Vyongo vyosangalali-a vifwaidhe i-yo thitho vifunjedhile i-yo na mwasa omlabela Yohova

Anamabalanga tatookuma wu Estonia va hora ya kondo yanambili yavailambo yothene dhowa wu Alemanya wewo wabaliwile miyo. Ndingabaliwile tatooroma kozeela Thamela wu Canada. Nyumbi-u yoroma yali duzi na Otawa wu Canada, yali ing’onong’ono thitho tafuwelamo kuu. Nali osauwa maningi mbwenye nanooda fwanya monje yodya ya namaebe-i.

Dambo n’nango a Mboni dha Yohova talerelanga m’manga lemba la Apokalipse 21:3, 4 vyaleri aliwavyo vyatoakuza maningi moi tatoogwi-a mi-odi ya imwerumweru. Mbeu ya imbarimbari yanooroma ulukula rimani mwiwa thitho aliwa na babanga tatooroma dhowa vasogolo mombaranya maningi thitho tatoobadiziwa.

Anamabalanga kataidhiwa pama Ingeles, mbwenye tatookaana thindhi vomlambela Yohova. Vaduziduzi sabudu nlilothene babanga anonditukula vambo-i na rongolanga wamwana Sylvia dhowa malaleela. Vasogolo volaba basa ma-iyu othene va fabrika yosakanya kobiri ya fero wu Sudbury, wu Ontario. Masumana othene nanofunjedha Sanja ya Namaing’anela ninga banja. Babanga na m’manga tanoondikami-a maningi ira ndidhiveliwengana Nlungu, vyevi vyatondiiri-a ira ndidhivelele wa Yohova mu yawa ya 1956 ndingana vyawa 10. Ona aliwa tamdhiveliwangana Yohova, watoondikami-a maningi va ingumi yanga yothene.

Ndingamari-idhe xikola ndatooroma dodomeya na vyongo vinango va mwasa olambela Yohova. Ndathuulela ira ndakala painiya kandinaode kaana kobiri yokwakwanela yoi ndigwele ndeka ira ndidhowe vilambo vyo-iyana-iyana ninga mwemo mwafunela miyo. Ndatoofwanya basa yau DJ wu nyumba inango yomwadha milanyu thitho ndanolidhiveliwana maningi basali. Ndalaba basali namaulo vyevi vyanondiiri-a ira hora dhinjinji nda-afwanyeenga vamigumanoni thitho ndanoovwelana naatu enao ta-amdhiveliwana Nlungu. Vasogolovee ithuulela rima yanga yofunji-iwa Bibilya yatoondikami-a ira ndichinje.

Ndathamenle wu Oshawa, Ontario. Wewo ndatoogumana na Ray Norman rongolee Lesli thitho apainiya enango. Othene enala tatoondiwachela pama. Ona mwemo mwasangalalela aliwa watondiiri-a ira ndithuulele thitho vifunelo vyanga. Aliwa tatoondilimbi-a ira ndirome upainiya thitho ndatooromadi mu Setembro wa 1966. Ndanosangalala thitho ndanoona ira vyongo vyanondiwendela pama. Mbwenye vyongo vyevyo vyachinje ingumi yanga, vyali vinga-adhi vang’ono funa ireya.

YOHOVA AUVEPANI IRA MUIRE VYONGO VINANGOVYEE MUDHILIMBI-EDHE IRA MUODE VIIRANA

Nda-anamari-e xikola, ndatoolemba formulario yofukedha urumiwi wava Beteli wu Toronto, Canada. Vasogolovee ndatoira upainiya. Ndatoitaniwa ira ndimatumikele wa vyawa vinai. Mbwenye ndanomdhiveliwanee maningi Lesli. Moi ndaova ira akala ndangarumenle dhowa wu Beteli, kandinodha m’monave. Vasogolo volobelela mwasula mokumela vathi va rima mwa hora indendai, ndatoorumela matumikela va Beteli thitho ndatomlanya Lesli ndingali osukwala maningi.

Voroma ndalaba mu departamento yofula vyowara thitho vasogolovee ndatova-iwa basa n’nango lau secretario. Vahoriyo Lesli atokala Painiya wavakundu wu Gatineu, Quebec. Hora dhothene ndanofuna ndangaidhi ira unoiran’ni thitho akala ndatosakula vyofwanelela. Vyevi vyatondiiri-a ira ndirome okoka waredha na Lesli moi natothelana va 27 wa Fevereiro wa 1971 dambo lelo lamari-a miyo urumiwanga okwakwana vyawa vinai.

Miyo na Lesli natootumiziwa matumikela wu mipingo ya iongelo ya Frances yau Quebec. Vangavirile vyawa vyoyeva, ndatoodabwa ndangawandeliwile ira ndikale namaing’anela isa. Hora yeniyo ndali ndingan’na vyawa 28 baa-i. Ndadhiona ira ndili mwana thitho mutu o-oidhiwa vyongo vinjinji. Mbwenye madhu ava lemba la Jeremiya 1:7, 8 tatondilimbi-a. Lesli ali angairile ngovi ya karo va fendo dhingasi. N’nga vinaodeye a-vi dhowa maira urumiwi wa namaing’anela isa? Mbwenye Lesli atondiwandela ira, “Akala Yohova utonivepa ira niire vinangovyee, n’nga kai pama viirana?” Ee-no natoorumela thitho natosangalala ira urumiula wa vyawa 17.

Ndanopingeya maningi va urumiwanga wa namaing’anela isa, moi kandakaana hora yokwakwanela yowaredha na Lesli. Vasogolovee ndatofunjedhavo yongo inango. Chiposi namaebe-i ndatovwa gogoda valango. Ndangakumile kandafwaidhevo mutu uliothene mbwenye ndafaidhe sesto mungali vyotuva keijo, pau, garafa la vinyu, makomixo thitho papeli lolembiwa ira, “Mwaatukulele a-iyaninyu limburo n’nango ira tamasangalale.” Vadamboli watocha pama thitho watookuma dhuwa. Mbwenye ndatom’mwandela Lesli ira, ndatookaana myasa ira ndikozeele thitho kandaode dhowa. Liye atoondhivwechecha mbwenye kaadhiveliwile maningi. Ndangakaatidhe vapandoni ira ndiromenga kozeela, ithuulela rima yanga yatoroma ndioni-a nyarwa. Ndatothuulela lemba la Aefeso 5:25, 28. Ali ninga Yohova unaandilimbi-a ira ndithuulele mwemo i-yananguwo mwavwela liye. Ndingalobenle ndatom’mwandela Lesli ira, “Dhowenga” vyatomsangalali-a maningi. Natodhowa wu limburo n’nango lobaleya chereerani mwa i-nje wewo wadhowile i-yo makaathi va ixinguo thitho lelo lali dambo losangalali-a maningi va ingumii-u. Mbwenye ndatooda kozeela myasa dhanga.

Nanosangalala na urumiwi-u wau namain’ganela isa thitho natowendela matatamo manjinji kumela wu Britania wau Colombia dhowa wu Newfoundland. Veva ifunelwanga ndingali mwana yodhowa matatamo o-iyana-iyana, yali ingaromile kwakwanela. Ndali ndingathuulelevo vyovolowa mu xikola ya Giliadi mbwenye kandafuna kala Misionario wu ilambo inango. Ndanoona ira mamisionario mbaatu avakundu thitho ndathuulela ira kandinaode urumiwi wen’na. Mbwenye ndanoova ira venango ndinodha nditumiziwe wu ilambo inango wu Afrika wewo wali marenda na kondo. Ndanoosangalala tumikela wewo watumikela miyowo.

NDATOODABWA NANGAWANDELIWILE IRA NIMATUMIKELE WU ESTONIA NA VILAMBO VYA CHEREERANI MWA BARA YAU BALTIC

Muyawa ya 1992, vabasali-u mwadhuliwile aliwa mu vilambo vyevyo voroma vyali muutongi wa união sovietica natovepiwa ira akala ninodhiveliwa nimalabe ninga amisionario wu Estonia. Natodabwa maningi mbwenye natoulobelela mwasula. Va thitho natoodhifuka ira, ‘N’nga akala Yohova unonivepa irana vyongo vinangovyee, kaninaode viirana?’ Natoorumela thitho natoodhiwandela ira ‘upamiwa ngoi kaninodhowa wu Afrika.’

Va-anavire hora natoroma funjedha iongelo yau Estonia. Vasogolo viwa vangavirile myedi mingasi nangali muilambonimo natoovepiwa ira niire urumiwi wau namaing’anela isa. Nanofuneela wendela mipingo yokwakwana 46 thitho magurupu mu vilambo viraru vya chereerani mwa bara yau Baltic thitho wu Kaliningrad wu Russia. Vyevi vyathapulela ira nanoofuneya funjedha viongelo vya Ilatvia, Ilituania, na Irussia. Vyali vyongo vyorucha mbwenye afwi-u tanoona thindhi li-u thitho tatonikami-a funjedha viongelovi. Muyawa ya 1999 wu Estonia watokathei-iwa ofesi ya tambi thitho ndatookaana ngari yolaba mu komisau ya wewo vambo-i na Toomas Edur, Lembit Reile na Tommi Kauko.

Natoidhiwana na Amboni anjinji enao tathami-iwile wu Siberia ndulimu. Angalive ira tatooni-iwa nyarwa perezoni thitho a-kalela vambo-ive na banja liwa, katanyanyuwile venango lokota vyarimani. Tatoodhowanave kala osangalala thitho laleela mwathindhi. Vyevi vyatoonikami-a ona ira na-iyene thitho ninooda vilela nodhowanave kala osangalala angalive ira ninogumanana nyarwa.

Vyawa vyavira aliwa, nanoopingeya maningi moi kanakaana hora injinji yovuma voi e-no Lesli atooroma chenyela maningi. Kanazindiyele mombaranya ira ali angaromile bulela marenda anoiri-a ira mutu achenyelenga maningi. Voi e-no natoosikimizela vyoi niwelele wu Canada. Nangaitaniwile ira nimavolowe xikola ya abali amukomisau ya tambi yau Patterson, wu U.S.A., ndatookaikela akala ndingaodile dhowa. Mbwenye ningalobelele maningi mwasula, natoodhowa. Yohova atooraeli-a vyasakunle i-yovyo. Ningali xikolani paevo Lesli vyawachele liye pedhelo la mirombwe yafuneela liye. Voi e-no natooroma okoka ira vyongo ninga mwawale.

NATOODABWA MANINGI NINGATUMIZIWILE WU AFRICA

Ninga welele wu Estonia, namaulo a dambo n’nango muyawa ya 2008, natooligareliwa na sede li-u lavailambo yothene yavathi, yonivepa akala pyoodeya dhowa matumikela wu Congo. Ndatoodabwa maningi, simbwasimbwa namwasa oi ndafuneela wakula vadambo lo-arela. Voromavene kandam’mwandele Lesli vya mwasula, namwasa oi ndaona ira kaaode gona pama dambo lelo. Ndakadhi ndilobelanga wa Yohova, m’mwandelamo myasa yothene yana miyo vamwasa odhowa wu Africa.

Vadambo lo-arela ndatom’mwandela Lesli, nawandelane ira: “Yohova unaanivepa ira nidhowe wu Africa. N’nga ninaidhiwe a-vi ira kaninaode sangalala akala kaninodhowa?” Ee-no vanduli votumikela wu Estonia wa vyawa 16, natoogwela ndeka dhowa wu Kinshasa, wu Congo. Ofesi ya tambi ya weo yatookaana limburo lobaleya maningi thitho lopwaseya. Imbo-i mwa vyongo vyevi, Lesli atooroma e-la vachi-ini ya kwarutwi-u ixikarta yalokotile liye vahora yakuma i-yo wu Canada. Va ixikartalo vali madhu oi, “Mupuwelenga mosangalala valimburo lelo lidhaliwile nyo.” Ningaromile waredha naabali, iri-a funjedha wa Bibilya thitho ona vyongo vyosangalali-a vyodha namwasa okala misionario, natooroma okoka sangalala vomlabela Yohova. Vira wa hora natookaana ngari yowaredhela ma ofesi atambi muvilambo 13 vyau Africa. Vyevi vyatoiri-a ira nikaena ngari yoona atu o-iyana i-yana thitho osangalali-a. Vikumbanyedha wana miyo voromavene watoomala thitho nanomsimba maningi Yohova namwasa onitumiza wu Africa.

Wu Congo nanoova-iwa vyodya vyo-iyana i-yana ninga vixi vilombo, vyevyo vyathuulela i-yo ira kaninodha udya vilombo vyevyo. Mbwenye ningaonile ira abali-u anovidhiveliwana maningi, natooviwesa thitho na-iyene natoovidhiveliwana.

Nanooda dhowana vyodya vyauzimu thitho pedhelo n’nango makumelo adhuwa ailambwiyo weo magurupu aatu auwalanga tanooukela manyumba thitho pei-a a-iyana naa-ima. Abali anjinji tali osauwa, mbwenye natoolimbi-iwa ona ira aliwa tanoororomela maningi ira atu okwa anodha venyathi-iwa, tanomdhiveliwana Yohova thitho tali ororomeleya mugululee. Vyevi vyatooniiri-a ira nidhisakesake thitho limbi-a iroromelo yi-u. Nyumba thitho mbeu dha abali anjinji dhali dhinganongiwile. Vyevi vyatoondikami-a vwechecha likundo loi vyongo vina i-yo vinooda mala mombaranya thitho ira yofuneya maningi ndi uxamwali-u na Yohova. Angalive ira abalao tanoogumana nyarwa dhilukulu, katakala osukwala maningi. Voi abalala tanoona vyongo mofwanelela, vyatoonilimbi-a ira nilimbananenga nyarwa dhi-u molimba rima, masiki dhikale dhokuza manungwi-u.

NATOODHOWA WU ASIA

Voi e-no vatoireya yongo inango yoi kanaidedi-edha. Natoovepiwa ira nimatumikele komisau ya tambi yau Hong Kong. Nali na-anathuulelevo ira vingaodeile dhowa wu Asia! Mbwenye natoorumela ningathuulele mwemo Yohova mwanikami-edhe liye mwaudhivela mumaurumiwi o-iyana i-yana. Yawa ya 2013, natoo-iyana naafwi-u thitho tatamo lobaleya wu Africa nikumi-anga mi-odi thitho kanaidhi ira weo unodhowa i-yo ninodha gumanana vyoi a-vi.

Natofiya wu Hong Kong, weo ndi sidadi lobaleya thitho okala atu a njinji, weo wali chinja ulukulu. Vyali vyorucha funjedha iongelo ya Ichina. Mbwenye abali tatoniwachela pama thitho nanosangalala na vyodya vya wewo. Basa li-u lanodhowa vasogolo mombaranya mbwenye kaana nyumba vyali vyorucha. Ee-no gulu lotonga latothuulela guli-a nyumba dhinjinji dha Beteli muilambonimo. Va-anavire hora injinji, muyawa ya 2015, natothamela wu Sul Korea, weo unotumikela i-yo fiyedha va-eni. Wuno thitho nitofwanya iongelo inango yorucha, mbwenye angalive ira vatokala vinjinji vyoi nifunjedhe, ninolimbi-iwa namwasa oi afwi-u anoniwandela ira munadhilimbi-edha maningi funjedha iongeloi.

VYEVYO VIKADHI I-YO NIVIFUNJEDHANGA

Kai hora dhothene kaana afwi-u vinokala liwa vyokweya, mbwenye nioni ira naroma i-yo waredhela atu enango, ninooda idhiwana naatu mombaranya. Nitoona ira angalive ira abali-u ano-iyana muvyongo vinango, mbwenye anofwanafwana muvyongo vinjinji, thitho namwasa oi Yohova utonipanducha mundhila yopambuleya yoi niodenga thathuwa rima naatu enango, ninooda kaana axamwali anjinji.—2 Akor. 6:11.

Nitoona ira ninofwanela aonanga atu ninga munoaonela Yohova thitho sakasaka ira nione mwemo Yohova munonithonyi-edhela liye udhivelee thitho mwemo munonisogolela liye vaingumi yi-u. Hora iliyothene yeniyo inoona i-yo ira nitofooka venango roma kaikela akala abali-u anosangalala na i-yo, naleri makarta na makadi enao tanilembenle afwi-u. Nikadhi nionanga mwemo Yohova mwawakulela liye malobelwi-u, nilimbi-a thitho niva-a kopolo.

Va vyawa vyothene vyevi, miyo na Lesli nitofunjedha kaana hora yoirela vyongo vambo-i ninga banja, angalive ira nanopingeya maningi. Nitoona funeya theya nadodomi-anga vinangovyee, simbwasimbwa vevo vafunjedha i-yo iongelo inango. Maulo aliothene nanoodhilimbi-edha thuulela vyongo vinango vyosangalali-a vyevyo Yohova viniirele liye nomsimba.

Onga imbarimbari, ndali nda-anathuulelevo ira ndinodha kala misionario venango dhowa muvilambo vyo-iyana i-yana. Mbwenye ndatoosangalala funjedha makundo oonga ira ninooda ira iliyothene vokami-iwa na Yohova. Hora dhothene ndinothuulela madhu anamaongela Jeremiya. Oonga ira: “Mutondidabwi-a nyo Yohova.” (Jer. 20:7) Onga imbarimbari, liye utoniva-a vyongo vinjinji vyosangalali-a thitho maraeli-o o-oongeya, thangani-avo thitho kwakwaneli-edha ifunelwanga yofuna mangwela ndeka. Nikanle nidhowanga nandeka mumatatamo manjinji oi kandaathuulelavo vyali miyo mwana ira ndinodha dhowao. Thitho nitowendela makomisau a tambi muvisa 5 vya ilambo yavathila. Vamaurumiwi-u othene enao akadhi i-yo niiranga, ndinomsimba maningi Lesli namwasa okaana rima ofunechecha ndikami-a.

Ninodhowanave dhithuucha ira ninoira vyothene vyevi namwasa oi ninomdhiveliwana Yohova. Ee-ni nikadhi nilawi-a maraeli-o enao anafwanye i-yo sogolo nadha wachela ingumi yo-omala, vevo Yohova “vanofuna liye dha thapula dhandhalee norumbali-a vyofuna vya yaingumi iliyothene.”—Sal. 145:16.