.) Hora dhinjinji Paulo anoowenda vabarani ee-no anoidhiwa ira nangula unokami-a baruku ira la-awendawendenga. Vahora inango angali barukuni watoroma lipevo lakopolo. Vahora yavira lipevolo, liye anoona alimbo wendi-a baruku taponyanga anangula ma-injeni vovunela ira barukulo la-adime mabwe. (Mayir. 27:29, 39-41) Mofwanafwana na nangula munokami-edha liye baruku, idedi-edho yi-u inonikami-a kalave okurudheya ira na-akume wa Yohova nagumanana nyarwa dhili ninga lipevo. Idedi-edho yi-u yolimba inonikami-a ira nivilele nagumanangana vyowesedhiwa vilukulu, namwasa oi kaninokaikela ira vachineneeva vyongo vinodha kala pama. Thuulelani ira Yesu atowenjeli-a ira ninodha oni-iwa nyarwa. (Juwau 15:20) Ee-no thuulela vya yotuva yasogolo yeniyo ilanyedhiwile i-yo, unonikami-a ira nikaleve olimba volambela wi-u.

5. N’nga idedi-edho yamkami-idhe a-vi Yesu vadedi-edhela liye piwa?

⁵ Kathuulelani mwemo idedi-edho mwamkami-edhe aliwa Yesu kalave ororomeleya, angalive ira anoodedi-edhela piwa mwauwalanga. Vadambo la Petekoste mu 33 C.E., rumiwi Pedru atooromola madhu ofwanyeya mubukhu la Masalimo, enao anoonga pama mwemo Yesu mwali liye okurudheya ira: “Miyo ndinodha kaana idedi-edho namwasa oi kamunodha i-ya ingumi yanga masiyeni, thitho kamunodha rumela ira tutu la ororomeleya winyu livunde. . . . Thitho namwasa wa kovinyu ndinodha kaana imwerumweru.” (Mayir. 2:25-28; Sal. 16:8-11) Angalive ira Yesu anooidhiwa ira unopiwa, liye atookaana idedi-edho yakopolo yoira Nlungu unodha mvenyathi-a thitho ira unodha sangalala nogumana thitho na Babee dhulu.—Aeb. 12:2, 3.

6. N’nga bali unango aongilen’ni vyokuza idedi-edho?

⁶ Idedi-edho itokami-a abali naarongola anjinji vilela. Kathuulelani ifwanafwani-o ya bali Leonard Chinn, wenuo ali ororomeleya thitho akala wu Engalatera. Vahora ya kondo yoroma ya vailambo yothene, liye atomangiwa namwasa okonda volowa unyakondo. Wa medi mili ato-eliwa perezo ya ekene, thitho vasogolovee atoroma labi-iwa basa lorucha maningi. Vangavirile hora liye atoolemba ira: “Vyagumanena miyo vyatoondikami-a vwechecha pama mwemo idedi-edho munondikami-edha aliwa kala ovilela. Bibilyani mutokala vifwanafwani-o vya Yesu, arumiwi, anamaongela thitho mutokala vyolanyedha vyapama maningi. Vyothene vyevi vinoniva-a idedi-edho yapama yasogolo. Thitho vinonikami-a kala ovilela.” Idedi-edho yali ninga nangula wa Leonard, thitho inooda kala ninga nangula wa i-yo.

7. N’nga vyowesedhiwa vinolimbi-a a-vi idedi-edho yi-u? (Aroma 5: 3-5; Tiyago 1:12)

⁷ Navilela vyowesedha noona mwemo Yohova munonikami-edha liye, ninozindiyela ira liye unosangalala na i-yo thitho vyevi vinolimbi-a idedi-edho yi-u. (Muleri Aroma 5:3-5; Tiyago 1:12.) Ee-no ninokaana idedi-edho yolimba kwaranya yan’na i-yo ningavwide fendo yoroma milanyu yapama. Satana unofuna ira ningonje nagumanangana vyowesedhiwa, mbwenye Yohova unonikami-a ira niode vilela vyowesedhiwa vili vyothene.

IDEDI-EDHO YI-U ILI NINGA KAPASETI

8. N’nga idedi-edho inofwanafwana a-vi na kapaseti? (1 Atezalonika 5:8)

⁸ Bibilya linofwanafwani-edhela idedi-edho yi-u na kapaseti. (Muleri 1 Atezalonika 5:8.) Kapaseti unowara nyakondo unomvunela ira amwidani ta-ampei-e muru. Vakondwi-u yauzimu ninofwanela vunela mathuulelwi-u ira Satana a-anonge. Liye unolimbanana i-yo vo-indi-edha basa vyowesedha, thitho makundo enao ifuneloyee kudhodhomi-a mathuulelwi-u. Ninga mwemo kapaseti monovunelela aliwa muru wa nyakondo, idedi-edho yi-u inovunela mathuulelwi-u ira nidhowenave kala ororomeleya wa Yohova.

9. N’nga inoireya chini atu takala o-okaana idedi-edho?

⁹ Idedi-edho yi-u ya ingumi yo-omala, inonikami-a ira niirenga vyongo mwazelu thitho mozindiyela. Mbwenye idedi-edho yi-u yafooka thitho roma thuulela vyofuna vi-u, ninooda i-ya kaana idedi-edho ya ingumi yo-omala. Kathuulelani vyaireele Makristau enango awu Akoritiyo. Aliwa tatoo-iya roromela yolanyedha yofuneya maningi ya Nlungu yoira alimbo wukwa tanodha venyathi. (1 Akor. 15:12) Paulo atoonga ira atu enao ta-aroromela ira alimbo wukwa tanodha venyathi, tanokaana ingumi yokwakwaneli-edha naluveluviwa. (1 Akor. 15:32) Malamboano thitho atu ta-anadedi-edhela vyolanyedha vya Nlungu, tanoira yongo iliyothene yeyo inaode aliwa ira takaena ingumi yosangalala va-eeni. Mbwenye i-yo ninororomela maningi vyolanyedha vya Nlungu. Idedi-edho yi-u ili ninga kapaseti wenuo unovunela mathuulelwi-u thitho inonikami-a ira na-aire yongo yodhisangalali-a okene, yeniyo inofuna nonga uxamwali-u na Yohova.—1 Akor. 15:33, 34.

10. N’nga idedi-edho inanikami-e a-vi ira na-akaena mathuulelo odaweya?

¹⁰ Kapaseti-u wa idedi-edho unonikami-a ira na-athuulele ira vinodhilimbi-edha i-yo irana vomsangalali-a Yohova, pyo-oganyali-a. Mwaifwanafwani-o, atu enango anooda thuulela ira: ‘Kandinodha kala mugulu laatu enao anofuna dhakaana ingumi modhowa nodhowa. Kandili ofwanelela. Kandinooda a-rela makundo a Nlungu.’ Kathuulelani ira Elifazi wenuo aoneya ninga afuna amdidili-e Yobo, atoo-indi-edha thitho basa mathuulelo ninga enala. Liye aongile ira: “N’nga mutu mbaani ira akale ochena?” Voonga vya Nlungu, liye atoonga thitho ira: “Liye kan’na iroromelo mwaangelwee, thitho dhulu kai ochena muthonimwe.” (Yobo 15:14, 15) Weu wali nama waimbarimbari. Thuulelani ira Satana ngwenuo unolimbi-a mathuulelo enala. Liye unoidhiwa ira mwathuulelanga maningi vyongo ninga vyevyi, munooda i-ya kaana idedi-edho. Ee-no mukondenga vyonama vyevyi, thitho malomwee muthuulelenga vyolanyedha vya Yohova. Kamukaikele ira liye unofuna ira mudhakaena ingumi yodhowa nodhowa, thitho unodha ukami-ani ira muode ira vyevi.—1 Timo. 2:3, 4.

DHOWANANI LIMBI-A IDEDI-EDHO YINYU

11. Mwasiwa ngwan’ni ninofwanela kala oleva rima vevo vanodedi-edhela i-yo ira Nlungu akwakwaneli-edhe vyolanyedhavyee?

¹¹ Kai vyokweya dhowanave limbi-a idedi-edho yi-u. Hora dhinango ninooda i-ya dedi-edhela mo-oleva rima ira Nlungu akwakwaneli-edhe vyolanyedhavyee. Mbwenye voi Yohova ngodhowa nodhowa, Hora inooneya wa i-yo kala yolapela, wa liye njokwivela. (2 Pe. 3:8, 9) Liye unodha kwakwaneli-edha ifuneloyee vahora yofwanelela. Mbwenye Venango kanaire vyevi vahora inodedi-edhela i-yo. N’nga chini inanikami-e ira nidhowenave limbi-a idedi-edho yi-u, vanodedi-edhela i-yo moleva rima ira Nlungu akwakwaneli-edhe vyolanyedhavyee?—Tiy. 5:7, 8.

12. Movwelana na lemba la Aebere 11:1, 6, n’nga vali vwelana oi a-vi vari vaidedi-edho na iroromelo?

¹² Ninodhowanave kaana idedi-edho yolimba, nakala vauxamwali olimba na Yohova wenuo unoniva-a idedi-edho. Thitho Bibilya linothonyi-edha ira vatokala vwelana vari vaidedi-edho nororomela ira Yohova utokalao, thitho ira “unovelela yotuva waatu anomfunafuna na rima othene.” (Muleri Aebere 11:1, 6.) Naroromelanga maningi ira Yohova utokalao, paevo vanororomela i-yo maningi ira liye unodha kwakwaneli-edha vyothene vilanyedhile liye. Dhoweni nitapanyeni vyongo vinango vinanikami-e limbi-a uxamwali-u na Yohova, vyevyo vinaniiri-e ira nidhowenave kaana idedi-dho yolimba.

13. N’nga ninaire a-vi ira nikale vauxamwali na Nlungu?

¹³ Mulobelenga wa Yohova thitho leri Madhwee. Angalive ira kaninooda m’mona Yohova, ninooda kala vauxamwali na liye. Ninooda m’monganee mulobelo thitho kaninokaikela ira unonivuruwana. (Jer. 29:11, 12) Ninooda mvuruwana Nlungu nalerinaga madhwee thitho athuulela modi-a. Naleringa vya mwemo Yohova mwasamalele liye atu enao takanleve ororomeleya wa liye ndulimu, idedi-edho yi-u inolimba maningi. Vyothene vinoleri i-yo mumadhu a Nlungu, “vyalembiwile ira vinilangi-e. Malembala tanoniva-a idedi-edho namwasa oi tanonikami-a vilela thitho tanonilimbi-a.”—Aroma 15:4.

14. Mwasiwa ngwan’ni ninofwanela thuulelanga vyairile Yohova waatu enango?

¹⁴ Muthuulelenga mwemo Yohova mukanle liye akwakwaneli-edhanga vyolanyedhavyee. Kathuulelani vyevyo Yohova vyaairele liye Abrahamu na Sara. Aliwa tali tangafiile tunga loi katakaena a-ima. Mbweye Nlungu atoalanyedha ira aliwa tanodha kaana mwana. (Maro. 18:10) N’nga Abrahamu airile a-vi namwasa wa vyevi? “Atookana idedi-edho thitho iroromelo yoi unodhakala baba wa mitundu minjinji.” (Aroma 4:18) Angalive ira wa mutu vyaoneya ninga vyo-oodeya, Abrahamu atororomela ira Yohova unokwakwaneli-edha yolanyedhayee. Mutu ororomeleyula kaanami-iwile. (Aroma 4:19-21) Myasa ninga dhedhi dhinonifunji-a ira ninyindelenga ira Nlungu unokwakwaneli-edha vyolanyedhavyee, masiki vikale ira wa i-yo kai vyoodeya.

15. Mwasiwa ngwan’ni ninofwanela thuulelanga vyevyo Nlungu vikadhi liye aniirelanga?

¹⁵ Muthuulelenga Yohova vikadhi liye auwirelangani. Kathuulelani mwemo nyo vamweka muganyalelenyo, namwasa okwakwaneli-edhiwa wa madhu a Nlungu. Mwaifwanafwani-o, Yesu atoolanyedha ira Babee unodha uva-ani vinofuneela nyo vaingumiinyu. (Mat. 6:32, 33) Liye atousimikizeli-ani thitho ira Yohova unodha uva-ani zimwee ochena mwauvepa. (Luka 11:13) Yohova ukanle akwakwaneli-edhanga vyolanyedha vyevi. Pyoodeya ira vatokala vyolanyedha vinango vinoonanyo ira vinakwakwaneli-edhiwa wa nyo. Mwaifwanafwani-o, liye atoolanyedha ira unodha ulevelelani, udidili-ani, thitho udyi-ani mwauzimu. (Mat. 6:14; 24:45; 2 Akor. 1:3) Mwathuulelanga maningi viuwireleni Nlungu walelene, munodha limbi-a idedi-edho yinyu yasogolo.

MUSANGALALENGA NA IDEDI-EDHO

16. Mwasiwa ngwani idedi-edho yi-u chapereso yavadhulu?

¹⁶ Idedi-edho yi-u ya ingumi yo-omala, njotuva yapereso yavadhulu yokumela wa Nlungu. Ninodedi-edhela vyongo vyapama maningi sogolo thitho kaninokaikela ira vinodha ireya. Idedi-edho ili ninga nanguli-u thitho inonikami-a ira nikale okurudheya thitho nivilelenga vyowesedhiwa, vooni-iwa nyarwa thitho kaninoova wukwa. Ili ninga kapaseti, inovunela mathuulelwi-u ira nirambele irana vyongo vyothakala nodhilimbi-edha irana vyapama. Idedi-edho yi-u ya Bibilyani inonikami-a kala vauxamwali na Nlungu thitho inothonyi-edha ira liye unonidhiveliwana maningi. Vyongo vinoniwendela mwapama maningi nadhowanave kaana idedi-edho.

17. Mwasiwa ngwan’ni idedi-edho inonikami-a kala osangalala?

¹⁷ Kartale lodhowa wa Makristau oroma, Paulo atowalimbi-a ira: “Dhiveliwani na idedi-edho.” (Aroma 12:12) Paulo anosangalala namwasa oi kaakaikela ira adhowanave kaana iroromelo yolimba, unodha kaana ingumi yo-omala dhulu. I-yo ninosangalala na idedi-edho yi-u namwasa oi kaninokaikela ira Yohova unodha kwakwaneli-edha vyolanyedhavyee. Olemba masalimo aongile ira: “Oraeli-iwa ngumutu ule . . . idedi-edhoyee ili mwa Yohova Nlungwee, . . . olokota imbarimbari modhowa nodhowa.”—Sal. 146:5, 6.